នគរបាលស្រុកកោះធំចុះធ្វើការពិនិត្យសាកសពបុរសម្នាក់ស្លាប់ក្នុងព្រៃដោយមានសភាពស្អុយរលួយ
30-April-2018 | ដោយ ពលមនសិការ
កណ្ដាល ៖ នគរបាលជំនាញផ្នែកកោសល្យវិច្ច័យស្រុក សហការជាមួយនគរបាលប៉ុស្ដិ៍រដ្ឋបាលលើកដែកចុះធ្វើការពិនិត្យសាកសពបុរសម្នាក់ស្លាប់ក្នុងព្រៃដោយមានសភាពស្អុយរលួយ កាលពីវេលាម៉ោង១៧និង៣០នាទី ថ្ងៃទី២៨ ខែមេសា ឆ្នាំ២០១៨ ត្រង់ចំណុចព្រែកជីក ស្ថិតនៅក្នុងភូមិព្រែកខ្នាច ឃុំលើកដែក ស្រុកកោះធំ ខេត្តកណ្តាល ។
មន្ដ្រីនគរបាលផ្នែកកោសល្យវិច្ច័យស្រុកកោះធំបានឲ្យដឹងថា សាកសពជនរងគ្រោះមានឈ្មោះ រ៉ា ហ៊ួយ ភេទប្រុស អាយុ៣១ឆ្នាំ ជនជាតិខ្មែរ(ជាជនពិការជើងខាងឆ្វេង)មានទីលំនៅភូមិព្រែកខ្នាច ឃុំលើកដែក ស្រុកកោះធំ ខេត្តកណ្តាល។
ប្រភពដដែលបន្ដថា តាមការបំភ្លឺរបស់ឈ្មោះ ហ៊ី ពៅ ត្រូវជាបងថ្លៃនិងឈ្មោះ ច្រឹក ញ៉ាញ ត្រូវជាម្តាយមីង របស់ជនរងគ្រោះបានឲ្យដឹងថា ជនរងគ្រោះជាមនុស្សញៀនស្រាផឹកជាប្រចាំ ខណៈដែលជនរងគ្រោះស្រវឹងម្ដងៗ ជួនកាលដើរគ្មានគោលដៅនោះទេ ពោលគឺស្រវឹងនៅទីណា ដេកនៅទីនោះ ។ លុះនៅថ្ងៃទី២៨ ខែមេសា ឆ្នាំ២០១៨ វេលាម៉ោងប្រមាណ១៧មានប្រជាពលរដ្ឋម្នាក់បានដើរគោខណៈមកដល់ត្រង់ចំណុចកើតហេតុខាងលើ ក៏ប្រទះឃើញសាកសពជនរងគ្រោះក្នុងសភាពស្អុយរលួយ ក៏ធ្វើឲ្យមានការភ្ញាក់ផ្អើលដល់និងរាយការណ៍ជូនសមត្ថកិច្ចដើម្បីចុះមកធ្វើការពិនិត្យ។ ក្រោយពីពិនិត្យរួច សមត្ថកិច្ចជំនាញសន្និដ្ឋានថា ជនរងគ្រោះអាចស្លាប់ដោយសារផឹកស្រាស្រវឹង ដើរវង្វេងចូលក្នងព្រៃ បណ្ដាលខ្យល់គរស្លាប់។ ចំណែកឯសាកសពត្រូវបានសមត្ថកិច្ចប្រគល់ឲ្យក្រុមគ្រួសារ យកទៅចាត់ចែងធ្វើបុណ្យតាមប្រពៃណី ៕
ចំនួនអ្នកទស្សនា
- ថ្ងៃនេះ2351
- ម្សិលមិញ10851
- សប្តាហ៍នេះ68871
- ខែនេះ184021
- ឆ្នាំនេះ184021
- សរុប20626477