សាកសពបុរសម្នាក់ដេកស្លាប់ក្នុងវត្ដព្រែកក្ដាមស្រុកពញាឮ បង្កមានការភ្ញាក់ផ្អើល
22-January-2018 | ដោយ ពលមនសិការ
កណ្ដាល ៖ សាកសពបុរសម្នាក់ត្រូវបានគេប្រទះឃើញដេកស្លាប់ក្នុងសាលាបុណ្យ វត្ដព្រែកក្ដាម២ បានបង្កឲ្យមានការភ្ញាក់ផ្អើលឡើងកាលពីវេលម៉ោង៥និង១០នាទីព្រឹក ថ្ងៃទី២១ ខែមករា ឆ្នាំ២០១៨ ស្ថិតក្នុងភូមិព្រែកក្ដាម២ ឃុំកោះចិន ស្រុកពញាឮ ខេត្ដកណ្ដាល ។
មន្ដ្រីនគរបាលផ្នែកកោសល្យវិច្ច័យស្រុកពញាឮបានឲ្យដឹងថា ជនរងគ្រោះមិនស្គាល់អត្ដសញ្ញាណ ភេទប្រុស អាយុ ប្រហែល៤២ឆ្នាំ ជនជាតិខ្មែរ មានកំពស់១,៦៨ម៉ែត្រ សម្បុរសណ្ដែកបាយ ។
ប្រភពដដែលបន្ដថា កាលពីថ្ងៃទី២០ ខែមករា ឆ្នាំ២០១៨ វេលាម៉ោង៦ល្ងាច ជនរងគ្រោះមិនដឹងជាមកពីណានោះទេ បានដើរចូលមកក្នុងវត្ត រួចសុំព្រះសង្ឃសម្រាក ភ្លាមនោះព្រះសង្ឃក៏ឲ្យសម្រាកនៅក្នុងសាលាបុណ្យ លុះមកដល់ម៉ោងប្រហែល៥ភ្លឺ មានលោកយាយម្នាក់បានមកបោសសម្អាតក្នុងសាលាបុណ្យ ក៏ស្រាប់តែឃើញជនរងគ្រោះដេកស្លាប់ បាត់ទៅហើយ បានបង្កឲ្យមានការភ្ញាក់ផ្អើលឡើងនិងរាយការណ៍មកប៉ុស្តិ៍នគរបាលរដ្ឋបាលកោះចិនដើម្បីមកធ្វើការពិនិត្យ។ ក្រោយពីទទួលព័ត៌មានថាមានមនុស្សដេកស្លាប់ ភ្លាមនោះសមត្ថកិច្ចប៉ុស្ដិ៍ក៏បានរាយការណ៍បន្ដទៅកម្លាំងជំនាញ បានចុះមកកន្លែងកើតហេតុដោយមានការចូលរួមពីលោកមេឃុំ ,គ្រូពេទ្យ និងមេភូមិ ពិនិត្យរួចបញ្ជាក់ថា ជនរងគ្រោះពិតជាដេកស្លាប់ពិតប្រាកដមែន។ បើតាមការសន្និដ្ឋានរបស់គ្រូពេទ្យវិញ ជនរងគ្រោះស្លាប់ដោយសារធ្លាយក្រពះ។
បច្ចុប្បន្ន សាកសពជនរងគ្រោះត្រូវបានអាជ្ញាធរដែនដី និងគណៈកម្មការតំកល់ទុកនៅក្នុងវត្ដដើម្បីរកកន្លែងបញ្ចុះ និងស្វែងរកក្រុមគ្រួសារសាច់ញាតិយកទៅចាត់ចែងធ្វើបុណ្យតាមប្រពៃណី ៕
ចំនួនអ្នកទស្សនា
- ថ្ងៃនេះ1641
- ម្សិលមិញ12921
- សប្តាហ៍នេះ1641
- ខែនេះ196241
- ឆ្នាំនេះ196241
- សរុប20638697