ជិះម៉ូតូមិនប្រយ័ត្នបណ្ដាលឲ្យដួលខ្លួនឯងស្លាប់យ៉ាងអណោចអធ័មនៅស្រុកល្វាឯម
22-January-2018 | ដោយ ពលមនសិការ
កណ្ដាល ៖ បុរសម្នាក់ជិះម៉ូតូត្រឡប់មកពីស៊ីការគេក្នុងភូមិមិនប្រយ័ត្ន បណ្ដាលឲ្យដួលធ្លាក់ផ្លូវចូលក្នុងគុម្ពចេក ស្លាប់ភ្លាមៗដោយពុំមាននរណាម្នាក់ដឹងនោះទេ លុះព្រឹកឡើងទើបគេប្រទះឃើញ បានបង្កឲ្យមានការភ្ញាក់ផ្អើលឡើងនៅព្រឹកថ្ងៃទី២១ ខែមករា ឆ្នាំ២០១៨ ស្ថិតក្នុងភូមិបឹងគ្រំក្រោម ឃុំបឹងគ្រំ ស្រុកល្វាឯម ខេត្តកណ្ដាល ។
មន្ដ្រីនគរបាលស្រុកល្វាឯមបានឲ្យដឹងថា ជនរងគ្រោះស្លាប់បាត់បង់ជីវិតឈ្មោះ ទៀង នីន ភេទប្រុស អាយុ៣២ឆ្នាំ មុខរបរមេចុងភៅ មានទីលំនៅភូមិល្វាសរលើ ឃុំល្វាសរ ស្រុកល្វាឯម ខេត្តកណ្ដាល ជិះម៉ូតូម៉ាកហុងដាឌ្រីម ធុនសេ១២៥ ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ1DP-0786 ។
ប្រភពដដែលបន្ដថា នៅមុនពេលកើតហេតុ គេបានឃើញជនរងគ្រោះទៅចូលរួមក្នុងកម្មវិធីមង្គលការគេនៅក្នុងភូមិ លុះត្រឡប់មកវិញ ជនរងគ្រោះបានជិះម៉ូតូក្នុងល្បឿនលឿនដោយពុំប្រយ័ត្ននោះទេ ក្នុងស្ថានភាពគ្រោះថ្នាក់ ខណៈមកដល់ចំណុចកើតហេតុ ស្រាប់តែជនរងគ្រោះបានដួលរួចធ្លាក់ចូលក្នុងដីឡូត៍មួយកន្លែង បណ្ដាលឲ្យស្លាប់ដោយពុំមាននរណាម្នាក់ដឹងនោះទេ។ លុះមកដល់ព្រឹកថ្ងៃទី២១ ខែមករា ឆ្នាំ២០១៨ ទើបមានគេប្រទះឃើញជនរងគ្រោះដេកស្លាប់ក្បែរគុម្ពចេក ភ្លាមនោះក៏មានការភ្ញាក់ផ្អើលឡើងនិងរាយការណ៍ជូនសមត្ថកិច្ចមកធ្វើការពិនិត្យនិងកោសល្យវិច្ច័យរួចបញ្ជាក់ថា ជនរងគ្រោះរងគ្រោះស្លាប់ដោយសារជិះម៉ូតូដួលដោយខ្លួនឯងប្រាកដមែន។ ចំណែកឯសាកសពត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
ចំនួនអ្នកទស្សនា
- ថ្ងៃនេះ1721
- ម្សិលមិញ12921
- សប្តាហ៍នេះ1721
- ខែនេះ196321
- ឆ្នាំនេះ196321
- សរុប20638777