ផ្ទះ៤ខ្នងត្រូវបានប្រគល់ជូនក្រុមគ្រួសារអតីតយុទ្ធជននិងយោធិនពិកា
19-March-2018 | ដោយ ពលមនសិការ
ព្រៃវែង ៖ ផ្ទះចំនួន ៤ខ្នង ក្នុង ស្រុកស្វាយអន្ទរ ខេត្តព្រៃវែង ដែលជាអំណោយដ៏ថ្លៃថ្លា របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានប្រគល់ជូនអតីតយុទ្ធជន និងយោធិនពិកា នាព្រឹកថ្ងៃច័ន្ទ ៣កើត ខែចេត្រ ឆ្នាំរកា នព្វស័ក ព.ស២៥៦១ត្រូវនិង ថ្ងៃទី១៩ ខែមីនា ឆ្នាំ២០១៨ ក្រោមអធិតីយភាព លោកឧត្តមសេនីយ៍ទោ ស្រេង ជា ស្នងការ និងជាប្រធានសមាគមអតីតយុទ្ធជនកម្ពុជាខេត្ត តំណាងដ៏ខ្ពង់ខ្ពស់ ឯកឧត្តម ជា សុមេធី អភិបាល នៃគណៈអភិបាលខេត្តព្រៃវែង និងជាប្រធានកិត្តិយសសមាគមអតីតយុទ្ធកម្ពុជាខេត្តព្រៃវែង។
ពិធីនេះមានការអញ្ជើញចូលរួមពីសំណាក់លោកឧត្តមសេនីយ៍ត្រី ចាន់ ណារិទ្ធ ស្នងការរងនគរបាលខេត្ត និងប្រតិភូអមដំណើរលោក សុខ សាញ់ ប្រធានការិយាល័យស្រុក តំណាងលោក អភិបាល ស្រុក ស្វាយអន្ទរ លោកវរះសេនីយ៍ឯក អ៊ុង ផាន អធិការនគរបាលស្រុក និងជាប្រធានស.អ.ក ស្រុក លោក មេឃុំ ក្រុមប្រឹក្សាឃុំ និង លោកមេភូមិ ព្រមទាំងប្រជាពលរដ្ឋ។
ឧត្តមសេនីយ៍ ស្រេង ជា ស្នងការ និងជាប្រធានសមាគមអតីតយុទ្ធជនកម្ពុជាខេត្ត តំណាងដ៏ខ្ពង់ខ្ពស់ ឯកឧត្តម ជា សុមេធី អភិបាល នៃគណៈអភិបាលខេត្ត បានថ្លែងថា ផ្ទះជាអំណោយរបស់សម្តេចតេជោ ហ៊ុន សែន បានក្លាយ ជាលំនៅឋានដ៏កក់ក្តៅសម្រាប់អតីតយុទ្ធជន និងយោធិនពិកា។ ការសង់លំនៅឋាននេះ គឺបានបង្ហាញពីការ ខិតខំយកចិត្តទុកដាក់របស់សម្តេចតេជោ ហ៊ុន សែន ចំពោះសុខទុក្ខអតីតយុទ្ធជន និងយោធិនពិកាដែលសុទ្ធសឹងជាអ្នកមានគុណបំណាច់ ចំពោះជាតិ។
អតីតយុទ្ធជន ទាំង៤គ្រួសារ បានគោរពថ្លែងអំណរគុណដល់សម្តេចតេជោ ហ៊ុន សែន និងសម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុន សែន ដែលជានិច្ចកាលតែងតែគិតគូរ និងយកចិត្តទុកដាក់ទៅលើសុខទុក្ខ និងជីវភាព របស់ពួកគាត់។
ឧត្តមសេនីយ៍ ស្នងការ និងជាប្រធានសមាគមអតីតយុទ្ធជនកម្ពុជាខេត្ត បានផ្តាំផ្ញើរ ដល់ពុកម៉ែបងប្អូន ទាំងអស់ បន្តអប់រំកូនចៅ នៅឲ្យឆ្ងាយពីគ្រឿងញៀន គោរពច្បាប់ចរាចរណ៍ ឲ្យបានគ្រប់ៗគ្នា និងបង្ការគ្រោះ អគ្គីភ័យ នឹងតម្រូវឲ្យមានបំពង់ខ្យល់ហ្គាសពន្លត់អគ្គីភ័យនៅគ្រប់ផ្ទះត្រូវបូមទឹកដាកពាង ឬអាង ឲ្យបានគ្រប់គ្រាន់ជៀសវាងហេតុការណ៍អាក្រក់ណាមួយកើតឡើង ជាយថាហេតុ។ ១.នៅភូមិព្រៃខ្លាទី២ ឃុំព្រៃខ្លា ស្រុកស្វាយអន្ទរ ម្ចាស់ឈ្មោះ តាត សេង ភេទប្រុស អាយុ ៤៨ឆ្នាំ ២.នៅភូមិ ព្រៃតាណាន់ ឃុំជ្រៃ ស្រុកស្វាយអន្ទរ ម្ចាស់ឈ្មោះ យ៉ែម វ៉េត ភេទប្រុស អាយុ ៥៧ឆ្នាំ
៣.នៅភូមិព្រៃទទឹង ឃុំទឹកថ្លា ស្រុកស្វាយអន្ទរ ម្ចាស់ ឈ្មោះ រុន រិត ភេទប្រុស អាយុ ៤៧ឆ្នាំ ៤.នៅភូមិតារាមកើត ឃុំអង្គរទ្រេត ស្រុកស្វាយអន្ទរ ម្ចាស់ ឈ្មោះ ឈឹម សាវ៉ាន់ ភេទប្រុស អាយុ ៥១ឆ្នាំ ។ អំណោយក្នុង ០១គ្រួសារទទួលបានរួមមាន អង្គរ ៥០គីឡូ,មី ០១កេស, ត្រីខ ០១យួរ, ប៊ីចេង ០១កញ្ចប់, មុង ០១,ភួយ ០១,កន្ទេល ០១ រួមនិងថវិកា ១០០,០០០រៀល ។
ដោយឡែកផ្ទះនៅឃុំ អង្គរទ្រេត ដែលពុំទាន់មានភ្លើងអគ្គីសនីប្រើប្រាស់នៅឡើយ ឧត្តមសេនីយ៍ ស្នងការ បានឧបត្ថម្ភថវិកាចំនួន ៤០០,០០០រៀលបន្ថែមដើម្បីតភ្លើងប្រើប្រាស់ ។ ប្រជាពលរដ្ឋជិតខាងចូលរួមចំនួន ៨៦នាក់ ដោយក្នុងម្នាក់ទទួលបានថវិកាចំនួន ១០,០០០រៀល ។ សរុបថវិការ ក្នុងការចំណាយរួម ១,៧៥០,០០០រៀល ៕
ចំនួនអ្នកទស្សនា
- ថ្ងៃនេះ8451
- ម្សិលមិញ10851
- សប្តាហ៍នេះ74971
- ខែនេះ190121
- ឆ្នាំនេះ190121
- សរុប20632577