ភ្នំពេញ​ ៖​ នៅ​ព្រឹក​ថ្ងៃ​ទី​១៣​ ខែកុម្ភៈ​ ឆ្នាំ​២០១៨​នេះ​ នគរបាល​ព្រហ្មទណ្ឌ​កម្រិត​ស្រាល​ នៃ​ស្នងការដ្ឋាន​នគរបាល​រាជធានី​ភ្នំពេញ​ បាន​ធ្វើការ​បង្ហាញមុខ​នៅ​ជនសង្ស័យ​ចំនួន​ ២​នាក់​ ដែល​ជាប់​ពាក់ព័ន្ធ​ទៅ​នឹង​ករណី​លួច​រថយន្ត​ ហើយ​ត្រូវ​បាន​កម្លាំង​សមត្ថកិច្ច​ជំនាញ​ធ្វើការ​ស្រាវជ្រាវ​រហូត​ឈាន​ដល់​ការខ្លួន​ជនសង្ស័យ​ខាងលើ​។​

​លោក​វរសេនីយ៍ឯក​ ប៊ុ​ន​ សត្យា​ នាយការិយាល័យ​ព្រហ្មទណ្ឌ​កម្រិត​ស្រាល​បាន​ឲ្យឹ​ង​ថា​ជនសង្ស័យ​ទី​១-​ឈ្មោះ​ ឈាង​ ឧត្តម​ ហៅ​ដំ​ ភេទ​ប្រុស​ អាយុ​ ២៣​ឆ្នាំ​ ជនជាតិ​ខ្មែរ​ មុខរបរ​ ទិញ​លក់​រថយន្ត​ ស្នាក់​នៅផ្ទះ​លេខ​៣១​អឺ​ ផ្លូវ​លេខ​៧​ សង្កាត់​ដង្កោ​ ខណ្ឌដង្កោ​ និង​ទី​២-​ឈ្មោះ​ ចាន់​ រិ​ទ្ធី​ ហៅ​ពៅ​ ភេទ​ប្រុស​ អាយុ​ ២៦​ឆ្នាំ​ ជនជាតិ​ខ្មែរ​ មុខរបរ​ ជាង​ថតរូប​ចល័ត​ ស្នាក់​នៅ​ភូមិ​អណ្តូង​ស្នាយ​ ឃុំ​ជើងព្រៃ​ ស្រុក​បា​ធា​យ​ ខេត្តកំពង់ចាម​។​

​លោកនាយ​ការិយាល័យ​ព្រហ្មទណ្ឌ​កម្រិត​ស្រាល​ នៃ​ស្នងការដ្ឋាន​នគរបាល​រាជធានី​ភ្នំពេញ​ បាន​បន្ត​ថា​កាលពី​ថ្ងៃ​ទី​១១​ ខែកុម្ភៈ​ ឆ្នាំ​២០១៨​ វេលា​ម៉ោង​ ១៣​និង​៣០​នាទី​រសៀល​ កម្លាំង​សមត្ថកិច្ច​ជំនាញ​របស់​ការិយាល័យ​ព្រហ្មទណ្ឌ​កម្រិត​ស្រាល​ នៃ​ស្នងការដ្ឋាន​នគរបាល​រាជធានី​ភ្នំពេញ​ បាន​ធ្វើការ​ឃាត់ខ្លួន​ជនសង្ស័យ​ចំនួន​ ២​នាក់​ ដែល​ពាក់ព័ន្ធ​ទៅ​នឹង​ករណី​កែ្ល​ង​បន្លំ​ និង​ប្រើប្រាស់​ឯកសារ​សាធារណៈ​ក្លែង​ (​ក្លែង​ស្លាក​លេខ​រថយន្ត​)​ ដែល​ត្រូវ​បាន​ឃាត់ខ្លួន​នៅ​ចំណុច​មុខ​វត្ត​វាល​ស្បូវ​ តាម​បណ្តោយ​ផ្លូវជាតិ​លេខ​១​ សង្កាត់​វាល​ស្បូវ​ ខណ្ឌ​ច្បារ​អំពៅ​ រាជធានី​ភ្នំពេញ​ ដោយ​បាន​ធ្វើការ​ដកហូត​រថយន្ត​ទាំង​ ២​គ្រឿង​ ទី​១-​ម៉ាក​ Toyota​ Highlander​ ពណ៌​ទឹកប្រាក់​ ពាក់​ស្លាក​លេខ​ កណ្តាល​ 2A-3052​ និង​ទី​២-​ម៉ាក​ Toyota​ Camery​ ពណ៌​ស​ ពាក់​ស្លាក​លេខ​ ភ្នំពេញ​ 2AP-1361​ ហើយ​កម្លាំង​សមត្ថកិច្ច​យើង​បាន​ឃាត់​យក​មក​ការិយាល័យ​ព្រហ្មទណ្ឌ​កម្រិត​ស្រាល​ នៃ​ស្នងការដ្ឋាន​នគរបាល​រាជធានី​ភ្នំពេញ​ ដើម្បី​ធ្វើការ​សាកសួរ​ទៅ​លើ​ជនសង្ស័យ​ទាំង​ ២​នាក់​ខាងលើ​។​

