អ្នកភូមិបង្កោងនាំគ្នារកត្រីទុកសម្រាប់ឡើងមាឃ
06-February-2018 | ដោយ ពលមនសិការ
សៀមរាប ៖ ជារៀងរាល់ឆ្នាំអ្នកភូមិបង្កោង ឃុំអំពិល ស្រុកប្រាសាទបាគង តែងតែនាំគ្នាចុះរកត្រីក្នុងត្រពាំងបង្កោងដើម្បីត្រៀមទុកធ្វើនំបញ្ចុកឡើងមាឃក្នុងភូមិរបស់ពួកគាត់។ ពិធីនេះធ្វើឡើងនៅព្រឹកថ្ងៃទី០៦ ខែកុម្ភៈ នេះដោយមានចាក់មេក្រូបំពងសម្លេងយ៉ាងសប្បាយរីករាយផងដែរ។
លោក លោកព្រាន ប្រប មេឃុំអំពិលបានឲ្យដឹងថា ត្រពាំងបឹងត្រូវបានអ្នកភូមិការពារមិនឲ្យមានការនេសាទ រហូតដល់វេលាមួយដែលកំណត់ដើម្បីចុះរកត្រី។ លោកបន្តថា ពិធីរកត្រីនេះត្រូវបានរៀបចំធ្វើជារៀងរាល់ឆ្នាំនៅដើមខែមាឃ ដើម្បីត្រៀមឡើងមាឃរបស់អ្នកភូមិ។
លោកបន្ថែមថា ការរកត្រីរួមគ្នានេះគឺចាប់ធ្វើពីថ្ងៃ១កើត ខែមាឃ ហើយនៅថ្ងៃបន្ទាប់អ្នកភូមិត្រៀមធ្វើនំ និងថ្ងៃ៣កើតត្រូវធ្វើពិធីឆ្លង។ លោកថានេះគឺជាប្រពៃណីដែលអ្នកភូមិបានដឹងឮ និងធ្វើជារហូតមកដល់សព្វថ្ងៃ។
ពិធីចុះរកត្រីនេះ គឺអ្នកភូមិបង្កោងបានប្រើប្រាស់ឧបករណ៍នេសាទបុរាណ ដែលមានដូចជាសំណាញ់ និងអង្រុត ហើយមានចាក់មេក្រូដើម្បីធ្វើឲ្យកម្មវិធីមួយនេះ ឲ្យកាន់តែសប្បាយរីករាយផងដែរ។
ការរកត្រី ធ្វើឡើងទៅតាមគ្រួសារនីមួយៗ ហើយត្រីដែលរកបាន ខ្លះចំអិនហូបនៅនឹងកន្លែង ដោយត្រូវទុកខ្លះសម្រាប់ធ្វើសម្លនំបញ្ចុក ទុកដល់ថ្ងៃឆ្លងមាឃ។ អ្នកភូមិអាចហូបនំបញ្ចុកនៅតាមផ្ទះរៀងខ្លួនៗឬក៏អាចហូបរួមដែលគេធ្វើនៅសាលាឆទានក្នុងភូមិបង្កោងតែម្តង៕
ចំនួនអ្នកទស្សនា
- ថ្ងៃនេះ12901
- ម្សិលមិញ10851
- សប្តាហ៍នេះ79421
- ខែនេះ194571
- ឆ្នាំនេះ194571
- សរុប20637027