មុខសញ្ញាឆក់ជនបរទេស៣នាក់ ត្រូវសមត្ថកិច្ចខណ្ឌដូនពេញបង្ក្រាប
10-November-2018 | ដោយ ពលមនសិការ
ភ្នំពេញ៖ មុខសញ្ញាឆក់សម្ភារៈប្រជាពលរដ្ឋតាមដងផ្លូវសាធារណៈស្ទើគ្រប់បណ្តាខណ្ឌត្រូវបានកម្លាំងសមត្ថកិច្ចខណ្ឌដូនពេញឃាត់ខ្លួនបាន៣នាក់ក្រោយពីធ្វើសកម្មភាព កាលពីវេលាម៉ោង១៣និង៣០នាទី ថ្ងៃទី០៩ ខែវិច្ឆិកា ឆ្នាំ២០១៨ ស្ថិតនៅចំណុចមុខផ្ទះលេខ៣៦៩អឺ០ ផ្លូវព្រះស៊ីសុវត្ថិ ភូមិ១ សង្កាត់ជ័យជំនះ ខណ្ឌដូនពេញ។
លោកវរសេនីយ៍ឯក ទៀង ច័ន្ទសារ អធិការខណ្ឌដូនពេញបានឲ្យដឹងថាមុនពេលកើតហេតុមានសង្ស័យ៣នាក់ជិះម៉ូតូចំនួន០៣គ្រឿង ក្នុងចំណោមបក្សពួក ទាំង៣នាក់នោះ ជនសង្ស័យឈ្មោះ ជា អ៊ាង ភេទប្រុស អាយុ២៨ឆ្នាំ ជិះម៉ូតូម៉ាកYAMAHA XR ពណ៌ក្រហម បានធ្វើសកម្មភាពឆក់កាបូបបានសម្រេច ពីជនជាតិកូរ៉េ ភេទប្រុស អាយុ៤៦ឆ្នាំ ដែលកំពុងធ្វើដំណើរថ្មើរជើងទេសចរណ៍ មុខព្រះបរមរាជវាំង តាមបណ្តោយផ្លូវព្រះស៊ីសុវត្ថិពីទិសខាងត្បូងទៅជើង ភ្លាមៗនោះជនរងគ្រោះបានស្រែកឆោឡោ គាប់ជួនពេលនោះកម្លាំងជំនាញព្រហ្មទណ្ឌ(ស៊ីវិល) របស់អធិការដ្ឋានកងរាជអាវុធហត្ថខណ្ឌ និងតាមបណ្តាលប៉ុស្តិ៍រដ្ឋបាល ដែលបានបង្កប់និងពង្រាយតាម បណ្តោយផ្លូវជួរមាត់ទន្លេ បានដេញអន្តរាគមន៍ ប្រដេញចាប់និងសហការជាមួយកម្លាំងឯកសណ្ឋានចំហរដែលកំពុងល្បាត និងឈរតាមគោលដៅ រួមនឹងកម្លាំងសណ្តាប់ធ្នាប់សាលាខណ្ឌ សង្កាត់ ដែលកំពុងរៀបចំសណ្តាប់ធ្នាប់តាមដងផ្លូវ ជួយអន្តរាគមន៍ បង្ក្រាបទាន់ហេតុការណ៍ភ្លាមៗ ដោយឡែកបក្សពួក២នាក់ទៀត បានជិះបំបែកគេចខ្លួនបាត់។
លោកអធិការបន្តថា ចំពោះក្រុមមុខសញ្ញានេះ កាលពី២សប្តាហ៍មុន កម្លាំងអធិការដ្ឋាននិងប៉ុស្តិ៍រដ្ឋបាលចតុមុខ បានបង្ក្រាបបក្សពួកឈ្មោះ លី ជីមី ក្នុងបទល្មើសឆក់ទូរស័ព្ទដៃពីជនជាតិបារាំង ដែលចុះពីលើម៉ូតូកងបី នៅចំណុចសួនមុខវត្តបទុម(ស្តូក) ហើយចំពោះមុខសញ្ញាទាំងអស់នេះកន្លងមកអធិការដ្ឋាន ធ្លាប់បានបង្ក្រាបក្នុងបទល្មើសជាក់ស្តែងក៏ដូចជាការបង្ក្រាបដោយការស្រាវជ្រាវផងដែរ ប៉ុន្តែសមាសភាពនៃមុខសញ្ញានេះ ក្រោយពីចេញពីពន្ធគារ នៅតែបន្តប្រព្រឹត្តសកម្មភាពបទល្មើសឆក់ដដែល។
ជនសង្ស័យឈ្មោះ ជា អ៊ាង ភេទប្រុស អាយុ២៨ឆ្នាំ ជនជាតិខ្មែរ មុខរបរ(ឆក់) ស្នាក់នៅផ្ទះលេខ១២២បេ ផ្លវលំ ភូមិក្បាលដំរី សង្កាត់កាកាប ខណ្ឌពោធិ៍សែនជ័យ។
វត្ថុតាងចាប់យកៈម៉ូតូមួយគ្រឿងម៉ាក YAMAHA XR ពណ៌ក្រហម ពាក់ស្លាកលេខ ភ្នំពេញ1FS-3148 លេខតួ២០០១៩៧៩ លេខម៉ាស៊ីន៤៤០៥២៣២,កាបូបដៃ ពណ៌សូកូឡាមួយ និងអត្តសញ្ញាណប័ណ្ណសញ្ជាតិខ្មែរមួយ(ជារបស់ជនសង្ស័យ),កាបូប ពណ៌ខ្មៅមួយ,Ipad4 ពណ៌ប្រផេះមួយ,កាសទូរស័ព្ទដៃ ពណ៌ខ្មៅ ម៉ាកJABRA មួយ,កាបូបលុយ ពណ៌ខ្មៅមួយ (បានប្រគល់ជូនជនរងគ្រោះជាបណ្តោះអាសន្នវិញ)។
ជនរងគ្រោះឈ្មោះ KIM JAEMOON ភេទប្រុស អាយុ៤៦ឆ្នាំ ជនជាតិកូរ៉េខាងត្បូង កាន់លិខិតឆ្លងដែនលេខ M62106352 ស្នាក់នៅផ្ទះសំណាក់អូហាណាផ្ទះលេខ៤ ផ្លូវលេខ១៤៨ ភូមិ៦ សង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ។
បច្ចុប្បន្នកម្លាំងជំនាញកំពុងប្រើប្រាស់វិធានការជំនាញសួរចម្លើយ បន្តយកបក្សពួកនៅសេសសល់ព្រមទាំងប្រវត្តិសកម្មភាពប្រព្រឹត្តបទល្មើសតាមភូមិសាស្ត្រ បណ្តាលខណ្ឌផ្សេងៗកន្លងមក។ ទិសដៅបន្តៈកម្លាំងជំនាញខណ្ឌសហការជាមួយកម្លាំងប៉ុស្តិ៍បន្តពង្រឹងនឹងជំរុញការអនុវត្តទប់ស្កាត់បទល្មើសគ្រប់ប្រភេទតាមបទបញ្ជាដ៏ខ្ពង់ខ្ពស់របស់ឯកឧត្តម ស ថេត អគ្គស្នងការរង និងជាស្នងការនគរបាលរាជធានីភ្នំពេញជាប់ជាប្រចាំ៕
ចំនួនអ្នកទស្សនា
- ថ្ងៃនេះ771
- ម្សិលមិញ16391
- សប្តាហ៍នេះ47001
- ខែនេះ162151
- ឆ្នាំនេះ162151
- សរុប20604607