បន្ទាយ​មាន​ជ័យ​ ៖​ ខេត្តបន្ទាយមានជ័យ​មាន​ច្រក​តំបន់​ព្រំដែន​២​កន្លែង​ដែល​ឈ្មួញ​ថៃ​ទិញ​កសិផល​មាន​ដំឡូង​មី​ស្ងួត​នាំ​ចេញ​១​ថ្ងៃ​មធ្យម​២៥០​គ្រឿង​ ប្រមាណ​ជាង​៦​ពាន់​តោន​។​

ជាក់ស្តែង​នៅ​ថ្ងៃ​ទី​២៧​ ខែកុម្ភៈ​ ឆ្នាំ​២០១៨​ នៅ​ច្រក​តំបន់​ព្រំដែន​ម៉ា​ឡៃ​ឃើញ​មាន​រថយន្ត​ថៃ​ដឹក​ដំឡូង​មី​ស្ងួត​នាំ​ចេញ​ជា​ច្រើន​គ្រឿង​ដែល​មានការ​ត្រួតពិនិត្យ​ពី​មន្ត្រី​ជំនាញ​នៅ​ច្រក​នាំ​ចេញ​ ឃើញ​រថយន្ត​ថៃ​ដឹក​ដំឡូង​មី​ស្ងួត​នៅ​ដឹក​ចេញពី​ស្តង់​តាម​ព្រំ​ដែល​ដល់​ច្រក​ទ្វារ​ឃើញ​អ្នកបើកបរ​រថយន្ត​យក​តង់​បិត​បាំង​ជិត​មិន​អោយ​ហុយ​។​

មន្ត្រី​គយ​និង​រដ្ឋាករ​ច្រក​តំបន់​ព្រំដែន​ម៉ា​ឡៃ​បាន​ប្រាប់​ថា​ ច្រក​ទ្វារ​ព្រំដែន​ម៉ា​ឡៃ​គឺ​ទំនិញ​កម្ពុជា​ដែល​នាំ​ចេញ​ទៅ​ប្រទេស​ថៃ​មាននៅ​អំឡុង​ខែកុម្ភៈ​ ឆ្នាំ​២០១៨​នេះ​ មាន​ដូច​ជា​ដំឡូង​មី​ស្ងួត​១​ថ្ងៃ​ប្រមាណ​ជាង​១០០​គ្រឿង​ និង​មាន​រថយន្ត​ដឹក​អេ​ត​ចាយ​តែ​ទំនិញ​ដែល​នាំ​ចូល​មក​កម្ពុជា​មាន​គ្រឿងសំណង់​គ្រឿង​បរិភោគ​សម្រាប់​ប្រជាពលរដ្ឋ​ជាប់​ជាយ​ដែន​ទិញ​ប្រើប្រាស់​។​

ដោយឡែក​លោក​ ស​ សំណាង​ ប្រធាន​គណៈកម្មការ​ច្រក​ទ្វារ​តំបន់​ព្រំដែន​បឹង​ត្រកួន​បាន​បញ្ជាក់​ថា​ទំនិញ​កម្ពុជា​ដែល​នាំ​ចេញ​ទៅ​ថៃ​មាន​ដំឡូង​មី​ស្ងួត​ក្នុង​១​ថ្ងៃ​ប្រមាណ​ជាង​១៥០​គ្រឿង​ ក្នុង​១​គ្រឿង​ដឹក​បាន​ប្រមាណ​ជាង​២៥​តោន​និង​រថយន្ត​ដឹក​អេ​ត​ចាយ​ហើយ​ទំនិញ​ថៃ​នាំ​ចូល​មាន​គ្រឿងសំណង់​និង​គ្រឿង​បរិភោគ​និង​ទំនិញ​ផ្សេងៗ​ទៀត​។​

តាម​ព័ត៌មាន​ដឹង​ពី​អ្នក​រត់​ម៉ូតូឌុប​នៅ​ច្រក​ទ្វារ​តំបន់​ម៉ា​ឡៃ​បាន​ប្រាប់​ថា​នៅ​រដូវ​នេះ​រថយន្ត​ដឹក​ដំឡូង​មី​ស្ងួត​នាំ​ចេញ​ទៅ​ថៃ​១​ថ្ងៃ​មិន​តិច​ជាង​២៥០​គ្រឿង​ឡើយ​ដែល​ឈ្មួញ​ថៃ​ទិញ​ដំឡូង​មី​ស្ងួត​ក្នុង​១​គីឡូក្រាម​តម្លៃ​៦០០​រៀល​ស្មើ​១​បាត​កន្លះ​គឺ​តម្លៃ​ដំឡូង​មី​អំឡុង​ខែកុម្ភៈ​ ឆ្នាំ​២០១៨​នេះ​ តម្លៃ​ថ្លៃ​ជាង​ឆ្នាំ​២០១៧​កន្លង​ទៅ​ ៕
​