នគរបាលម្នាក់ស្លៀកខោខ្លី អះអាងថាខ្លួនឯងប៉ូលិស ដកកាំភ្លើងគម្រាមបាញ់ជនរងគ្រោះនៅតាមផ្លូវសាធារណៈ
10-August-2018 | ដោយ ពលមនសិការ
ភ្នំពេញ៖ ប្រភពពីជនរងគ្រោះម្នាក់បានឲ្យដឹងថាមានបុរសម្នាក់ជាមន្ត្រីនគរបាលបានដកកាំភ្លើងគម្រាមរកបាញ់ប្រជាពលរដ្ឋ នៅវេលាម៉ោងប្រមាណ១១យប់ថ្ងៃទី០៩ ខែសីហា ឆ្នាំ២០១៨ នៅតាមផ្លូវលេខ២៧៨ ខាងក្រោយអតីតរោងកុនគិរីរម្យ ក្នុងខណ្ឌចំការមន។
ប្រភពដដែលបន្តថាមន្ត្រីនគរបាលដែលគេចោទប្រកាន់ថាដកកាំភ្លើងគម្រាមប្រជាពលរដ្ឋទាំងកណ្តាលយប់នោះឈ្មោះ លន់ ស៊ីវថេង ឋាន្តរស័ក្តិអនុសេនីយ៍ទោ អត្តលេខ ៧៥៣៣២។ ប្រជាពលរដ្ឋនៅកន្លែងកើតហេតុបានឲ្យដឹងថាដែលនាំឲ្យមានករណីដកគម្រាមបាញ់ខាងលើសង្ស័យមកពី ជម្លោះពាក្យសម្តី។
ជនរងគ្រោះដែលអះអាងថាខ្លួនត្រូវនគរបាលទំនើងដកកាំភ្លើងគម្រាមរកបាញ់ បានឲ្យដឹងថានៅមុនពេលកើតហេតុរូបគេ និងមិត្តភ័ក្ត្របានជិះម៉ូតូនៅតាមផ្លូវស្ងាត់មួយ ស្រាប់តែក្រុមបុរសអះអាងខ្លួនថាជានគរបាលនេះបានជិះម៉ូតូដេញពីក្រោយ ហើយស្រែកថាចោៗ ហើយជិះតាមពួកគេរហូត។ បន្ទាប់ពីឃើញដូចនោះពួកគេភ័យ ហើយក៏ជិះម៉ូតូរត់មករកកន្លែងមនុស្សច្រើន ដើម្បីការពារខ្លួនតែម្តង។
បើតាមរយៈវីដេអូដែលប្រជាពលរដ្ឋថតបាននេះ បន្ទាប់ពីបានប៉ះពាក់សម្តី និងដកកាំភ្លើងអាមេគម្រាមបាញ់គេហើយ បុរសអះអាងជាមន្ត្រីនគរបាល និងបក្ខពួកក៏បានជិះម៉ូតូចេញពីកន្លែងកើតហេតុបានទៅ។
ប្រជាពលរដ្ឋដែលបានឃើញសកម្មភាពដ៏ព្រៃផ្សៃរបស់បុរសអះអាងខ្លួនជាមន្ត្រីនគរបាលនេះ បាននាំគ្នារិះគន់យ៉ាងចាស់ដៃចំពោះសកម្មភាពនេះ ព្រមទាំងបានអំពាវនាវឲ្យថ្នាក់ដឹកនាំកងកម្លាំងនគរបាលជាតិ មេត្តាស្រាវជ្រាវរករឿងហេតុពិត ហើយក៏សង្ឃឹមថា នឹងដាក់វិន័យទៅលើបុរសអះអាងជាមន្ត្រីនគរបាលនេះតាមវិន័យរបស់នគរបាលជាតិ ៕
ចំនួនអ្នកទស្សនា
- ថ្ងៃនេះ941
- ម្សិលមិញ6171
- សប្តាហ៍នេះ14671
- ខែនេះ36641
- ឆ្នាំនេះ638821
- សរុប21081277