យាយស្លាប់ចៅបាត់ខ្លួនពុំទាន់រកឃើញ ករណីលង់ទឹក នៅក្រុងប៉ៃលិន
21-May-2018 | ដោយ ពលមនសិការ
ប៉ៃលិន ៖ កាលពីរសៀលថ្ងៃទី២០ ខែឧសភា ឆ្នាំ២០១៨ មានករណីមនុស្សលង់ទឹកស្លាប់ម្នាក់និងបាត់ខ្លួនម្នាក់ នៅចំណុចក្នុងទឹកស្ទឹងចំងាយពីប៉ុស្តិ៍នគរបាលការពារព្រំដែនគោក (ប៉ុស្តិ៍ ៦៨) ចំនួន ៤០០ម៉ែត្រ នៃទិសខាងជើង ស្ថិតក្នុងភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន ខេត្តប៉ៃលិន។
មន្ត្រីនគរបាលមូលដ្ឋានបានឱ្យដឹងដថាជនរងគ្រោះមានឈ្មោះ ហួត យ៉ាន ភេទស្រី អាយុ ប្រហែលជាង ៧០ឆ្នាំ រួមជាមួយនិងចៅប្រុសឈ្មោះ តឿន រឹទ្ធ អាយុ ០៨ឆ្នាំ (បាត់ខ្លួន)។
សូមបញ្ជាក់ថាហេតុការណ៍នេះកាលពីវេលាម៉ោងប្រមាណ ០៨ព្រឹក ថ្ងៃទី២០ ខែឧសភា ឆ្នាំ២០១៨ ជនរងគ្រោះទាំងពីរបានទៅចំការដូចសព្វដង ប៉ុន្តែថ្ងៃកើតហេតុនេះជនរងគ្រោះជាយាយបានស្ពាយធុងបាញ់ថ្នាំស្មៅនៅជាប់នឹងខ្លួន ចំណែកចៅប្រុសវិញបានជិះកយាយ រួចធ្វើដំណើរឆ្លងកាត់ទឹកស្ទឹងដែលកុំពុងហូរតិចៗដើម្បីឆ្ពោះទៅកាន់ត្រើយម្ខាងទៀត ដែលនៅជាប់នឹងចំការរបស់គាត់ លុះរហូតដល់វេលាម៉ោងកើតហេតុខាងលើជនរងគ្រោះទាំងពីរបានមកដល់កន្លែងកើតហេតុ ដើម្បីត្រលប់ទៅផ្ទះវិញ ដោយបានដើរឆ្លងកាត់ទឹកស្ទឹងដោយយាយមានស្ពាយធុងសម្រាប់បាញ់ថ្នាំស្មៅ ចំណែក ចៅប្រុសបានជិះកយាយដដែល លុះឆ្លងដល់ពាក់កណ្តាលស្ទឹង គាប់ជួននោះជំនន់ទឹកភ្លៀងបានហូរធ្លាក់មកពីខាងលើយ៉ាងគំហុកបានបោកបក់ជនរងគ្រោះទាំងពីរឲ្យរអិលជើងដួលទប់លែងជាប់ និងបានរសាត់តាម ទឹកហូររហូត បណ្ដាលឲ្យយាយលង់ទឹកស្លាប់ៗភ្លាមៗ ចំណែកចៅប្រុសវិញបានរសាត់តាមទឹកហូរដោយពុំទាន់រកឃើញ និងមានស្ថានភាពយ៉ាងណានៅឡើយទេ មកទល់នឹងបច្ចុប្បន្ននេះ។
បច្ចុប្បន្នកងកម្លាំងនគរបាលការពារព្រំដែនគោកលេខ ៨២១ ប្រមាណចំនួន ៤០នាក់ ដែលដឹកនាំដោយ លោក វរសេនីយ៍ទោ វ៉ាន់ ភួយ មេបញ្ជាការរងនគរបាលការពារព្រំដែនគោកលេខ ៨២១ ដើម្បីស្វែងរក និងកុំពុងរុករកតាមបណ្តោយខ្សែទឹកហូរនៃភូមិសាស្ត្រក្នុងតំបន់ ៕
ចំនួនអ្នកទស្សនា
- ថ្ងៃនេះ8271
- ម្សិលមិញ9421
- សប្តាហ៍នេះ63931
- ខែនេះ179081
- ឆ្នាំនេះ179081
- សរុប20621537