កម្លាំងនគរបាលខណ្ឌទួលគោក បានឃាត់ខ្លួនជនសង្ស័យម្នាក់ ពីបទ ចាប់ឃុំឃាំង និងបង្ខាំងដោយខុសច្បាប់
15-January-2019 | ដោយ ពលមនសិការ
ភ្នំពេញ៖ កម្លាំងនគរបាលខណ្ឌទួលគោក បានឃាត់ខ្លួនជនសង្ស័យម្នាក់ ពីបទ ចាប់ឃុំឃាំង និងបង្ខាំងដោយខុសច្បាប់ (ចាប់ឃាត់ខ្លួនជនរងគ្រោះមិនឲ្យចេញពីមន្ទីរពេទ្យ ដើម្បីទារលុយថ្លៃព្យាបាលវះកាត់តម្លៃចំនួន ២.០០០$ ពីរពាន់ដុល្លារសហរដ្ឋអាមេរិក) នៅក្នុងមន្ទីរពេទ្យ វិចតូរៀ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ នៅថ្ងៃទី១៤ ខែមករា ឆ្នាំ២០១៩ វេលាម៉ោង១៥និង៣០នាទី។
ក្នុងប្រតិបត្តិការខាងលើ ដោយមានការសម្របសម្រួលពីលោក វង្ស ប៊ុនវិសុទ្ធ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ក្រុមប្រតិបត្តិការដឹកនាំដោយលោក ឯក ឃុនដឿន អភិបាលខណ្ឌទួលគោក និងលោកវរសេនីយ៍ទោ សុខ ហេង អធិការនគរបាលខណ្ឌទួលគោក បានត្រួតពិនិត្យ ទីតាំងទាំងមូលនៃមន្ទីរពេទ្យវ៉ិចតូរៀ តាមពាក្យបណ្ដឹងរបស់ជនរងគ្រោះឈ្មោះភឿន មួយហ៊ាង ភេទស្រី អាយុ១៨ឆ្នាំ ជនជាតិខ្មែរ ចុះថ្ងៃទី១៤ ខែមករា ឆ្នាំ២០១៩ ពាក់ព័ន្ធបទចាប់ឃុំឃាំង និងបង្ខាំងដោយខុសច្បាប់ (ចាប់ឃាត់ខ្លួនជនរងគ្រោះមិនឲ្យចេញពីមន្ទីរពេទ្យ ដើម្បីទារ លុយថ្លៃព្យាបាលវះកាត់តំលៃចំនួន ២.០០០$ ពីរពាន់ដុល្លារសហរដ្ឋអាមេរិក) កាលពីថ្ងៃទី១៣ ខែមករា ឆ្នាំ២០១៩ វេលាម៉ោងប្រហែល១៩និង១០នាទី នៅចំណុចក្នុងមន្ទីរពេទ្យ វ៉ិច តូរៀ ដែលមានទីតាំងអាគារ លេខ៦១A ផ្លូវលេខ៣១៥ ក្រុមទី២៧ ភូមិ៦ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។
យោងតាមលោកវរសេនីយ៍ទោ សុខ ហេង អធិការនគរបាលខណ្ឌទួលគោគ បានឱ្យដឹងថាក្នុងការត្រួតពិនិត្យ សមត្ថកិច្ចយើងបានឃាត់ខ្លួនជនសង្ស័យពាក់ព័ន្ធជាជនជាតិចិនម្នាក់ឈ្មោះ LI ZHI ភេទប្រុស អាយុ៣៧ឆ្នាំ ចំណែកបុគ្គលិកផ្សេងទៀតមិនពាក់ព័ន្ធក្រុមប្រតិបត្តិការយើងអនុញ្ញាតិឲ្យវិលត្រឡប់ទៅផ្ទះវិញ។
ជនសង្ស័យឈ្មោះ LI ZHI ភេទប្រុស អាយុ៣៧ឆ្នាំ ជនជាតិចិន កាន់លិខិតឆ្លងដែនលេខ G 36241983 ចុះថ្ងៃទី១៤-JUL-២០០៩ ផ្ដល់នៅប្រទេសចិន មុខរបរ បុគ្គលិក ផ្នែកគិតលុយរបស់មន្ទីរពេទ្យវ៉ិចតូរៀ ស្នាក់នៅផ្ទះជួល ផ្លូវលេខ៣១៥ សង្កាត់បឹងកក់ទី១ ខណ្ឌទួលគោក រាជធានីភ្នំពេញ។
