យុវជនម្នាក់ស្រវឹងស្រាដុតផ្ទះម្តាយឆេះហ្មត់ ត្រូវប៉ុស្ដិ៍រដ្ឋបាលត្រើយស្លា ចាប់ខ្លួនភ្លាមៗបញ្ជូនទៅកាន់អធិការដ្ឋាននគរបាលស្រុកស្អាង
09-July-2018 | ដោយ ពលមនសិការ
កណ្ដាល៖យុវជនម្នាក់ត្រូវបានសមត្ថកិច្ចនគរបាលប៉ុស្ដិ៍រដ្ឋបាលត្រើយស្លា ចាប់ខ្លួនភ្លាមៗបញ្ជូនទៅកាន់អធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធីច្បាប់ បន្ទាប់ពីយុវជនរូបនេះធ្វើសកម្មភាពដុតបំផ្លាញផ្ទះម្ដាយខ្លួនឯងឆេះទាំងស្រុង កាលពីវេលាម៉ោង១៥និង៤០នាទី ថ្ងៃទី៨ ខែកក្កដា ឆ្នាំ២០១៨ ស្ថិតក្នុងភូមិថ្កុល ឃុំត្រើយស្លា ស្រុកស្អាង ខេត្ដកណ្ដាល។
នាយប៉ុស្ដិ៍នគរបាលរដ្ឋបាលត្រើយស្លា លោកអនុសេនីយ៍ឯក ពុយ ទ្រី បានឲ្យដឹងថា ផ្ទះដែលត្រូវបានជនសង្ស័យដុតបំផ្លាញនោះ មានទំហ៊ំ៥ម៉ែត្រគុណនឹង៦ម៉ែត្រ ធ្វើអំពីឈើប្រក់ស័ង្កសី ជាកម្មសិទ្ធិរបស់ឈ្មោះ កុក ស្រ៊ឺ ភេទស្រី អាយុ៥៧ឆ្នាំ ជនជាតិខ្មែរ មុខរបរកសិករ បច្ចុប្បន្នរស់នៅក្នុងភូមិ/ឃុំកើតហេតុ។ ស្ដ្រីរងគ្រោះខាងលើនេះ ត្រូវជាម្ដាយបង្កើតរបស់ជនសង្ស័យឈ្មោះ ផល ទិត្យ ភេទប្រុស អាយុ២២ឆ្នាំ ជនជាតិខ្មែរ មុខរបរកសិករ បច្ចុប្បន្នស្នាក់ផ្ទះជាម្ដាយ ។
លោក ពុយ ទ្រី បានបន្ដថា នៅមុនពេលកើតហេតុ ជនសង្ស័យបានត្រឡប់មកពីចូលរួមកម្មវិធីបង្កក់កូនរបស់អ្នកជិតខាងវិញ ស្ថិតក្នុងស្ថានភាពស្រវឹងស្រាបានស្រែកសុំលុយម្ដាយ២ពាន់រៀលទៅទិញទឹកអូអ៊ិឈិ១ដបយកមកផឹក។ បន្ទាប់មកជនសង្ស័យក៏កើតមានទំនាស់ពាក្យសម្ដីជាមួយឈ្មោះ សូត្រ ស៊ីម ដែលត្រូវជាបងប្អូនជីដូនមួយនឹងគ្នា រហូតឈានដល់រើសដុំថ្មគប់ទៅលើឈ្មោះ សូត្រ ស៊ីម ។
ក្រោយពីឃើញក្មួយៗឈ្លោះគ្នា ឈ្មោះ ប៉ោ លីធី ដែលត្រូវជាឪពុកមាបានដើរចូលទៅឃាត់ តែជនសង្ស័យមិនព្រមស្ដាប់កាន់តែបំពានទៅលើឈ្មោះ សូត្រ ស៊ីម ទើបបុរសជាឪពុកមាអត់ទ្រាំពុំបាន ក៏ទះជនសង្ស័យមួយកំផ្លៀង។ ជាហេតុធ្វើឲ្យជនសង្ស័យផ្ទុះក្ដីខឹងសម្បាស្ទុះទៅផ្ទះទាញកាំបិតប៉័ងតោចំនួន២កាន់ជាប់នៅនឹងដៃសង្ខាងរត់ដេញតាមកាប់ទៅលើបុរសជាឪពុកមា តែកាប់មិនបានដោយសារបុរសឪពុកមាដឹងខ្លួនមុនរត់គេចខ្លួនបាត់។
ដោយសារតែខឹងដេញតាមកាប់ឪពុកមាមិនបានដូចបំណង ជនសង្ស័យបានត្រឡប់ទៅផ្ទះវិញទាំងក្ដីក្ដៅក្រហាយ ទាញដែកកេះដុតផ្ទះម្ដាយចោលតែម្ដង។ ក្រោយពីភ្លើងបានឆេះសន្ធោសន្ធៅឡើង ប្រជាពលរដ្ឋជិតខាងបាននាំគ្នាចេញជួយអន្ដរាគមន៍ដែរ តែបានត្រឹមបាញ់ទឹកទប់ស្កាត់មិនឲ្យភ្លើងឆេះរាលដាលដល់លំនៅដ្ឋានផ្សេងទៀត ខណៈដែលលំនៅដ្ឋានមួយនេះត្រូវបានភ្លើងឆេះម៉ត់ទាំងស្រុង ។ ក្រោយពីមានហេតុការណ៍កើតឡើង ជនសង្ស័យដែលដុតផ្ទះម្ដាយខ្លួនឯងនោះ ត្រូវបានសមត្ថកិច្ចនគរបាលប៉ុស្ដិ៍រដ្ឋបាលត្រើយស្លាចាប់ខ្លួន បញ្ជូនទៅកាន់អធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធីច្បាប់៕
ចំនួនអ្នកទស្សនា
- ថ្ងៃនេះ2231
- ម្សិលមិញ9421
- សប្តាហ៍នេះ57891
- ខែនេះ173041
- ឆ្នាំនេះ173041
- សរុប20615497