សាខាពន្ធដារខេត្ត បំភ្លឺលើករណីឃាត់រថយន្តព្រូស ដែលមិនបានបង់ពន្ធ៣ឆ្នាំ
09-February-2018 | ដោយ ពលមនសិការ
បាត់ដំបង ៖ រឿងអាស្រូវមួយបានផ្ទុះឡើង និងអាចធ្វើឲ្យភាគច្រើន មានការយល់ច្រឡំ ជុំវិញការឃាត់រថយន្តមួយគ្រឿងពីសំណាក់មន្ត្រីជំនាញ ដែលមានការអាក់ខានមិនបានបង់ពន្ធរយៈពេល៣ឆ្នាំ បន្ទាប់ពីម្ចាស់រថយន្តបានថតជាឃ្លីបវីដេអូបង្ហោះតាមប្រព័ន្ធបណ្តាញសង្គម ដោយបានវាយប្រហារទៅលើមន្ត្រីដែលកំពុងអនុវត្តច្បាប់ ។
គួររំលឹកដែរថា ហេតុការណ៍នៃការឃាត់រថយន្តនេះ បានធ្វើឡើងកាលពីថ្ងៃទី០៧ ខែកុម្ភៈ ឆ្នាំ២០១៨ វេលាម៉ោង៤ និង០៤នាទីល្ងាច តាមបណ្តោយផ្លូវជាតិលេខ៥ ត្រង់ចំណុចអូរសណ្តាស់ ក្នុងភូមិស្រះកែវ ឃុំកំពង់ព្រះ ស្រុកសង្កែ ខេត្តបាត់ដំបង ដោយទីតាំងខាងលើនេះ ត្រូវបានកំលាំងសាខាពន្ធដារខេត្ត ដែលដឹកនាំដោយលោកអនុប្រធានពន្ធដារ ទូច សុទ្ធី រួមសហការជាមួយនឹងមន្ត្រីកងរាជអាវុធហត្ថ និងនគរបាលខេត្តផងដែរ។
នៅក្នុងកិច្ចប្រតិបត្តិការនោះ កម្លាំងជំនាញបានធ្វើការឃាត់រថយន្តមួយគ្រឿង ដែលគ្មានស្លាកលេខ ម៉ាកតូយ៉ូតា ព្រូស ពណ៌ក្រហម ផលិតឆ្នាំ២០១៥ ជាកម្មសិទ្ធិរបស់ឈ្មោះ ឡៃ ស្រីលាវ រស់នៅភូមិទួលពង្រ ឃុំទួលពង្រ ស្រុកម៉ាឡៃ ខេត្តបន្ទាយមានជ័យដែលកំពុងបើកបរក្នុងទិសដៅពីភ្នំពេញ ទៅបាត់ដំបង ។
ជុំវិញការឃាត់រថយន្តនេះ ត្រូវបានភាគីម្ចាស់រថយន្តអះអាងថាខ្លួនទើបនឹងទិញមកពីឃ្លាំងនៅក្រុងភ្នំពេញ បានប៉ុន្មានថ្ងៃប៉ុណ្ណោះ ដោយគ្រោងនាំយកមកបង់ពន្ធ នៅខេត្តបន្ទាយមានជ័យ ហើយក៏ត្រូវអង្គភាពជំនាញចាប់តែម្តង ដោយនៅទីនោះគឺមានសភាពតានតឹងដាក់គ្នាផងដែរ ដោយសារតែម្ចាស់រថយន្តមិនព្រមបង់ពន្ធតាមការកំណត់ ទើបអង្គភាពជំនាញសម្រេចបញ្ជូនទៅរក្សាទុកជាបណ្តោះអាសន្ន ក្នុងស្នងការដ្ឋាន នគរបាលខេត្ត បាត់ដំបង ។
ជុំវិញបញ្ហានេះដែរ នៅវេលាម៉ោងប្រមាណ ៩យប់ ថ្ងៃដដែល មន្ត្រីពន្ធដារចំនួន៣ រូបដែលដឹកនាំដោយលោកអនុប្រធាន ទូច សុទ្ធី បានចូលមកបំភ្លឺថា ការឃាត់រថយន្តនេះកម្លាំងរបស់លោករកឃើញឯកសារគឺមានតែ បង្កាន់ដៃបង់ពន្ធនាំចូលតែប៉ុណ្ណោះ គឺចូលមកតាំងពីថ្ងៃទី១៦ ខែធ្នូ ឆ្នាំ២០១៥ម្លេះ រីឯលិខិតលក់ ទិញ ពីឃ្លាំងណាមួយនោះ គឺសស្អាតដោយគ្មានសរសេរអ្វីទាំងអស់ ហាក់មានចេតនា ឬគំនិតទុច្ចរិតអ្វីមួយ ។
