ប្រធានមន្ទីរឧស្សាហកម្មនិងសិប្បកម្មខេត្តកោះកុងត្រូវមន្ត្រីក្រោមឱវាទប្តឹងពាក់ព័ន្ធភាពមិនប្រក្រតី
13-June-2018 | ដោយ ពលមនសិការ
កោះកុង ៖ ប្រធានមន្ទីរឧស្សាហកម្ម និងសិប្បកម្មខេត្តកោះកុង បានរងការចោទប្រកាន់ពី មន្ត្រីក្រោមឱវាទ និងនិវត្តន៍ជនតាមរយៈការដាក់បណ្តឹងចូលរដ្ឋមន្ត្រីក្រសួងពាក់ព័ន្ធ ការប្រព្រឹត្តអំពើមិនប្រក្រតីក្នុងដែនគ្រប់គ្រងរបស់ខ្លួន។
មន្ត្រីក្រោមឱវាទ និងនិវត្តន៍ជន១៨គ្រួសារបានរៀបរាប់ថាក្រោមការដឹកនាំរបស់លោក ខ្លឹម គគីរ ប្រធានមន្ទីរឧស្សាហកម្ម និងសិប្បកម្មខេត្តកោះកុងបានធ្វើឲ្យមានការបែកបាក់ផ្ទៃក្នុងយ៉ាងធ្ងន់ធ្ងរ ដោយលោកប្រធានបានបង្កើតបក្ខពួក ប្រព្រឹត្តអំពើពុករលួយ និងគម្រាមកំហែងមន្ត្រីក្រោមឱវាទ។
ជាក់ស្តែង ពាក់ព័ន្ធនឹងករណីដំណោះស្រាយដីធ្លីជូនមន្ត្រី និងពលរដ្ឋ១៨គ្រួសារដែល រស់នៅពិតប្រាកដជាយូរឆ្នាំលើដីរបស់មន្ទីរត្រូវជាប់គាំងដោយសារតែលោកប្រធានមន្ទីររារាំង និងបង្កើនចំនួនគ្រួសារបន្ថែមទ្វេដង។
ប្រភពបានបញ្ជាក់ថាចំនួនមន្ត្រីរាជការ និងមន្ត្រីចូលនិវត្តន៍ដែលរស់នៅជាក់ស្តែង លើដីរបស់មន្ទីរចាប់តាំងពីឆ្នាំ១៩៩១ រហូតមកដល់សព្វថ្ងៃមានតែ១៨គ្រួសារប៉ុណ្ពោះ។ ប៉ុន្តែពេលមានគោលការណ៍ពីរាជរដ្ឋាភិបាលក្នុងការដោះស្រាយបែងចែកដីជាកម្មសិទ្ធិ បែរជាលោកប្រធានមន្ទីរបង្កើនតួលេខបន្ថែម រួចធ្វើរបាយការណ៍ភូតកុហកទៅថ្នាក់លើបន្ថែមចំនួនរហូតដល់៣២គ្រួសារដើម្បីទទួលបានចំណែកផ្ទាល់ខ្លួន និងបក្ខពួក។
ចំណែកមន្ត្រីរាជការដែលរងនូវការគម្រាមកំហែង និងគាបសង្កត់វិញ បានត្រឹមតែឱបដៃអង្គុយមើលដោយមិនហ៊ានបញ្ចេញពាក្យសម្តីតវ៉ារកខុសត្រូវឡើយ។
ជាក់ស្តែងករណីលោក អាន និមល ដែលចេញមុខតវ៉ានៅមន្ទីរដើម្បីរកយុត្តិធម៌សម្រាប់ខ្លួន ព្រមទាំងមន្ត្រីរាជការ និងនិវត្តន៍ជន១៧គ្រួសារនោះ ទីបំផុតត្រូវលោកប្រធានមន្ទីររាយការណ៍ បម្រុងដកចេញពីតំណែងទៅបញ្ឈរជើងនៅក្រសួងថែមទៀត។
តាមប្រភពក្រៅផ្លូវការមួយបានប្រាប់ឱ្យដឹងថា រឿងដែលលោក ខ្លឹម គគីរ ហ៊ានយកអំណាចរបស់ខ្លួនទៅគាបសង្កត់ គម្រាមកំហែងមន្ត្រីក្រោមឱវាទនោះក៏ព្រោះតែមានមន្ត្រីថ្នាក់អន្ទ្រើសនៅក្រសួងពីររូបជាបង្អែក ឬអាចនិយាយបានថាជាដើមគំនិតបំណងទទួលផលចំណេញក្នុងរឿងដោះស្រាយគោលនយោបាយដីធ្លីនេះ។
ប៉ុន្តែនៅពេលលោកទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្មយល់ជ្រាបពីការប្រព្រឹត្តមិនប្រក្រតីនោះ អ្នកទាំងពីរបានដោះដៃចេញធ្វើឱ្យលោក ខ្លឹម គគីរ ហាក់ទទួលរងនូវទម្ងន់ផ្ទាំងថ្មបាក់តែម្នាក់ឯង។
តាមរយៈការលើកឡើងពីភាពមិនប្រក្រតីទាំងនេះ មន្ត្រីរាជការជាច្រើននៅមន្ទីរឧស្សាហកម្ម និងសិប្បកម្មខេត្តកោះកុងបានសំណូមពរដល់លោកទេសរដ្ឋមន្ត្រី ចម ប្រសិទ្ធ មេត្តាបញ្ជូន ក្រុមអធិការកិច្ចក្រសួងចុះមកតាមដានដើម្បីស្វែងរកកាពិត និងផ្តល់យុត្តិធម៌ចំពោះសុចរិតជនពិតប្រាកដផង ។
លោក ខ្លឹម គគី ប្រធានមន្ទីរឧស្សាហកម្ម និងសិប្បកម្មខេត្តកោះកុង មិនអាចសុំការបំភ្លឺទាក់ទិនការចោទប្រកាន់ខាងលើបាននៅឡើយ ដោយលោកគ្រាន់តែបានទទួលទូរស័ព្ទ ហើយឆ្លើយថា លោកពុំទាន់មានពេលទំនេរសម្រាប់បកស្រាយនៅឡើយទេ ៕
ចំនួនអ្នកទស្សនា
- ថ្ងៃនេះ8541
- ម្សិលមិញ9421
- សប្តាហ៍នេះ64201
- ខែនេះ179351
- ឆ្នាំនេះ179351
- សរុប20621807