​ក្រោយ​ពី​បាន​ធ្វើការ​សាកសួរ​ជនសង្ស័យ​ទាំង​ ២​នាក់​ខាងលើ​រួច​មក​ សមត្ថកិច្ច​ជំនាញកា​រិ​យា​ល​ព្រហ្មទណ្ឌ​កម្រិត​ស្រាល​ បាន​ធ្វើ​លិខិតស្នើ​សុំ​បញ្ជាក់​ពី​ភាព​ត្រឹមត្រូវ​ ឬ​ក្លែងក្លាយ​លើ​ស្លាក​លេខ​រថយន្ត​ ខាងលើ​តាម​សំណើរ​លេខ​ ២២/២០១៨​ ចុះ​ថ្ងៃ​ទី​១២​ ខែកុម្ភៈ​ ឆ្នាំ​២០១៨​ ទៅ​អគ្គនាយកដ្ឋាន​ដឹក​ជញ្ជូន​ ក្រសួង​សាធារណៈការ​ និង​ដឹក​ជញ្ជូន​ ដើម្បី​ធ្វើការ​ត្រួតពិនិត្យ​។​

​នៅ​ពេល​ដែល​សមត្ថកិច្ច​ជំនាញ​បាន​ត្រួតពិនិត្យ​រក​ឃើញ​ថា​ រថយន្ត​ដែល​ពាក់​ស្លាក​លេខ​ កណ្តាល​ 2A-3052​ គឺជា​ស្លាក​លេខ​របស់​រថយន្ត​ម៉ាក​ Hyundai​ Mini​ Bus​ ពណ៌​ក្រហម​ក្រ​ម៉ៅ​ ដែល​មាន​លេខ​តួ​ KMJFD37FPUS159140​ លេខ​ម៉ា​ស៉ី​ន​ D4BAT156105​ មិនមែន​ជា​ស្លាក​លេខ​របស់​រថយន្ត​ម៉ាក​ Toyota​ Highlander​ ពណ៌​ទឹកប្រាក់​ លេខ​តួ​ JTECD21A010001507​ លេខ​ម៉ាស៊ីន​ 2A27274044​ លតា​ប​ត្រ​លេខ​ 05-08-7897​ទេ​។​ ចំណែកឯ​ស្លាក​លេខ​ ភ្នំពេញ​ 2AP-1361​ ជា​ស្លាក​លេខ​របស់​រថយន្ត​ម៉ាក​ Toyota​ ពណ៌​ក្រហម​ លេខ​តួ​ 5TDZA22CO4S195306​ លេខ​ម៉ា​ស៉ី​ន​ 3MZ4297520​ មិនមែន​ជា​ស្លាក​លេខ​របស់​រថយន្ត​ម៉ាក​ Toyota​ Camry​ ពណ៌​ស​ លេខ​តួ​ 4T-1BE32KX2U09140​ លេខ​ម៉ាស៊ីន​ 2AZ7237517​ លតា​ប​ត្រ័​ល​ខ​ 10-01-8995​ទេ​។​

​ជនសង្ស័យ​ពិតជា​បាន​ប្រ​អំពើ​ ក្លែងបន្លំ​ តាម​មាត្រា​៦២៦​ ៦២៧​ ក្រមព្រហ្មទណ្ឌ​(​ផ្តន្ទាទោស​ពី​១​ឆ្នាំ​ដល់​៣​ឆ្នាំ​និង​ពិន័យ​ពី​២​លាន​រៀល​ ទៅ​៦​លាន​រៀល​)​ និង​មាត្រា​ ៧៧​ នៃ​ច្បាប់​ស្តី​ពី​ចរាចរ​ណ៏​ផ្លូវគោក​(​ផ្តន្ទាទោស​ ពី​២​ឆ្នាំ​ ទៅ​៥​ឆ្នាំ​។​

​ក្រោយ​ពី​ធ្វើការ​បង្ហាញមុខ​ជនសង្ស័យ​ទាំង​ ២​នាក់​ខាងលើ​រួច​មក​ កម្លាំង​សមត្ថកិច្ច​ជំនាញ​ការិយាល័យ​ព្រហ្មទណ្ឌ​កម្រិត​ស្រាល​ បាន​បញ្ជូន​ខ្លួន​ទៅ​កាន់​សាលាដំបូង​រាជធានី​ភ្នំពេញ​ ដើម្បី​ចាត់ការ​បន្ត​តម​នីតិវិធី​ច្បាប់​៕
​