ស្លាប់ពីរនាក់របួសធ្ងន់ម្នាក់ដោយជិះម៉ូតូវ៉ាជែងខ្វះការប្រុងប្រយ័ត្ន
02-February-2018 | ដោយ ពលមនសិការ
ពោធិ៍សាត់ ៖ បុរសពីរនាក់បានស្លាប់និងម្នាក់រងរបួសធ្ងន់ដោយឧបទ្ទវហេតុគ្រោះថ្នាក់ចរាចរណ៍ មួយបង្កឡើងដោយអ្នកជិះម៉ូតូម៉ាកហុងដាសេ១២៥ ពណ៌ខ្មៅ សេរី២០១៧ ពាក់ស្លាកលេខពោធិ៍សាត់ 1H-5314 ជិះឌុបគ្នា បើកបរតាមបណ្តោយផ្លូវជាតិលេខ៥ ក្នុងទិសដៅពីកើតទៅលិច មកដល់ចំណុចជញ្ជីងថ្លឹងរថយន្ត ចន្លោះបង្គោលគីឡូម៉ែត្រលេខ១៩១-១៩២ ស្ថិតនៅភូមិកំពែងស្វាយ ឃុំស្នាមព្រះ ស្រុកបាកាន ខេត្តពោធិ៍សាត់ ម៉ូតូបានឡើងវ៉ារថយន្ត ទៅបុកម៉ូតូកង់បី ធ្វើដំណើរច្រាសទិសគ្នា បណ្តាលឲ្យអ្នកបើកបរម៉ូតូកង់បីស្លាប់នៅនឹងកន្លែង រីឯអ្នកបើកបរម៉ូតូស្លាប់ពេលបញ្ជូនទៅមន្ទីរពេទ្យ នឹងរងរបួសធ្ងន់អ្នករួមដំណើរម្នាក់ ហេតុការណ៍នេះកើតឡើងនៅវេលាម៉ោង១៧និង៥៥នាទី ថ្ងៃទី០១ ខែកុម្ភៈ ឆ្នាំ២០១៨។
ប្រភពព័ត៌មានបានឲ្យដឹងថា មុនពេលកើតហេតុ គេឃើញបុរសពីរនាក់ ជិះម៉ូតូម៉ាកខាងលើ បោះពួយយ៉ាងលឿន មកដល់ចំណុចកើតហេតុ ម៉ូតូបានវ៉ារថយន្តមួយគ្រឿង ទៅបុកម៉ូតូកង់បីយ៉ាងពេញទំហឹង ដួលបោកក្បាលហូរឈាមលើផ្លូវថ្នល់ ធ្វើឲ្យមានការភ្ញាក់ផ្អើល ដល់អ្នកធ្វើដំណើរ និងសមត្ថកិច្ច ចុះដល់កន្លែងកើតហេតុ ។
លោកវរសេនីយ៍ត្រី ព្រំ តូរ៉ា អធិការរងទទួលបន្ទុកការងារសណ្តាប់ធ្នាប់ នៃអធិការដ្ឋាននគរបាលស្រុកបាកាន បានប្រាប់ឲ្យដឹងថា ជនរងគ្រោះត្រូវបានសមត្ថកិច្ចស្គាល់អត្តសញ្ញាណទី១-ឈ្មោះ សៀង មាន ភេទប្រុស អាយុ២៨ឆ្នាំ រស់នៅភូមិអណ្តូងសំបួរ ឃុំស្នាមព្រះ ស្រុកបាកាន ជាអ្នកបើកបរម៉ូតូកង់បី បានស្លាប់នៅនឹងកន្លែង ទី២-ឈ្មោះ គង់ តុលា ភេទប្រុស អាយុ១៨ឆ្នាំ រស់នៅភូមិស្នាមព្រះ ឃុំស្នាមព្រះ ស្រុកបាកាន ជាអ្នកបើកបរម៉ូតូម៉ាកហុងដា ស្លាប់ខណៈពេលបញ្ជូនទៅមន្ទីរពេទ្យភ្នំពេញ បានពាក់កណ្តាលផ្លូវ និងទី៣-ឈ្មោះ សឿន សុខាន ភេទប្រុស អាយុ២០ឆ្នាំ ជាអ្នករួមដំណើររស់នៅភូមិស្តុកស្វាយ ឃុំស្នាមព្រះ ស្រុកបាកាន ខេត្តពោធិ៍សាត់ រងរបួសធ្ងន់ កំពុងសម្រាកព្យាបាលនៅមន្ទីរពេទ្យ។
ក្រោយកើតហេតុសមត្ថកិច្ចបានយកវត្ថុតាងមករក្សាទុកនៅការិយាល័យនគរបាលចរាចរណ៍ផ្លូវគោក ដើម្បីកសាងសំណុំរឿង តាមនីតិវិធី។ លោកអធិការរង បានបន្តថា ករណីគ្រោះថ្នាក់នេះបណ្តាលមកពី កត្តាប្រើប្រាស់ល្បឿន ទើបបណ្តាលឲ្យគ្រោះថ្នាក់មកនេះ ៕
ចំនួនអ្នកទស្សនា
- ថ្ងៃនេះ341
- ម្សិលមិញ12921
- សប្តាហ៍នេះ341
- ខែនេះ194941
- ឆ្នាំនេះ194941
- សរុប20637397