ជំនាញស្ទូចរថយន្ត ដែលមិនបានបង់ពន្ធ ដោយទាំងម្ចាស់ដែលក្រាញមិនព្រមចុះចេញ
08-February-2018 | ដោយ ពលមនសិការ
បាត់ដំបង ៖ ភាពភ្ញាក់ផ្អើលមួយបានកើតឡើងទាំងយប់ដោយសារតែមានរថយន្តមួយគ្រឿង ត្រូវបានអង្គភាពជំនាញស្ទូចនាំយកមករក្សាទុកនៅការិយាល័យ ចរាចរណ៍ផ្លូវគោកដែលមានទាំងម្ចាស់រថយន្តជាច្រើននាក់ នៅអង្គុយក្នុងរថយន្តល្មើសនោះផង ដោយពួកគេមិនព្រមចុះចេញពីរថយន្តឡើយ ខណៈដែលរថយន្តនេះបាននិងកំពុងធ្វើចរាចរណ៍នៅតាមដងផ្លូវដោយគ្មានស្លាកលេខ ហើយក៏ត្រូវអង្គភាពពន្ធដារចាប់ ។
ហេតុការណ៍នៃការឃាត់រថយន្តនេះ បានធ្វើឡើងកាលពីថ្ងៃទី៧ ខែកុម្ភៈ ឆ្នាំ២០១៨ វេលាម៉ោង៤និង០៤នាទី តាមបណ្តោយផ្លូវជាតិលេខ៥ ត្រង់ចំណុចភូមិក្បាលថ្នល់ឃុំកំពង់ព្រៀង ស្រុកសង្កែ ខេត្តបាត់ដំបង ដោយទីតាំងខាងលើនេះ ត្រូវបានកម្លាំងសាខាពន្ធដារខេត្ត ដែលដឹកនាំដោយលោកអនុប្រធានពន្ធដារ ទូច សុទ្ធី សហការជាមួយនឹងមន្ត្រីកងរាជអាវុធហត្ថ និងនគរបាលខេត្តផងដែរ។ នៅក្នុងកិច្ចប្រតិបត្តិការនោះ កម្លាំងជំនាញបានធ្វើការឃាត់រថយន្តមួយគ្រឿង ដែលគ្មានស្លាកលេខ ម៉ាកតូយ៉ូតា ព្រូស ពណ៌ក្រហម ផលិតឆ្នាំ២០១៥ ជាកម្មសិទ្ធិរបស់ឈ្មោះ ឡៃ ស្រីលាវ រស់នៅភូមិទួលពង្រ ឃុំទួលពង្រ ស្រុកម៉ាឡៃ ខេត្តបន្ទាយមានជ័យដែលកំពុងបើកបរក្នុងទិសដៅពីភ្នំពេញ ទៅបាត់ដំបង។
ជុំវិញការឃាត់រថយន្តនេះ ត្រូវបានភាគីម្ចាស់រថយន្តអះអាងថាខ្លួនទើបនឹងទិញមកពីឃ្លាំងនៅក្រុងភ្នំពេញ បានប៉ុន្មានថ្ងៃប៉ុណ្ណោះ ដោយគ្រោងនាំយកមកបង់ពន្ធ នៅខេត្តបន្ទាយមានជ័យ ហើយក៏ត្រូវអង្គភាពជំនាញចាប់តែម្តង។
ភាគីដដែលបានសង្កត់ធ្ងន់ថា ខ្លួនត្រូវបានអង្គភាពពន្ធដារបង្ខំអោយផ្តិតមេដៃ លើលិខិតដកហូតមួយ ហើយតម្រូវអោយបង់ប្រាក់ចំនួន១០ ម៉ឺនរៀល ព្រមទាំងសុំអោយពួកគេលុបរូបភាពដែលថតទៅលើក្រុមការងារចោលផងដែរ ប៉ុន្តែក្រោយពីពួកគេមិនព្រមផ្តិតមេដៃ និងបង់ប្រាក់ ស្រាប់តែមន្ត្រីពន្ធដារម្នាក់ ដែលជាប្រធានការិយាល័យ ពន្ធដារស្រុកឈ្មោះ ទែន ជំនិត ហែកឯកសារនោះចោលតែម្តង ព្រមទាំងបានបញ្ជាអោយរថយន្តធ្វើការស្ទូចនាំយករថយន្តល្មើសនេះទៅរក្សាទុកនៅការិយាល័យ ចរាចរណ៍ផ្លូវគោកជាបណ្តោះអាសន្នសិន។ នៅក្នុងពេលនោះដែរ ភាគីម្ចាស់រថយន្តដែលជាស្ត្រី រួមជាមួយនឹងក្មេងតូចៗ ពីរ បី នាក់ គឺគេមិនព្រមចុះចេញពីរថយន្តឡើយ ដែលតម្រូវអោយការស្ទូចនេះត្រូវស្ទូចយកទាំងមនុស្សទៅជាមួយដែរ ។
