សំណាងណាស់រថយន្តដឹកដីកិនគ្រាប់មីនកៀបកង់មិនផ្ទុះចូលក្នុងក្រុងសៀមរាប
01-February-2018 | ដោយ ពលមនសិការ
សៀមរាប ៖ អ្នកបើករថយន្តដឹកដីម្នាក់បានបើកកិនគ្រាប់មីនមិនទាន់ផ្ទុះមួយគ្រាប់ហើយកៀបជាប់និងកង់ដោយមិនដឹងខ្លួន ខណៈគាត់ទៅយកដីពីរណ្តៅរបស់យាយហ្គិច រួចដឹកយកមកលក់នៅក្រុងសៀមរាប។ បន្ទាប់ពីប្រទះឃើញក៏ភ័យស្លន់ស្លោ ហៅសមត្ថកិច្ចឲ្យជួយអន្តរាគមន៍។
ហេតុការណ៍ប្រទះឃើញនេះកើតឡើងនៅថ្ងៃទី៣១ ខែមករា ឆ្នាំ២០១៨ ក្នុងភូមិភ្ញាជ័យ សង្កាត់ស្វាយដង្គំ ក្រុងខេត្តសៀមរាប។
លោកអនុសេនីយ៍ឯក ស៊ូ វ៉ាន់ដេត នាយប៉ុស្តិ៍រដ្ឋបាលសង្កាត់ស្វាយដង្គំ បានឲ្យដឹងនៅថ្ងៃទី០១ ខែកុម្ភៈ នេះថា អ្នកបើកបររថយន្តដឹកដី ឈ្មោះ នេត កុម្ភៈ ភេទប្រុស អាយុ៣០ឆ្នាំ ជាអ្នករស់នៅក្នុងភូមិភ្ញាជ័យ សង្កាត់ស្វាយដង្គំ បានដឹកដីពី កន្លែងរណ្តៅដី របស់យាយ ហ្គិច ក្នុងភូមិថ្នល់ ឃុំ រុនតាឯក ស្រុកបន្ទាយស្រី ហើយបានដឹកយកមកលក់នៅក្រុងសៀមរាប។
លោកបន្តថា បន្ទាប់ពីម្ចាស់រថយន្តចាក់ដីឲ្យគេរួចយកឡានមកជួសជុលនៅយាន្តដ្ឋានមួយកន្លែងនៅសង្កាត់ស្វាយដង្គំ ក៏ប្រទះឃើញគ្រាប់មីនប្រភេទ៨០មីលីម៉ែត្រចំនួន១គ្រាប់កៀបជាប់ចន្លោះកង់រថយន្ត។ ពេលនោះទាំងម្ចាស់រថយន្តនិងម្ចាស់យាន្តដ្ឋាន មានការភ័យស្លន់ស្លោ ហើយក៏បានរាយការណ៍មកសមត្ថកិច្ចឲ្យជួយអន្តរាគមន៍។
លោកបន្ថែមថាបន្ទាប់ពីសមត្ថកិច្ចទៅដល់ក៏បានរាយការណ៍ទៅអង្កការស៊ីម៉ាក់មកដោះ ដើម្បីយកទៅកម្ទេចចោល។ មន្ត្រីជំនាញបានអះអាងថានេះគឺជាសំណាងរបស់ម្ចាស់រថយន្តណាស់ដែលមិនកិនចំ ព្រោះអីគ្រាប់នេះអាចមានលទ្ធភាពផ្ទុះបាន ហើយគ្រាប់មីននេះផលិតនៅប្រទេសអាមេរិចកាំង ៕
ចំនួនអ្នកទស្សនា
- ថ្ងៃនេះ1351
- ម្សិលមិញ12921
- សប្តាហ៍នេះ1351
- ខែនេះ195951
- ឆ្នាំនេះ195951
- សរុប20638407