កម្មករ កម្មការិនីចំនួន៣៥នាក់ បានរងរបួសធ្ងន់ស្រាលក្នុងករណីគ្រោះថ្នាក់ចរាចរណ៍រថយន្ត៥គ្រឿងបុកបន្តកន្ទុយគ្នា
06-March-2018 | ដោយ ពលមនសិការ
ព្រះសីហនុ ៖ យ៉ាងហោចណាស់កម្មករ កម្មការិនីចំនួន៣៥នាក់ បានរងរបួសធ្ងន់ស្រាលក្នុងករណីគ្រោះថ្នាក់ចរាចរណ៍រថយន្ត៥គ្រឿងបុកបន្តកន្ទុយគ្នា ដែលមានទិសដៅពីភ្នំពេញ ឆ្ពោះមក ខេត្តព្រះសីហនុ ក្នុងនោះ រថយន្តដឹកកម្មករចំនួន ០៤គ្រឿង និងរថយន្តដឹកទឹកកកមួយគ្រឿង។ ហេតុការណ៍គ្រោះថ្នាក់នេះបានកើតឡើងនៅព្រឹកថ្ងៃអង្គារ៍ ៥រោច ខែផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី០៦ ខែមីនា ឆ្នាំ២០១៨ លើផ្លូវជាតិលេខ៤ ចន្លោះគីឡូម៉ែត្រ ២១០-២១១ ស្ថិតនៅក្នុងភូមិពូធឿង ឃុំបិតត្រាង ស្រុកព្រៃនប់ ខេត្តព្រះសីហនុ។
លោកឧត្តមសេនីយ៍ត្រី អ៊ី សុខា ស្នងការរងខេត្តបានឱ្យដឹងថាមូលហេតុរថយន្តម៉ាក HYUNDAI ពណ៌ស ពាក់ស្លាកលេខ ព្រះសីហនុ 3A-6175 ដឹកទឹកកកមានទិសដៅពីខេត្តកំពត ឆ្ពោះមកខេត្តព្រះសីហនុ អ្នកបើកបរមិនស្គាល់អត្តសញ្ញាណ។ មុនពេលកើតហេតុរថយន្តដឹកទឹកកក អស់ប្រេងហ្វ្រាំងបានឈប់ចាក់ប្រេងហ្វ្រាំង នៅចំណុចស្មាច់ដែង រួចបន្តដំណើរទៅមុខ លុះដល់ចំណុចកើតហេតុ រថយន្តដឹកទឹកកក បម្រុងឡើងវ៉ាជែងរថយន្តដឹកកម្មករ ពេលឃើញឧបសគ្គមកពីខាងមុខក៏បានគេចចូលមកវិញបុកពីខាងក្រោយរថយន្ត មួយគ្រឿងម៉ាក SSANGYONG ពណ៌ស ពាក់ស្លាកលេខ ភ្នំពេញ 2AA-7657 បុកបន្តរថយន្តទី២ ម៉ាក SSANGYONG ពណ៌ស ពាក់ស្លាកលេខ ភ្នំពេញ2M-6306 បុកបន្តរថយន្តទី៣ ម៉ាក SSANGYONG ពណ៌ លឿង ពាក់ស្លាកលេខ ព្រះសីហនុ 2A-5786 បុកបន្តរថយន្តទី៤ ម៉ាក SSANGYONG ពណ៌ ខៀវ ពាក់ស្លាក លេខព្រះសីហនុ 2A-4594។
គ្រោះថ្នាក់នេះបណ្ដាលឲ្យរងរបួសមនុស្សចំនួន ៣៥នាក់ស្រី ៣១នាក់, រងរបួសស្រាលចំនួន ៣២នាក់, ស្រី៣០នាក់ បានបញ្ជូនទៅសង្គ្រោះនៅគ្លីនិក លិ គឹមឌី វាលរេញចំនួន ១២នាក់ស្រី បន្ទប់ព្យាបាលគីយ៉ាដេត ២នាក់ស្រី ១នាក់ មន្ទីរពេទ្យបង្អែកខេត្តព្រះសីហនុ ១៨នាក់ស្រី ១៧នាក់។
រងរបួសធ្ងន់បាក់ជើងចំនួន ៣នាក់ស្រី ០១នាក់ បានបញ្ជូនទៅសង្គ្រោះនៅគ្លីនិកសេតេចំនួន ០១នាក់ស្រី និងមន្ទីរពេទ្យបង្អែកខេត្តព្រះសីហនុចំនួន ០២នាក់ប្រុស។ រីឯវត្ថតាងរថយន្តចំនួន ០៥គ្រឿងបានយកមករក្សាទុកនៅការិយាល័យនគរបាលចរាចរណ៍ផ្លូវគោក ៕
ចំនួនអ្នកទស្សនា
- ថ្ងៃនេះ10821
- ម្សិលមិញ10851
- សប្តាហ៍នេះ77341
- ខែនេះ192491
- ឆ្នាំនេះ192491
- សរុប20634947