បុរសម្នាក់ពុំដឹងជាមានវិបត្តិអ្វីដើរចូលក្រោមកង់រថយន្តកំពុងបើកបណ្ដាលឲ្យស្លាប់យ៉ាងអណោចអធ័ម
12-February-2018 | ដោយ ពលមនសិការ
កណ្ដាល ៖ បុរសម្នាក់ពុំដឹងជាមានវិបត្តិអ្វី បានដើរសំដៅចូលទៅក្រោមកង់រថយន្ត ដែលកំពុងបើកតាមដងផ្លូវបណ្ដាលឲ្យរថយន្តកិនស្លាប់ក្នុងថ្លុកឈាមយ៉ាងអណោចអធ័ម។ ករណីគ្រោះថ្នាក់ចរាចរណ៍ខាងលើនេះបានកើតឡើងនៅវេលាម៉ោង១៨និង២៥នាទី ថ្ងៃទី១២ ខែកុម្ភៈ ឆ្នាំ២០១៨ ត្រង់ចំណុចខាងមុខយានដ្ឋានតារាសំណាង លើផ្លូវលេខ១១៥ ស្ថិតក្នុងភូមិព្រែករាំង សង្កាត់កំពង់សំណាញ់ ក្រុងតាខ្មៅ ។
មន្ត្រីនគរបាលចរាចរណ៍ក្រុងតាខ្មៅបានឲ្យដឹងថា ជនរងគ្រោះស្លាប់បាត់បង់ជីវិតពុំទាន់ស្គាល់អត្តសញ្ញាណ រីឯរថយន្តម៉ាកHINO ធុនធំ ពណ៌ខៀវ ពាក់ស្លាលេខ ក្រុងព្រះសីហនុ3A-1168 អ្នកបើកបរមិនស្គាល់អត្តសញ្ញាណ ទុករថយន្តចោលរត់គេចខ្លួនបាត់ស្រមោល។
ប្រភពដដែលបន្តថា នៅមុនពេលកើតហេត សាក្សីបានឃើញជនរងគ្រោះជាអ្នកថ្មើរជើង បានដើរឆ្លងផ្លូវក្នុងទិសដៅពីលិចទៅកើត លុះមកដល់ចំណុចកើតហេតុខាងលើ ជនរងគ្រោះក៏បានឈប់ ខណៈនោះក៏មានរថយន្តមួយគ្រឿងកំពុងបើកតាមបណ្ដោយផ្លូវក្នុងទិសដៅពីលិចទៅកើត លុះបើកមកដល់ចំណុចកើតហេតុស្រាប់តែជនរងគ្រោះជាអ្នកថ្មើរជើង ក៏បានរត់ចូលទៅក្រោមកង់រថយន្តផ្នែកខាងក្រោយចំហៀងខាងស្តាំ បណ្តាលឲ្យស្លាប់ភ្លាមៗនៅកន្លែងកើតហេតុ រីឯអ្នកបើកបររថយន្តបានទុករថយន្តចោល រួចរត់គេចខ្លួនបាត់ស្រមោលតែម្ដង ។
ក្រោយពីមានហេតុការកើតឡើងសមត្ថកិច្ចជំនាញបានចុះមកកន្លែងកើតហេតុ រួចធ្វើការវាស់វែងកសាងឯកសារដកហូតយកទៅរក្សាទុកនៅអធិការដ្ឋាននគរបាលក្រុងដើម្បីចាត់ការតាមនីតិវិធីច្បាប់។ ចំពោះសាកសពជនរងគ្រោះត្រូវបានរថយន្តសាមុយរបស់ស្នងការដ្ឋាននគរបាលខេត្តកណ្តាល ដឹកយកទៅតម្កល់នៅសាលដាក់សព មន្ទីរពេទ្យបង្អែកជ័យជំនះ ដើម្បីរង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕
ចំនួនអ្នកទស្សនា
- ថ្ងៃនេះ12301
- ម្សិលមិញ10851
- សប្តាហ៍នេះ78821
- ខែនេះ193971
- ឆ្នាំនេះ193971
- សរុប20636427