ខណៈដែលភាគីរថយន្តមកដល់ក្នុងស្នងការដ្ឋាន នគរបាលខេត្តគឺមានអ្នកសារព័ត៌មានចោមរោមសាកសួរ ដោយសារមានចម្ងល់ ដោយគេបានចោទប្រកាន់យ៉ាងធ្ងន់ធ្ងរទៅលើអង្គភាពសាខាពន្ធដារខេត្ត ដែលកំពុងកៀប និងជម្រិតយកប្រាក់ព្រមទាំងបង្ខំអោយម្ចាស់រថយន្តផ្តិតមេដៃ ដោយមិនបានអានខ្លឹមសារអោយគេស្តាប់បន្តិចសោះ ។
ជុំវិញបញ្ហានេះដែរ នៅវេលាម៉ោងប្រមាណ ៩យប់ ថ្ងៃដដែល មន្ត្រីពន្ធដារចំនួន៣ រូបដែលដឹកនាំដោយលោកអនុប្រធាន ទូច សុទ្ធី បានចូលមកបំភ្លឺថា ការឃាត់រថយន្តនេះកម្លាំងរបស់លោករកឃើញឯកសារគឺមានតែ បង្កាន់ដៃនាំចូលតែប៉ុណ្ណោះ គឺចូលមកតាំងពីថ្ងៃទី១៦ ខែធ្នូ ឆ្នាំ២០១៥ ម្ល៉េះ រីឯលិខិតលក់ ទិញ ពីឃ្លាំងណាមួយនោះ គឺសស្អាតដោយគ្មានសរសេរអ្វីទាំងអស់ ហាក់មានចេតនា ឬគំនិតទុច្ចរិតអ្វីមួយ។
លោកអនុប្រធានបានបន្ថែមថា ដោយសារបញ្ហានេះ គឺអង្គភាពត្រូវធ្វើការពិន័យទៅតាមបង្កាន់ដៃពន្ធនាំចូល មានន័យថា រថយន្តនេះមិនបានបង់ពន្ធ ចូលរដ្ឋ ចំនួន៣ឆ្នាំមកហើយ ចំណែកប្រាក់១០ម៉ឺន ដែលមន្ត្រីលោកតម្រូវអោយបង់នោះ លោកសុំធ្វើការបំភ្លឺថា ហេតុផលមាន២ចំណុច ទី១៖ត្រូវអោយម្ចាស់យានយន្តបង់ពន្ធអោយគ្រប់ចំនួននៅនឹងកន្លែងចុះប្រតិបត្តិការ ទើបចេញបណ្ណជូន, ទី២៖ ការចេញលិខិតតម្រូវអោយម្ចាស់យានយន្តបង់ប្រាក់១០ ម៉ឺនរៀលនេះ មិនមែនមានន័យថាទាមទារនោះទេ គឺអោយម្ចាស់ដាក់ប្រាក់ធានា ដើម្បីអោយគាត់ត្រឡប់មកបង់ពន្ធវិញអោយបានគ្រប់ចំនួន ដោយសារតែឃើញពួកគាត់មានក្មេងតូចច្រើន។
ទីបំផុតនៅយប់នោះ ត្រូវបានរំសាយសិនដោយភាគីទាំងសងខាង នឹងជួបគ្នាវិញនៅព្រឹកថ្ងៃទី ៨នេះ ប៉ុន្តែរហូតមកទល់នឹងថ្ងៃត្រង់ទៅហើយ គេមិនបានឃើញភាគីរថយន្តចូលខ្លួនមកដោះស្រាយឡើយ ៕
ចំនួនអ្នកទស្សនា
- ថ្ងៃនេះ11571
- ម្សិលមិញ10851
- សប្តាហ៍នេះ78091
- ខែនេះ193241
- ឆ្នាំនេះ193241
- សរុប20635697