ក្រោយមកម្ចាស់រថយន្តបានបង្ហោះជាសាធារណៈ នូវឯកសារលក់ទិញ ដែលមិនដឹងថាគេមានគំនិតបែបណានោះទេ ព្រោះកាលចាប់គឺគេគ្មានឯកសារទាំងនេះឡើយដោយលិខិតលក់ ទិញទទេស្អាត ដូច្នេះគឺគេមានបំណងមិនល្អរួចទៅហើយសម្រាប់វាយប្រហារទៅលើសាខាពន្ធដារខេត្ត បាត់ដំបង។
នៅល្ងាចថ្ងៃទី៨ ខែកុម្ភៈ ឆ្នាំ២០១៨ នេះ សាខាពន្ធដារខេត្ត បានចេញលិខិតបំភ្លឺមួយ ជុំវិញបញ្ហាខាងលើ ដោយយោងទៅលើសេចក្តីសម្រេចលេខ ០១៩ ចុះថ្ងៃទី ១៨ ខែកុម្ភៈ ឆ្នាំ២០១៨ ដោយអភិបាល នៃគណអភិបាលខេត្ត បាត់ដំបង ដើម្បីអោយកម្លាំងសាខាពន្ធដារចុះពិនិត្យប្រកាសបង់ពន្ធលើមធ្យោបាយដឹកជញ្ជូនគ្រប់ប្រភេទ សម្រាប់ឆ្នាំ២០១៧ព្រមទាំងបានដាក់កម្លាំងឈរជើងនៅត្រង់ទីតាំងកើតហេតុខាងលើ ហើយក៏បានឃាត់រថយន្តព្រូសមួយគ្រឿងនេះ ដែលម្ចាស់មិនបានបង់ពន្ធរយៈពេល៣ឆ្នាំហើយ ដោយផ្អែកទៅលើលិខិតពន្ធនាំចូលនាចុងឆ្នាំ២០១៥។
សាខា បានបញ្ជាក់ថា កម្លាំងបានធ្វើកំណត់ហេតុ អោយម្ចាស់តម្កល់ប្រាក់ធានា ចំនួន១០ ម៉ឺនរៀល ដើម្បីអោយម្ចាស់មកបង់ប្រាក់ពន្ធបង្គ្រប់នៅសាខាពន្ធដារខេត្ត តាមកាលបរិច្ឆេទដែលបានកំណត់ ដោយស្ត្រីជាម្ចាស់រថយន្តបានព្រមព្រៀងផ្តិតមេដៃរួចរាល់ហើយស្រាប់តែមានរថយន្តមួយគ្រឿងទៀតម៉ាក លុចស៊ីស ៣៣០ ពណ៌ទឹកមាស បានមកបង្គាប់អោយម្ចាស់រថយន្តបដិសេធចំពោះកំណត់ហេតុនោះវិញ ហើយចាប់ផ្តើមឡូឡា និងថតជាឃ្លីបវីដេអូ ដោយគម្រាមថានឹងបង្ហោះប្រសិនបើកំលាំងមិនអនុញ្ញាតអោយរថយន្តនេះបន្តដំណើរទៅមុខទេនោះ ។
ដោយសារតែស្ថានភាពតានតឹង មន្ត្រីពន្ធដារបានបង្ខំចិត្តធ្វើកំណត់ហេតុបញ្ជូនរថយន្តនេះទៅផ្ញើរទុកនៅស្នងការខេត្ត ជាបណ្តោះអាសន្ន ដើម្បីអោយម្ចាស់ចូលខ្លួនមកបំពេញកាតព្វកិច្ចសារពើពន្ធ ឯការហែកឯកសារនោះគឺជាការហែកកំណត់ហេតុតម្កល់ប្រាក់ធានាដែលម្ចាស់បានបដិសេធវិញព្រោះករណីដែលឯកសារមិនមានតម្លៃគតិយុត្តិ មន្ត្រីពន្ធដារ
មានសិទ្ធទុកជាមោឃៈ ដើម្បីជៀសវាងការភ័ន្តច្រឡំ ៕
ចំនួនអ្នកទស្សនា
- ថ្ងៃនេះ11731
- ម្សិលមិញ10851
- សប្តាហ៍នេះ78251
- ខែនេះ193401
- ឆ្នាំនេះ193401
- សរុប20635857