សម្ដេចពិជ័យសេនា ទៀ បាញ់ ដឹកនាំគណៈប្រតិភូក្រសួងការពារជាតិ ត្រួតពិនិត្យបង្គោលព្រំដែនលខ១
08-March-2019 | ដោយ ពលមនសិការ
ឧត្តរមានជ័យ៖ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៅរសៀលទី០៨ ខែមីនា ឆ្នាំ២០១៩ បានដឹកនាំគណៈប្រតិភូក្រសួងការពារជាតិចុះត្រួតពិនិត្យបង្គោលព្រំដែនលេខ១ ច្រកទ្វារអន្តរជាតិជាំនិងសួរសុខទុក្ខកម្លាំងការពារព្រំដែនចំនួន១,១០០នាក់ ស្ថិតនៅទីបញ្ជាការកងពលតូចថ្មើជើងលេខ៤១ ស្ថិតក្នុងភូមិស្រឡៅស្រង ឃុំលំទង ស្រុកអន្លង់វែង ខេត្តរឧត្តរមានជ័យ។
នៅក្នុងឱកាសអញ្ជើញចុះសួរសុខទុក្ខកងទ័ពដែលឈរជើងតាមបណ្ដោយព្រំដែនកម្ពុជា.ថៃ សម្ដេចពិជ័យសេនា ទៀ បាញ់ បានពាំនាំនូវការផ្ដាំផ្ញើសាកសួរសុខទុក្ខ អំពីសំណាក់សម្តេច អគ្គមហាសេនាបតីតេជោ ហ៊ុន សែន និងសម្តេចកិត្តិព្រិទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចជាកាលសម្ដេចទាំង២តែងតែបានយកចិត្តទុកដាក់ចំពោះសុខទុក្ខរបស់កងកម្លាំងប្រដាប់អាវុធដែលឈរជើងនៅជួរមុខជានិច្ច។
សម្ដេចពិជ័យសេនា ទៀ បាញ់ ក៏បានថ្លែងនូវការកោតសរសើរ ចំពោះ គំរូវីរភាព របស់កងកម្លាំងទាំងអស់ជាពិសេសកងកម្លាំងប្រដាប់អាវុធ ដែលបានខិតខំបំពេញ កាតព្វកិច្ច បំរើជាតិមាតុភូមិប្រកបដោយទំនួល ខុសត្រូវខ្ពស់ ចំពោះការការពារបូរណៈភាពទឹកដី នៅតាមបន្ទាត់ព្រំដែនកម្ពុជា.ថៃ។
សម្ដេចពិជ័យសេនា ក៏បាន សំណូមពរដល់សមត្ថកិច្ចដែលកំពុងឈរជើង នៅតាមបន្ទាត់ព្រំដែនទាំងអស់ ត្រូវតែបន្តបង្កើនកិច្ច សហប្រតិបត្តិការល្អលើគ្រប់វិស័យ និងសាមគ្គីភាពល្អ ជាមួយអាជ្ញាធរពាក់ព័ន្ធរបស់ប្រទេសជិតខាង ដើម្បីធ្វើយ៉ាងណាឲ្យព្រំដែនប្រទេសយើងទាំង២ ក្លាយជាព្រំដែនសន្តិភាព មានការផ្លាស់ប្ដូរពាណិជ្ជកម្មគ្នាទៅវិញទៅមកជាពិសេសធ្វើយ៉ាងណាបង្កលក្ខណៈងាយស្រួលឲ្យបងប្អូនប្រជាពលរដ្ឋរស់នៅតាមបណ្ដោយព្រំដែនប្រកបរបរទទួលទានកាន់តែមានជីវភាពល្អប្រសើរទ្វេដង ៕
ចំនួនអ្នកទស្សនា
- ថ្ងៃនេះ1681
- ម្សិលមិញ11441
- សប្តាហ៍នេះ31511
- ខែនេះ146661
- ឆ្នាំនេះ146661
- សរុប20589117