នគរបាលបង្ក្រាបឃាត់ខ្លួនអតីតបុគ្គលិកកាស៊ីណូម្នាក់ករណីការជួញដូរខុសច្បាប់វេជ្ជសាស្ត្រប្រភេទថ្នាំពេទ្យព្យាបាលមនុស្សរឺសត្វយ៉ាងសន្ធឹកសន្ធាប់ត្រូវបានឧក្រិដ្ឋជនគ្រឿងញៀនកែច្នៃបម្លែងទៅជាគ្រឿងញៀន
19-March-2018 | ដោយ ពលមនសិការ
បន្ទាយមានជ័យ ៖ អតីតបុគ្គលិកកាស៊ីណូម្នាក់ដែលកម្លាំងនគរបាលរកឃើញករណីជួញដូរខុសច្បាប់យ៉ាងសន្ធឹកសន្ធាប់នូវវេជ្ជសាស្ត្រជាប្រភេទថ្នាំពេទ្យវត្ថុរាវច្រកដបមានឈ្មោះ(កេតាមីន)វាមានមុខងារសម្រាប់ព្យាបាលមនុស្ស ឬសត្វបម្រើទៅលើការវះកាត់បែរជាឧក្រិដ្ឋជនគ្រឿងញៀនយកទៅកែច្នៃបំលែងទៅជាគ្រឿងញៀនដើម្បីលក់ចែកចាយនៅក្រុងប៉ោយប៉ែតរងការបង្ក្រាបចាប់ឃាត់ខ្លួនកាលពីថ្ងៃចុងកន្លងទៅថ្មីៗនេះ ដោយចោទប្រកាន់ពីបទជួញដូរនិងដឹកជញ្ជូនដោយខុសច្បាប់នូវសារធាតុញៀន ហើយជនសង្ស័យនៅព្រឹកថ្ងៃទី១៩ ខែមីនា ឆ្នាំ២០១៨ ត្រូវបាននគរបាលការិយាល័យជំនាញនៃស្នងការដ្ឋាននគរបាលខេត្តបន្ទាយមានជ័យកសាងសំណុំរឿងចាប់បញ្ជូនទៅកាន់តុលាការដើម្បីចាត់ការតាមផ្លូវច្បាប់នោះហើយ។
ជនសង្ស័យមានឈ្មោះ វុធ ស្រីម៉ិច ភេទស្រី អាយុ២៧ឆ្នាំ អតីតបុគ្គលិកកាស៊ីណូនៅក្រុងប៉ោយប៉ែត បច្ចុប្បន្នគ្មានមុខរបរពិតប្រាកដ រស់នៅភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែតខេត្ត បន្ទាយមានជ័យ ត្រូវបានកម្លាំងនគរបាលក្រុងប៉ោយប៉ែត សហការនិងកម្លាំងនគរបាលការិយាល័យប្រឆាំងគ្រឿងញៀនខេត្តនិងកម្លាំងមន្ទីរប្រឆាំងគ្រឿងញៀន(BLO) បង្ក្រាបចាប់ខ្លួនកាលពីថ្ងៃចុងសប្តាហ៍កន្លងទៅថ្មីៗនេះ ថ្ងៃទី១៧ ខែមីនា នៅចំណុចខាងមុចហាងគុយទាវកាស៊ីណូព្រីនសេស ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ក្រោមការដឹកកម្លាំងបង្ក្រាបផ្ទាល់ពីលោកឧត្តមសេនីយ៍ត្រី ចាប សុផាប្ញទ្ធិ ស្នងការរងទទួលផែនប្រឆាំងបទល្មើសនៃស្នងការដ្ឋាននគរបាលខេត្តបន្ទាយមានជ័យ ក្រោមការអនុវត្តតាមបទបញ្ជាផ្ទាល់ពីស្នងការនគរបាលខេត្តបន្ទាយមានជ័យលោកឧត្តមសេនីយ៍ទោ អាត់ ខែម និងមានការសម្របសម្រួលនីតិវិធី ពីព្រះរាជអាជ្ញាអមសាលាដំបូងខេត្តបន្ទាយមានជ័យ លោក មាស ច័ន្ទពិសិដ្ឋ។
លោកវរសេនីយ៍ត្រី ង៉េង សុខជា នាយការិយាល័យនគរបាលប្រឆាំងគ្រឿងញៀនខេត្ត បានប្រាប់ឱ្យដឹងថា ការបង្ក្រាបចាប់ខ្លួនជនសង្ស័យក្រោយពីកម្លាំងនគរបាលជំនាញបានស្រាវជ្រាវស៊ើបអង្កេតចំណាយពេលជិត១សប្តាហ៍រកឃើញថាមានការជួញដូរសារធាតុញៀនខុសច្បាប់តាមរយៈវេជ្ជសាស្ត្រថ្នាំពេទ្យយកទៅប្រើប្រាស់ក្នុងក្លឹបរាំកម្សាន្តឌូស្កូចំណុចកាស៊ីណូក្រុងប៉ោយប៉ែតហើយបន្ទាប់មកកម្លាំងនគរបាលជំនាញក៏បានកំណត់មុខសញ្ញាជនសង្ស័យទើបឈានដល់ការចាប់ខ្លួនជនសង្ស័យកំពុងជិះម៉ូតូ១គ្រឿងធ្វើសកម្មភាពជាក់ស្តែង។
លោកនាយការិយាល័យប្រាប់ឱ្យដឹងទៀតថា សមត្ថកិច្ចឆែកឆេរត្រួតពិនិត្យនៅក្នុងកែបម៉ូតូរកឃើញថ្នាំពេទ្យវេជ្ជសាស្ត្រវត្ថុរាវច្រកដបឈ្មោះ(កេតាមីន)ចំនួន២ប្រអប់ធំស្មើនិង១៥០ដបមានទម្ងន់ទឹកថ្នាំ១៥០០ក្រាម។
លោកនាយការិយាល័យបញ្ជាក់ឱ្យដឹងទៀតថាថ្នាំកេតាមីនត្រូវគេចាត់ទុកជាគ្រឿងញៀនដែលវាមានឥទ្ធិពលប្រហាក់ប្រហែលនិងថ្នាំញៀនអ៊ិចស្តាស៊ី ធ្វើឱ្យមនុស្សអ្នកប្រើប្រាស់ រំជើបរំជួលអារម្មណ៍ សប្បាយមិនដឹងខ្លួន។ ប្រភេទថ្នាំកេតាមីនគេប្រើប្រាស់វាស្របច្បាប់តែក្នុងមន្ទីរពេទ្យ ឬកន្លែងវះកាត់អ្នកជំងឺ និងអ្នករងរបួស ទៅតាមវេជ្ជបញ្ជា ព្យាបាលមនុស្សឬសត្វប៉ុណ្ណោះ។ ប៉ុន្តែយោងទៅលើឥទ្ធិពលពីវាផ្សេងទៀត ក្រៅក្បួនវេជ្ជសាស្ត្រ ពួកឧក្រិដ្ឋជនគ្រឿងញៀនបានកែច្នៃបម្លែងវាជាគ្រាប់សម្រាប់លេប ឬជាប្រភេទម្សៅ សម្រាប់ហិត រឺលាយទឹកផឹកជំនួសការប្រើប្រាស់គ្រឿងញៀន ៕
ចំនួនអ្នកទស្សនា
- ថ្ងៃនេះ7481
- ម្សិលមិញ10851
- សប្តាហ៍នេះ74001
- ខែនេះ189151
- ឆ្នាំនេះ189151
- សរុប20631607