អភិបាលស្វាយរៀងអញ្ជើញជាអធិបតីភាពក្នុងទិវាអន្តរជាតិប្រយុទ្ធប្រឆាំងគ្រឿងញៀនក្រោមប្រធានបទ ចូលរួមទាំងអស់គ្នា ដើម្បីជីវិត និងសហគមន៍យើងគ្មានគ្រឿងញៀន
02-July-2018 | ដោយ ពលមនសិការ
ស្វាយរៀង៖ ទិវាអន្តរជាតិប្រយុទ្ធប្រឆាំងគ្រឿងញៀនក្រោមប្រធានបទ " ចូលរួមទាំងអស់គ្នា ដើម្បីជីវិត និងសហគមន៍យើងគ្មានគ្រឿងញៀន " ត្រូវបានប្រារព្ធធ្វើក្រោមអធិបតីភាព ឯកឧត្តម ម៉ែន វិបុល អភិបាលស្វាយរៀង ជំទាវឧត្តមសេនីយ៍ ជ័យ បុប្ផា អគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន ដោយមានការអញ្ជើញចូលរួមពីប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្ត ក្រុង ស្រុក ព្រះរាជអាជ្ញា តុលាការកងកម្លាំង៣ប្រភេទ យុវជនកាយរិទ្ធ កាកបាទក្រហម លោកគ្រូ អ្នកគ្រូ ប្រជាពលរដ្ឋ សិស្ស និស្សិត និងអ្នកពាក់ព័ន្ធ ចំនួន៣៤០នាក់។
កម្មវិធីនេះមានប្រារព្ធធ្វើនៅព្រឹកថ្ងៃច័ន្ទ៥រោជ ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ត្រូវនឹងថ្ងៃទី២ ខែកក្កដា ឆ្នាំ២០១៨ នៅសាលប្រជុំសាលាខេត្តស្វាយរៀង។
ឯកឧត្តម តូច ប៉ូលីវ៉ា អភិបាលរងប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្ត បានថ្លែងស្វាគមន៍ និងរបាយការណ៍ពីការងារប្រយុទ្ធប្រឆាំងគ្រឿងញៀនដែលថ្នាក់ដឹកនាំនិងមន្ត្រីពាក់ព័ន្ធក្នុងខេត្តបានខិតខំរួមគ្នាអនុវត្តការងារយ៉ាងសកម្មនិងបានពង្រឹងកិច្ចសហប្រតិបត្តិការជាមួយប្រទេសជិតខាងទប់ស្កាត់បទល្មើសគ្រឿងញៀនឆ្លងដែន។
លោកជំទាវ ឧត្តមសេនីយ៍ ជ័យ បុប្ផា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន បានអាននូវសាររបស់សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ថ្លែងអំណរព្រះគុណ និងអរគុណជាថ្មីម្តងទៀត ចំពោះសម្តេចព្រះមហាសង្ឃរាជទាំងពីរគណៈ ព្រះថេរានុត្ថេរៈគ្រប់ព្រះអង្គ ថ្នាក់ដឹកនាំ និងមន្ត្រីគ្រប់លំដាប់ ថ្នាក់នៃស្ថាប័នព្រឹទ្ធសភា រដ្ឋសភា កាកបាទក្រហមកម្ពុជា អាជ្ញាធរជាតិប្រយុទ្ធប្រឆាំងគ្រឿងញៀន ក្រសួង ស្ថាប័នពាក់ព័ន្ធ និងអង្គការមិនមែនរដ្ឋាភិបាលជាដៃគូជាតិ-អន្តរជាតិ វិស័យសាសនា វិស័យឯកជន សប្បុរសជន សិល្បករ សិល្បការនី ពិធីករ ពិធីការនី ម្ចាស់ជំនួយ និងបណ្តាប្រទេសជាមិត្ត ទាំងអស់ ដែល បានខិតខំប្រឹងប្រែងចូលរួម និងគាំទ្រយ៉ាងសកម្ម លើការងារប្រយុទ្ធប្រឆាំងគ្រឿងញៀន នាពេលកន្លងមក និងសូមឱ្យប្រពៃណីនៃការចូលរួមបន្តស្ថិតនៅ និងកាន់តែសកម្មថែមទៀត ដើម្បីជាឧត្តមប្រយោជន៍រួម គឺការ លើកកម្ពស់សុខុមាលភាព និងជីវភាពរស់នៅរបស់ប្រជាពលរដ្ឋ ការពារថែរក្សាបាននូវ សន្តិភាព សន្តិសុខ សណ្តាប់ធ្នាប់ និងការអភិវឌ្ឍន៍ប្រទេសជាតិឱ្យរីកចម្រើនទៅមុខកាន់តែឆាប់រហ័ស។
ឯកឧត្តម ម៉ែន វិបុល អភិបាលប្រធានគណកម្មាធិការត្រួតពិនិត្យគ្រឿងញៀនខេត្តស្វាយរៀង បានមានប្រសាសន៍ថា ដោយថ្លែងនូវការកើតសរសើរដោយស្មោះចំពោះថ្នាក់ដឹកនាំ អាជ្ញាធរមូលដ្ឋាន និងមន្ត្រីរាជការគ្រប់លំដាប់ ថ្នាក់ កងកម្លាំងប្រដាប់អាវុធគ្រប់ប្រភេទ នៅគ្រប់ស្ថាប័ន អង្គភាពរបស់ខេត្តទាំងអស់ ក៏ដូចជាបណ្តាអង្គការដៃគូ វិស័យសាសនា វិស័យឯកជន និងសប្បុរសជននានា ដែលបានចូលរួម និងគាំទ្រយ៉ាងសកម្មដល់ការងារប្រយុទ្ធប្រឆាំងគ្រឿងញៀនតាមតួនាទី និងភារកិច្ចរៀងៗខ្លួន ប្រកបដោយស្មារតីទទួលខុសត្រូវខ្ពស់ ក្នុងការបង្ការ និងទប់ស្កាត់រាល់បញ្ហាដែលមានការពាក់ព័ន្ធនឹងគ្រឿងញៀន ពិសេសក្នុងដំណើរការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ទាំង ៣ ដំណាក់កាលរបស់រាជរដ្ឋាភិបាលដែលបាននិងកំពុងអនុវត្តស្របពាក្យស្លោក “ ចូលរួមទាំងអស់គ្នាដើម្បីជីវិត និងសហគមន៍យើងគ្មានគ្រឿងញៀន ” ដ៏មានតម្លៃ និងមានសារៈសំខាន់ ៕
ចំនួនអ្នកទស្សនា
- ថ្ងៃនេះ3751
- ម្សិលមិញ9421
- សប្តាហ៍នេះ59411
- ខែនេះ174561
- ឆ្នាំនេះ174561
- សរុប20617017