វត្ថុតាងចាប់យកមាន៖លិខិតឆ្លងដែនលេខមួយក្បាលលេខ G 36241983 ចុះថ្ងៃទី១៤-JUL -២០០៩ ផ្ដល់នៅប្រទេសចិន VISA ចូលថ្ងៃ៣០-១១-២០១៨ , VISA ចេញថ្ងៃទី២១-០១-២០១៩ និងប័ណ្ណការងារសំរាប់ជនបរទេសឈ្មោះ LI ZHI ចំនួន០១សន្លឹក។
ជនរងគ្រោះឈ្មោះ ភឿន មួយហ៊ាង ភេទស្រី អាយុ១៨ឆ្នាំ ជនជាតិខ្មែរ មុខរបរ បុគ្គលិកក្រឡុកស្រានៅហាងភ្នំពេញហៀ តុន ស្នាក់នៅផ្ទះជួល ផ្លូវលំ សង្កាត់ជ្រោយចង្វារ ខណ្ឌឬស្សីកែវ រាជធានីភ្នំពេញ។
ភស្ដុតាងទទួលមាន៖ វិក័យបត្រជាអក្សរចិនមានសរសេរតម្លៃ២.០០០$ (ពីរពាន់ដុល្លារ) ចំនួនមួយច្បាប់ និងឯកសារពិនិត្យជំងឺមួយចំនួន(ទទួលពីជនរងគ្រោះឈ្មោះ ភឿន មួយហ៊ាង)។
លោកអធិការបន្តថា កាលពីថ្ងៃទី១២ ខែមករា ឆ្នាំ២០១៩ វេលាម៉ោងប្រហែល០៨និង៣០នាទីព្រឹក ជនរងគ្រោះឈ្មោះ ភឿន មួយហ៊ាង ភេទស្រី អាយុ១៨ឆ្នាំ ជនជាតិខ្មែរ នឹងម្ដាយ បានទៅពិនិត្យជំងឺហើមទ្វារមាសខាងក្រៅ (រោគស្ត្រី) នៅមនី្ទរពេទ្យវ៉ិចតូរៀ ដែលជនរងគ្រោះបានណាត់តាមបណ្តាញសង្គម Facebook Page របស់មនី្ទរពេទ្យរ៉ិចតូរៀ រយៈពេលពីរថ្ងៃមុន លុះពេលជនគ្រោះនិងម្តាយរបស់ជនរងគ្រោះឈ្មោះ ជាវ ផារី អាយុ៤៧ឆ្នាំ ជនជាតិខែ្មរ បានមកដល់មនី្ទរពេទ្យវ៉ិចតូរៀ ខាងបុគ្គលិកមនី្ទរពេទ្យ បាននាំជនរងគ្រោះ ទៅពិនិត្យរោគស្ត្រី តែខាងមនី្ទរពេទ្យតំរូវអោយជនរងគ្រោះ បង់ថ្លៃសេវាពិនិត្យ ចំនួន៥៦$ (ហាសិបប្រាំមួយដុល្លារសហរដ្ឋអាមេរិក) ក្រោយពីជនរងគ្រោះបានបង់ថ្លៃសេវារួច ក្រុមគ្រូពេទ្យបាននិយាយជាមួយជនរងគ្រោះ និងម្តាយថា ជំងឺរបស់ជនរងគ្រោះមានច្រើនមុខ (កាមរោគ, ដក់ទឹកដៃស្បូន, សេមាន់, និងដុំគីស) ដំណាក់កាលចុងក្រោយ ត្រូវតែវះកាត់ បើមិនវះកាត់ទេជនរងគ្រោះនឹងត្រូវស្លាប់ ក្រោយពីស្តាប់គ្រូពេទ្យពន្យល់រួច ជនរងគ្រោះនិងម្តាយពុំមានលទ្ធភាពវះកាត់ទេ ក៏សុំគ្រូពេទ្យចេញមកផ្ទះវិញ ប៉ុន្តែក្រុមពេទ្យ០៤នាក់ស្រី (ស្រីទាំងអស់) បានព្យាយាមអោយជនគ្រោះនិងម្តាយជ្រើសរើសតំលៃវះកាត់ មានតំលៃ២៨០$ (ពីររយប៉ែតសិបដុលា្លរ), ៤៥០$ (បួនរយហាសិបដុល្លារ) និង៧០០$ (ប្រាំពីររយដុល្លារ) ក្នុងពេលដំណាលគ្នានេះដែរ ខាងក្រុមគ្រូពេទ្យ ក៏បានបញ្ជូនជនរងគ្រោះទៅវះកាត់នៅក្នុងបន្ទប់ជាន់ទី២ ពេលនោះម្តាយជនរងគ្រោះ បានជ្រើសរើសតំលៃវះកាត់ ២៨០$ (ពីររយប៉ែតសិបដុល្លារ) ក្នុងពេលវះកាត់គ្រូពេទ្យជនជាតិចិនស្រីម្នាក់ និងមានអ្នកបកប្រែស្រីចំនួនពីរនាក់ បានចាប់ម្តាយជនរងគ្រោះអោយចេញពីបន្ទប់វះកាត់របស់ជនរងគ្រោះ រួចចាប់បង្ខំអោយជនរងគ្រោះផិ្តតមេដៃលើក្រដាស ដែលសរសេរជាអក្សរចិន ទាំងជនរងគ្រោះវិលមុខឈឺចាប់ខ្លាំងកំពុងតែវះកាត់ ក្រោយមកជនរងគ្រោះក៏អស់កម្លាំង ក៏សន្លប់បាត់បង់ស្មារតីទៅ ចំណែកម្តាយជនរងគ្រោះឈ្មោះ ជាវ ផារី បានព្យាយាមសុំអង្វរក្រុមគ្រូពេទ្យថាខ្លួន ពុំមានលទ្ធភាពបង់លុយគ្រប់ចំនួន២០០០$ (ពីរពាន់ដុល្លារ)ទេ មានលុយបង់អោយមនី្ទរពេទ្យតែ ចំនួន៦០០$ (ប្រាំមួយរយដុល្លារ) រួចហើយ ប៉ុន្តែជនសង្ស័យឈ្មោះ LI ZHI ភេទប្រុស អាយុ៣៧ឆ្នាំ ជនជាតិចិន ជាបុគ្គលិក ផ្នែកគិតលុយរបស់មន្ទីរពេទ្យ មិនអោយជនគ្រោះនិងម្តាយចេញទៅផ្ទះវិញទេ ព្រមទាំងទាញទា្វរចាក់ច្រវ៉ាក់មិនអោយជនរងគ្រោះចេញមកវិញ ភ្លាមនោះម្តាយរបស់ជនរងគ្រោះបានស្រែកអោយអ្នកនៅខាងក្រៅជួយ លុះមួយសន្ទះក្រោយមក ក៏ស្រាប់តែមានកម្លាំងសមត្ថកិច្ច និងអ្នកកាសែតបានចុះមកកន្លែងកើតហេតុ និងថតសកម្មភាពនិង Live ផ្ទាល់ តាមបណ្ដាញសង្គម Facebook ទើបខាងមន្ទីរពេទ្យដោះលែងជនរងគ្រោះ និងម្តាយអោយវិលត្រលប់មកផ្ទះវិញ។ លុះមកដល់ថ្ងៃទី១៤ ខែមករា ឆ្នាំ២០១៩ វេលាម៉ោងប្រហែល១៣និង០០នាទី ទើបជនរងគ្រោះបានមកដាក់បណ្តើងនៅខាងសមត្ថកិច្ចយើងដើម្បីអោយចាត់ការប្រធានមន្ទីរពេទ្យវ៉ិចតូរៀ និងក្រុមគ្រូពេទ្យជាបក្ខពួក ដើម្បីផ្តន្ទាទៅតាមផ្លូវច្បាប់។
បច្ចុប្បន្នជនសង្ស័យខាងលើ កំពុងឃាត់ខ្លួនបណ្ដោះអាសន្ន នៅអធិការដ្ឋាននគរបាលខណ្ឌទួលគោក ដើម្បីធ្វើការសាកសួរ និងចាត់ការបន្តតាមផ្លូវច្បាប់ ៕
ចំនួនអ្នកទស្សនា
- ថ្ងៃនេះ7811
- ម្សិលមិញ11441
- សប្តាហ៍នេះ37641
- ខែនេះ152791
- ឆ្នាំនេះ152791
- សរុប20595247