ពិធីផ្សព្វផ្សាយច្បាប់ស្ដីពីហាមឃាត់អាវុធគីមី អាវុធនុយគ្លេអែ អាវុធជីវសាស្ត្រ និងអាវុធវិទ្យុសកម្ម
06-February-2018 | ដោយ ពលមនសិការ
រតនគិរី ៖ មន្ត្រីរាជការ អាជ្ញាធរខេត្ត កងកម្លាំងប្រដាប់អាវុធទាំងបីប្រភេទ ថ្នាក់ដឹកនាំស្រុក ក្រុង ទាំងអស់ ក្នុងខេត្តរតនគិរី ប្រមាណជាង២០០នាក់ បានចូលរួមពិធីផ្សព្វផ្សាយ ស្ដីពីច្បាប់ហាមឃាត់ អាវុធគីមី អាវុធ នុយគ្លេអែ អាវុធជីវសាស្ត្រ និងអាវុធវិទ្យុសកម្ម ដែលបានផ្សព្វផ្សាយឡើងដោយអាជ្ញាធរជាតិ អាវុធគី មី។
ពិធីផ្សព្វផ្សាយនេះ ត្រូវបានធ្វើឡើងនៅព្រឹកថ្ងៃអង្គារ ទី០៦រោច ខែមាឃ ឆ្នាំរការ នព្វស័ក ព.ស ២៥៦១ត្រូវនឹងថ្ងៃទី០៦ ខែកម្ភៈ ឆ្នាំ២០១៨ នៅសាលប្រជុំសាលាខេត្តរតគិរី ក្រោមអធិបតីភាព ឯកឧត្ដម ឧត្ដមសេនីយ៍ឯក បណ្ឌិត ហេង វុទ្ធី អគ្គលាខាធិការរង អាជ្ញាធរជាតិអាវុធគីមី ព្រមទាំងលោក យឹម ផែន អភិបាលរងខេត្តរតនគិរីផងដែរ។
បន្ទាប់ពីកិច្ចស្វាគមន៍របស់លោក យឹម ផែន មក ឯកឧត្ដម ហេង វុទ្ធី បានលើកឡើងអំពីសភាពការបច្ចប្បន្ន ក្រោមការដឹកនាំបញ្ជាផ្ទាល់របស់សម្ដេច ពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានអាជ្ញាធរ អាវុធគីមី បានដាក់ចេញនូវកម្មវិធីផ្សព្វផ្សាយច្បាប់នាពេលនេះ។ ពិធីផ្សព្វផ្សាយនេះក្នុងន័យចែករំលែកចំណេះដឹង និងផ្លាស់ប្ដូរបទពិសោធន៍ អំពីមហន្តរាយ និងផលប៉ះពាល់ ពីសារធាតុគីមី អាវុធនុយគ្លេអែ អាវុធជីវសាស្ត្រ និងអាវុធវិទ្យុសកម្មថ្នាក់ជាតិ ថ្នាក់តំបន់ និងពិភពលោក។ ឯកឧត្ដមក៏បានជម្រាបជូនផងដែរ អំពីស្ថានភាពប្ច្ចុប្បន្ន ទាក់ទងទៅនិងជនរង្គ្រោះដោយសារគ្រាប់បែកគីមី ដែលទំលាក់ដោយសហរដ្ឋអាមេរិកនៅឃុំគគី ស្រុករមាសហែក ខេត្តស្វាយរៀង។
រាជរដ្ឋាភិបាលបានយកចិត្តទុកដាក់យ៉ាងខ្លាំងលើបញ្ហានេះ ហើយក៏បានបង្កើតកម្មវិធីព្យាបាលជូនប្រជាពលរដ្ឋរង្គ្រោះដោយសារគ្រាប់បែកគីមី ដោយឥតគិតថ្លៃ។ មិនតែប៉ុណ្ណោះ រាជរដ្ឋាភិបាលថែមទាំងផ្ដល់ការងាយស្រួល ដល់ប្រជាពលរដ្ឋ ក្នុងការស្វែងរកសេវាព្យាបាល ដែលនៅជិតនោះ ព្រមទាំងកាត់បន្ថយការចំណាយ ហើយទាន់ពេលវេលា ដោយសាងសង់មណ្ឌលសុខភាពមួយជូនប្រជាពលរដ្ឋ នៅក្នុងឃុំគគីនេះផ្ទាល់តែម្ដង។
ឯកឧត្ដមបានបញ្ជាក់ថា បច្ចុប្បន្ន បញ្ហាអាវុធគីមី អាវុធជីវសាស្ត្រ អាវុធនុយគ្លេអែ និងអាវុធវិទ្យុសកម្ម បានគំរាមកំហែងយ៉ាងធ្ងន់ធ្ងរ លើសុខសន្តិភាព ស្ថេរភាពក្នុងតំបន់ និងលើពិភពលោក។
តាមរយៈពិធីផ្សព្វផ្សាយច្បាប់នេះ ឯកឧត្ដម ឧត្ដមសេនីយ៍ឯក មានជំនឿយ៉ាងមុតមាំថា ពិតជាបានមកនូវបទពិសោធន៍ និងមេរៀនថ្មីៗ ល្អៗ ក្នុងការចែករំលែកការយល់ដឹង ដល់អស់លោក លោកស្រី តាមរយៈកម្មវិធីផ្សព្វផ្សាយនេះ ក្នុងកិច្ចវិភាក្សា ផ្ដល់យោបល់គ្នា ស្វែងយល់ ដើម្បីត្រៀមខ្លួនការពារ ព្រមទាំងផ្សព្វផ្សាយបន្ត ដល់ប្រជាពលរដ្ឋ តាមមូលដ្ឋានផងដែរ៕
ចំនួនអ្នកទស្សនា
- ថ្ងៃនេះ12851
- ម្សិលមិញ10851
- សប្តាហ៍នេះ79371
- ខែនេះ194521
- ឆ្នាំនេះ194521
- សរុប20636977