នគរបាលចាប់ខ្លួនបុរសម្នាក់លួចម៉ូតូខណៈដែលចុះល្បាតក្នុងភូមិសាស្ដ្រក្រុងតាខ្មៅ
30-July-2018 | ដោយ ពលមនសិការ
កណ្ដាល៖ នគរបាលក្រុងតាខ្មៅធ្វើការចុះល្បាតបានជួបជនសង្ស័យម្នាក់ធ្វើសកម្មភាពលួចម៉ូតូ ក៏ធ្វើការចាប់ខ្លួន បញ្ជូនមកអធិការដ្ឋាននគរបាលក្រុង ដើម្បីសាងសំណុំរឿងចាត់ការតាមនីតិវិធីច្បាប់។ ករណីខាងលើនេះបានកើតឡើង កាលពីវេលាម៉ោង៤និង៥០នាទីទៀបភ្លឺ ថ្ងៃទី២៩ ខែកក្កដា ឆ្នាំ២០១៨ ស្ថិតក្នុងភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្តាល ។
មន្ដ្រីនគរបាលក្រុងតាខ្មៅបានឲ្យដឹងថា ជនសង្ស័យចាប់ខ្លួនមានឈ្មោះ សេន ម៉ាប់ ភេទប្រុស អាយុ២៥ឆ្នាំ មានទីលំនៅភូមិខ្លែងគង់ ឃុំកំពង់រាប ស្រុកព្រៃកប្បាស ខេត្តតាកែវ។ បច្ចុប្បន្នស្នាក់នៅក្រោមស្ពាន ស្ថិតក្នុងភូមិតាខ្មៅ១ សង្កាត់តាខ្មៅ ក្រុងតាខ្មៅ ខេត្តកណ្តាល។ ចំណែកនារីរងគ្រោះឈ្មោះ អ៊ី លីនណា ភេទស្រី អាយុ២២ឆ្នាំ មានទីលំនៅភូមិក្រាំងឃ្នង ឃុំស្រង់ ស្រុកគងពិសី ខេត្តកំពង់ស្ពឺ។ បច្ចុប្បន្នស្នាក់នៅផ្ទះជួល ស្ថិតក្នុងភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្តាល ។
ដោយឡែកវត្ថុតាងដកហូតបានមកវិញម៉ូតូ១គ្រឿងម៉ាកZOOMER ពណ៌សលាយទឹកក្រូច ពាក់ស្លាកលេខភ្នំពេញ1S-0895 ។
ប្រភពដដែលបន្ដថា កន្លងមក នារីរងគ្រោះបានយកម៉ូតូរបស់ខ្លួនមកទុកនៅខាងក្រៅបន្ទប់ជួលអស់រយៈពេលជិតកន្លះខែមកហើយ ដោយម៉ូតូរបស់នារីរងគ្រោះខូច ហើយខ្លួនបានឡើងទៅដេកនៅលើផ្ទះជួលនៅជាន់ទី២។ លុះមកដល់ថ្ងៃទី២៩ ខែកក្កដា ឆ្នាំ២០១៨ វេលាម៉ោងកើតហេតុ ស្រាប់តែមានជនសង្ស័យឈ្មោះ សេន ម៉ាប់ បានមកធ្វើសកម្មភាពលួចម៉ូតូនារីរងគ្រោះ រួចបណ្ដើរតាមបណ្ដោយផ្លូវរហូតមកដល់ត្រង់ចំណុចហាងសេះស ស្ថិតក្នុងភូមិតាខ្មៅ សង្កាត់តាខ្មៅ ក៏ត្រូវកម្លាំងសមត្ថកិច្ចល្បាតឃើញ ដោយមានការសង្ស័យក៏ឃាត់ខ្លួន រួចបញ្ជូនមកកាន់អធិការដ្ឋាននគរបាលក្រុង ដើម្បីសួរនាំ រហូតជនសង្ស័យសារភាពថា ខ្លួនបានធ្វើសកម្មភាពលួចម៉ូតូនារីរងគ្រោះប្រាកដមែន។ ក្រោយពីធ្វើការសួរនាំរួច ជនសង្ស័យត្រូវបានសមត្ថកិច្ចកសាងសំណុំរឿងចាត់ការតាមនីតិវិធីច្បាប់ ៕
ចំនួនអ្នកទស្សនា
- ថ្ងៃនេះ551
- ម្សិលមិញ9421
- សប្តាហ៍នេះ56211
- ខែនេះ171361
- ឆ្នាំនេះ171361
- សរុប20613817