អាជ្ញាធរជាតិប្រយុទ្ធប្រឆាំងគ្រឿងញៀន ផ្សព្វផ្សាយពីគ្រោះថ្នាក់នៃគ្រឿងញៀន ដល់សិស្សានុសិស្សសាលាគរុកោសល្យខេត្តកំពង់ចាម
16-May-2018 | ដោយ ពលមនសិការ
កំពង់ចាម ៖ នាព្រឹកថ្ងៃពុធ ២កើតខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៦ ខែឧសភា ឆ្នាំ២០១៨ ក្រោមកិច្ចសហការរវាងក្រសួងអប់រំ យុវជន និងកីឡា និងអាជ្ញាធរជាតិប្រយុទ្ធប្រឆាំងគ្រឿងញៀនលោកគ្រូ អ្នកគ្រូ គណៈគ្រប់គ្រងសាលាគរុសិស្សចំនួន២០៥នាក់ទទួលបានចំណេះដឹងពីបញ្ហាគ្រឿងញៀនពីវគ្គផ្សព្វផ្សាយស្តីការការផ្សព្វផ្សាយពីគ្រោះថ្នាក់នៃគ្រឿងញៀនក្រោមអធិបតីភាពលោកជំទាវ សឿ សុជាតា អនុរដ្ឋលេខាធិការ តំណាងឯកឧត្តម បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ។
លោកគ្រូ ព្រុំ បូរ៉ាត នាយកសាលាគរុកោសល្យខេត្តកំពង់ចាម បានថ្លែងស្វាគមន៍ដោយក្តីសប្បាយរីករាយដែលក្រសួងអប់រំ យុវជន និងកីឡា និងអាជ្ញាធរជាតិប្រយុទ្ធប្រឆាំងគ្រឿងញៀន បានរៀបចំឲ្យមានកម្មវិធីនេះឡើងដើម្បីផ្តល់ពុទ្ធិមួយទៀតដល់លោកគ្រូ អ្នកគ្រូ ពិសេសគរុសិស្សដែលពួកគាត់នឹងក្លាយជាគ្រូទៅបង្រៀនសិស្ស។
លោក លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងថា បញ្ហាគ្រឿងញៀននៅលើសាកលលោកមិនមានសញ្ញាថមថយទេ ហើយប្រទេសកម្ពុជាមិនមែនជាប្រទេសផលិត ជួញដូរ ដាំដុះគ្រឿងញៀនទេ តែជាប្រទេសរងគ្រោះពីបញ្ហាគ្រឿងញៀនដោយឈ្មួញតែលបលួចចរាចរ ជួញដូរទៅកាន់ប្រទេសទីបី និងមានការលួចប្រើប្រាស់ដែលសមត្ថកិច្ចអនុវត្តច្បាប់យើងខិតខំធ្វើការអប់រំ បង្ការអ្នកមិនទាន់ប្រើកុំឲ្យប្រើ បង្ក្រាបឈ្មួញជួញដូរចែកចាយគ្រឿងញៀន ហើយធ្វើការព្យាបាល បន្សាប ស្តារនីតិសម្បទា ដល់អ្នកញៀនគ្រឿងញៀន ។
លោកជំទាវ សឿ សុជាតា អនុរដ្ឋលេខាធិការ បានថ្លែងអំណរគុណដល់គណៈគ្រប់គ្រងសាលា ដែលបានផ្តល់ទីតាំងសម្រាប់វគ្គផ្សព្វផ្សាយនៅថ្ងៃនេះ ហើយវត្តមានចូលរួមរបស់បងប្អូន ក្មួយៗ ពិតជាសំខាន់ណាស់ព្រោះលោកគ្រូ អ្នកគ្រូ ទាំងអស់គឺជាអ្នកនៅជាប់ជាមួយសិស្ស អប់រំសិស្ស ដើម្បីផ្តល់ចំណេះដឹងហើយក៏ជាអ្នកមានឥទ្ធិពលក្នុងការណែនាំសិស្សទាំងអស់ឲ្យទៅជាកូនល្អ មិត្តល្អ សិស្សល្អ ហើយបង្ការពួកគេមិនឲ្យទៅជិត មិនប៉ះពាល់ និងប្រព្រឹត្តអំពើអបាយមុខផ្សេងៗដែលសង្គមស្អប់ខ្ពើម ពិសេសបញ្ហាគ្រឿងញៀន "វិជ្ជាជ្រោងធនធាន គ្រឿងញៀនបំផ្លាញទាំងអស់ "។
ក្នុងពិធីនោះមានការប្រគល់កុំព្យួទ័រ០១គ្រឿង ដែលជាអំណោយឯកឧត្តម បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាជូនសាលាគរុកោសល្យកំពង់ចាមផងដែរ ៕
ចំនួនអ្នកទស្សនា
- ថ្ងៃនេះ10061
- ម្សិលមិញ9421
- សប្តាហ៍នេះ65721
- ខែនេះ180871
- ឆ្នាំនេះ180871
- សរុប20623327