ថ្នាំញៀន៦កញ្ចប់ធំត្រូវបានសមត្ថកិច្ចធ្វើរឆែកឆេររកឃើញក្នុងបាស់ដែលជនសង្ស័យបានលាក់ទុកមុនពេលចាប់ខ្លួន
05-February-2018 | ដោយ ពលមនសិការ
កណ្ដាល ៖ នគរបាលស្រុកអង្គស្នួល សហការជាមួយកម្លាំងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្ដកណ្ដាល ដោយមានការឯកភាពពីលោកឧត្ដមសេនីយ៍ទោ អ៊ាវ ចំរើន ស្នងការនគរបាលខេត្ដកណ្ដាល និងមានការសម្របសម្រួលពីព្រះរាជអាជ្ញាអមសាលាដំបូងខេត្ដ ធ្វើការស្រាវជ្រាវរកឃើញថ្នាំញៀនចំនួន៦កញ្ចប់ធំ ដែលជនសង្ស័យឈ្មោះ ចាន់ ចិត្ដ កំពុងជាប់ក្នុងពន្ធនាគារបានលាក់ទុកក្នុងធុងបាស់ មុនពេលសមត្ថកិច្ចចាប់ខ្លួនកាលពីថ្ងៃទី២៧ ខែមករា ឆ្នាំ២០១៨ វេលាម៉ោង១៦និង៣០នាទី ត្រង់ចំណុចផ្ទះជួល ស្ថិតក្នុងភូមិព្រៃសំរោង ឃុំដំណាក់អំពិល ស្រុកអង្គស្នួលខេត្តកណ្តាល ។ ករណីស្រាវជ្រាវឆែកឆេរខាងលើនេះ ធ្វើឡើងកាលពីថ្ងៃទី០៣ ខែកុម្ភៈ ឆ្នាំ២០១៨ វេលាម៉ោង១០ និង៣០នាទី ត្រង់ចំណុចផ្ទះជនសង្ស័យ ស្ថិតក្នុងភូមិទួលសេរី ឃុំទួលព្រេជ ស្រុកអង្គស្នួល ខេត្តកណ្តាល ។
លោកវរសេនីយ៍ឯក មាន សំណាង អធិការនគរបាលស្រុកអង្គស្នួលបានឲ្យដឹងថា ជនសង្ស័យដែលកំពុងជាប់ក្នុងពន្ធនាគារមានឈ្មោះ ចាន់ ចិត្ដ ភេទប្រុស អាយុ៣១ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិទួលសេរី ឃុំទួលព្រេជ ស្រុកអង្គស្នួល ខេត្តកណ្តាល ។ ក្នុងប្រតិបត្ដិការឆែកឆេរខាងលើនេះ សមត្ថកិច្ចបានរកឃើញថ្នាំញៀនប្រភេទមេតំហ្វេតាមីនហៅម៉ាទឹកកកចំនួន៦កញ្ចប់ធំ ស្មើនិងទម្ងន់ ២៩៩,០៥ក្រាម បន្ថែមទៀត ដែលមានតម្លៃ៥ពាន់ដុល្លារសហរដ្ឋអាមេរិក និងទូរស័ព្ទដៃ២គ្រឿងផងដែរ ។
គួរំឮកផងដែរថា កាលពីថ្ងៃទី២៧ ខែមករា ឆ្នាំ២០១៨ ជនសង្ស័យឈ្មោះ ចាន់ ចិត្ដ ជាមុខសញ្ញាជួញដូរថ្នាំញៀនយ៉ាងសកម្ម ត្រូវបានសមត្ថកិច្ចស្រុកអង្គស្នួលធ្វើការចាប់ខ្លួនពីបទជួញដូរដោយខុសច្បាប់នូវសារធាតុញៀន ដែលប្រព្រឹត្ដត្រង់ចំណុចផ្ទះជួល ស្ថិតក្នុងព្រៃសំរោង ឃុំដំណាក់អំពិល ស្រុកអង្គស្នួល ខេត្ដកណ្ដាល ។ ក្រោយពេលចាប់ខ្លួនបាន ជនសង្ស័យខាងលើនេះ ត្រូវបានព្រះរាជអាជ្ញាអមសាលាដំបូងខេត្ដធ្វើការឃុំខ្លួនក្នុងពន្ធនាគារអស់រយៈពេលជាច្រើនថ្ងៃមកហើយ ។ លុះរហូតមកដល់ថ្ងៃទី៣ ខែកុម្ភៈ ឆ្នាំ២០១៨ វេលាម៉ោង១០ និង៣០នាទី លោកសមត្ថកិច្ចផ្នែកប្រឆាំងគ្រឿងបានទទួលព័ត៌មានច្បាស់ថា ជនសង្ស័យខាងលើបានលាក់ទុកថ្នាំញៀនប្រភេទមេតំហ្វេតាមីនហៅម៉ាទឹកកកមួយចំនួនធំនៅក្នុងធុងបាស់ តម្លៃប្រហែល៥ពាន់ដុល្លារសហរដ្ឋអាមេរិក និងទូរស័ព្ទដៃចំនួន២គ្រឿងផងដែរ ។
លោកអធិការបានបន្ដទៀតថាក្រោយពីទទួលបានព័ត៌ភ្លាម លោកបានសុំការអនុញ្ញាតិពីលោកឧត្ដមសេនីយ៍ទោ អ៊ាវ ចំរើន ស្នងការនគរបាលខេត្ដ និងមានការសម្របសម្រួលពីព្រះរាជអាជ្ញាអមសាលាដំបូងខេត្ដ ឲ្យកម្លាំងជំនាញស្រុក សហការជាមួយកម្លាំងការិយាល័យប្រឆាំងគ្រឿងនៃស្នងការដ្ឋាននគរបាលខេត្ដ ចុះទៅស្រាវជ្រាវ ស្វែងរករហូតឃើញធុងបាស់របស់ជនសង្ស័យដែលយកថ្នាំញៀនទៅលាក់នោះ រួចធ្វើការដោះបំបែកធុងបាស់នោះ បានឃើញថ្នាំញៀនប្រភេទមេទំហ្វេតាមីនហៅម៉ាទឹកកក ចំនួន៦កញ្ចប់ធំ មានទម្ងន់ ២៩៩,០៥ក្រាម បន្ថែមទៀតពិតប្រាកដមែន ។ ចំពោះវត្ថុតាងថ្នាំញៀនចំនួន៦កញ្ចប់ធំខាងលើ ត្រូវបានកម្លាំងជំនាញកសាងសំណុំរឿងបញ្ជូនទៅព្រះរាជអាជ្ញាអមសាលាដំបូងខេត្តកណ្តាល បន្តចាត់ការតាមនីតិវិធីច្បាប់ ៕
ចំនួនអ្នកទស្សនា
- ថ្ងៃនេះ621
- ម្សិលមិញ12921
- សប្តាហ៍នេះ621
- ខែនេះ195221
- ឆ្នាំនេះ195221
- សរុប20637677