សង្ស័យឆ្លងចរន្តអគ្គិសនី ឆាបឆេះផ្ទះប្រជាពលរដ្ឋអស់៦ខ្នង និងស្លាប់មនុស្សម្នាក់
30-April-2018 | ដោយ ពលមនសិការ
បាត់ដំបង ៖ លំនៅដ្ឋានរបស់ប្រជាពលរដ្ឋចំនួន៦ខ្នង ដែលបានសង់ឡើងលក្ខណៈជាផ្ទះល្វែងត្រូវបានអគ្គិភ័យឆាបឆេះគ្មានសល់ ព្រមទាំងបានសម្លាប់មនុស្សចាស់ជរាម្នាក់ផងខណៈដែលប្រជាពលរដ្ឋទាំងនោះកំពុងសម្រាកយ៉ាងលង់លក់នៅក្នុងដំណេកយ៉ាងសុខស្រួលទៅហើយនោះ។
ហេតុការណ៍នេះបានកើតឡើងនៅវេលាម៉ោង១០និង៣០ នាទីយប់ ថ្ងៃទី២៩ ខែមេសា ឆ្នាំ២០១៨ នៅចំណុចក្រុមទី២៧ ភូមិ១៣មករា សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង ដោយមានអគ្គិភ័យ មួយបានកើតឡើងទៅលើផ្ទះល្វែងដែលសង់ជាប់ៗគ្នាបណ្តាលឲ្យឆេះផ្ទះចំនួន ៦ ខ្នង ទាំងស្រុងតែម្តង។
បើតាមប្រភពដែលនៅទីនោះបានលើកឡើងថា នៅក្នុងពេលដែលពួកគាត់កំពុងសម្រាកទៅហើយនោះក៏ស្រាប់តែមានសម្លេងនៃការឆាបឆេះរបស់អណ្តាតភ្លើងយ៉ាងសន្ធោសន្ធៅតែម្តង ទើបធ្វើអោយមានការភ្ញាល់ផ្អើល ដោយម្នាក់ៗគ្មានបានយកអ្វីចេញពីផ្ទះអោយបានច្រើននោះទេ ដោយសារតែភាពស្លន់ស្លោ។
ខណៈដែលអណ្តាតភ្លើងឡើងពេញក្រមុំនោះ ទើបកម្លាំងបង្ការ ពន្លត់អគ្គិភ័យ នៃស្នងការដ្ឋាននគរបាលខេត្តបាត់ដំបងបានចេញជួយអន្តរាគមន៍ដើម្បីជួយបាញ់ទប់ស្កាត់នូវការរាលដាលទៅលើផ្ទះដទៃទៀត ព្រោះផ្ទះនៅក្នុងតំបន់នេះមានលក្ខណៈជាផ្ទះល្វែងជាច្រើនខ្នងផងដែរ។
បើតាមការអះអាងពីលោកវរសេនីយ៍ឯក គឹម ប៊ុនធឿននាយការិយាល័យបង្ការ ពន្លត់អគ្គិភ័យបានអោយដឹងថាការឆាបឆេះនេះមានសភាពលឿនបំផុតដោយលោក បានប្រើប្រាស់ទឹកចំនួន១២ រថយន្តទើបអាចទប់ស្កាត់បានដោយបញ្ចប់នៅម៉ោង២និង៣០នាទី រំលងអាធ្រាត្រ។
នៅក្នុងហេតុការណ៍នេះដែរគេសង្គេតឃើញថាមានស្ត្រីវ័យ៦០ឆ្នាំម្នាក់ បានស្លាប់នៅក្នុងភ្នក់ភ្លើងនេះរហូតខ្លោចក្រៀមឯផ្ទះដែលរងគ្រោះមានដូចជា ១. ផ្ទះ ១ខ្នង ធ្វើអំពីឈើប្រក់ស័ង្កសី ទំហំ ៤ម៉ែត្រគុណ១២ម៉ែត្រ របស់ឈ្មោះ លី ស៊ីញ ភេទប្រុស អាយុ ២៥ឆ្នាំ មុខរបរ ធ្វើធៀបការ(ឆេះអស់ទាំងស្រុង) ២.ផ្ទះ ០១ខ្នង ធ្វើអំពីឈើប្រក់ស័ង្កសី ទំហំ ៤ម៉ែត្រគុណ១២ ម៉ែត្រ របស់ឈ្មោះ ម៉ុង រិទ្ធី ភេទប្រុស អាយុ ២៩ ឆ្នាំ មុខរបរ ពិធីការ (ឆេះអស់ទាំងស្រុង) ៣. ផ្ទះ ០១ ខ្នង ធ្វើអំពីឈើប្រក់ស័ង្កសី ទំហំ ៤ម៉ែត្រគុណ២០ម៉ែត្រ របស់ឈ្មោះ ណរ ទី ភេទប្រុស អាយុ ៣៧ ឆ្នាំ មុខរបរ ចិញ្ចឹមត្រី (ឆេះអស់ទាំងស្រុង) ៤. ផ្ទះ ០១ ខ្នង ធ្វើអំពីឈើប្រក់ស័ង្កសីទំហំ ៤ម៉ែត្រគុណ២២ម៉ែត្ររបស់ឈ្មោះ ថា ផល្លី ភេទប្រុស អាយុ ៥៨ ឆ្នាំ មុខរបរសន្តិសុខ។
បើទោះបីជាមានពាក្យមួយចំនួនថា ការឆាបឆេះនេះគឺបណ្តាលមកពីការឆ្លងចរន្តអគ្គិសនីក៏ដោយក៏សមត្ថកិច្ចនៅមិនទាន់អះអាងថា បណ្តាលមកពីមូលហេតុអ្វី ហើយចេញពីផ្ទះណាមួយនោះនៅឡើយដែរដោយព្រឹកនេះកម្លាំងកំពុងចុះសិក្សាស្រាវជ្រាវ៕
ចំនួនអ្នកទស្សនា
- ថ្ងៃនេះ571
- ម្សិលមិញ10851
- សប្តាហ៍នេះ67091
- ខែនេះ182241
- ឆ្នាំនេះ182241
- សរុប20624697