កម្លាំង​នគរបាល​៤​នាក់​ និង​ប្រជា​ការពារ​២​នាក់​ បាន​រង​របួស​ក្នុង​ករណី​មនុស្ស​ជាង​១០០​នាក់​ បិទផ្លូវ​នៅ​ស្រុក​ព្រៃ​នប់​

19-April-2019 | ដោយ ពលមនសិការ

​ព្រះ​សីហ​នុ​៖​ លោក​ឧត្តមសេនីយ៍ទោ​ ជួន​ ណា​រិ​ន្ទ​ ស្នងការ​នគរបាល​ខេត្ត​ព្រះ​សីហ​នុ​ បាន​ឲ្យ​ដឹង​ថា​ក្នុង​ប្រតិបត្តិការ​ជួយ​សម្រួល​ចរាចរណ៍​ករណី​ប្រជាពលរដ្ឋ​ជាង​១០០​នាក់​ តវ៉ា​បិទផ្លូវ​ជាតិ​លេខ​៤​នោះ​ បាន​ធ្វើ​ឲ្យ​កម្លាំង​សមត្ថកិច្ច​ចំនួន​៦​នាក់​បាន​រង​របួស​ក្នុង​នោះ​កម្លាំង​នគរបាល​៤​នាក់​និង​កម្លាំង​ប្រជា​ការពារ​ចំនួន​២​នាក់​ និង​ខូចខាត​រថយន្ត​ចំនួន​៣​គ្រឿង​ រថយន្ត​របស់​អធិការ​ស្រុក​២​គ្រឿង​ និង​រថយន្ត​របស់​មន្ត្រី​អាវុធហត្ថ​មួយ​គ្រឿង​ នៅ​ព្រឹក​ថ្ងៃ​ទី​១៩​ ខែមេសា​ ឆ្នាំ​២០១៩​។​

​លោក​ឧត្តមសេនីយ៍ទោ​ ស្នងការ​បន្ត​ថា​សមត្ថកិច្ច​មិន​បាន​ចាប់ខ្លួន​ប្រជាពលរដ្ឋ​ស្លូត​ត្រង់នោះ​ទេ​ សមត្ថកិច្ច​ឃាត់ខ្លួន​ជន​ដៃដល់​ដែល​ប្រើ​អំពើ​ហិង្សា​គប់​ដំ​ថ្ម​មក​លើ​កម្លាំង​សមត្ថកិច្ច​ ដែល​កំពុង​ជួយ​បើក​ចរាចរណ៍​ ករណី​ប្រជាពលរដ្ឋ​ជិត​១០០​នាក់​ បាន​យក​ដំ​ថ្ម​ និង​មែកឈើ​ដាក់​លើ​ផ្លូវជាតិ​លេខ​៤​ បង្ក​ការ​កកស្ទះ​ដល់​អ្នក​ធ្វើ​ដំណើរ​។​

​លោក​ឧត្តមសេនីយ៍ទោ​ បាន​បន្ថែម​ថា​ពេល​ដែល​សមត្ថកិច្ច​កំពុង​យក​ដំ​ថ្ម​ និង​លើក​មែកឈើ​ចេញ​ពីលើ​ផ្លូវជាតិ​លេខ​៤​នោះ​ ក្រុម​ជន​ដៃដល់​បាន​យក​ដំ​ថ្ម​ គប់​មក​លើ​សមត្ថកិច្ច​ បណ្តាល​ឲ្យ​សមត្ថកិច្ច​រង​របួស​ចំនួន​៦​នាក់​ ប៉ុន្តែ​សមត្ថកិច្ច​បាន​មិន​ប្រើ​អំពើ​ហិង្សា​តបត​វិញ​ឡើយ​។​

​កម្លាំង​នគរបាល​បាន​ចាប់​ខ្លូ​ន​មនុស្ស​៦​នាក់​ ដែល​បាន​ដឹកនាំ​និង​ចូលរួម​ប្រើ​ហិង្សា​ទៅ​លើ​មន្ដ្រី​នគរបាល​ និង​ប្រជា​ការពារ​ នៅ​ពេល​ដែល​កងកម្លាំង​បាន​ចុះ​ទៅ​អន្ដរាគមន៍​ ឲ្យ​ពួក​គេ​បើកផ្លូវ​ឡើង​វិញ​ ក្រោយ​យក​ដុំ​ថ្ម​ និង​មែកឈើ​ទៅ​ដាក់​បិទផ្លូវ​ជាតិ​បង្ក​ឲ្យ​កកស្ទះ​ចរាចរណ៍​ប្រហែល​១​ម៉ោង​។​

​នេះ​ជា​ថ្ងៃ​ទី​២​ហើយ​ ដែល​ប្រជាពលរដ្ឋ​ទាំងនោះ​បាន​នាំ​គ្នា​បិទផ្លូវ​ជាតិ​លេខ​៤​ ដោយសារ​ខឹង​អាជ្ញាធរ​ចុះ​ទៅ​រុះរើ​ខ្ទម​ និង​សំណង់​អនាធិបតេយ្យ​ខុសច្បាប់​របស់​ពួក​គាត់​ នៅ​ឃុំ​បិត​ត្រាំ​ង​ ដែល​សង់​លើ​ដី​មាន​ម្ចាស់​កម្មសិទ្ធិ​ពិតប្រាកដ​ កាលពី​ម្សិលមិញ​ជាង​៦០០​ខ្នង​។​

​សូម​បញ្ជាក់​ថា​ កម្លាំង​ចម្រុះ​ នៃ​រដ្ឋបាល​ខេត្ត​ព្រះ​សីហ​នុ​ កាលពី​ព្រឹក​ថ្ងៃ​ទី​១៨​ ខែមេសា​ ឆ្នាំ​២០១៩​ បាន​ចុះ​ទៅ​រុះរើ​សំណង់ផ្ទះ​ខ្ទម​ជាង​៦០០​ខ្ទម​ ដែល​អ​ជ្ញា​ធរ​អះអាង​ថា​ ជា​សំណង់​អនាធិបតេយ្យ​ សាងសង់​ដោយ​ពលរដ្ឋ​មួយ​ចំនួន​ប៉ះពាល់​ទៅ​លើ​ដី​ដែល​មានកម្ម​ម្ចាស់​សិទ្ធិ​ស្របច្បាប់​ មា​នទី​តាំងនៅ​ចំណុច​ចំណោត​អូរ​ត្រាវ​ ស្ថិត​ក្នុង​ឃុំ​បិត​ត្រាំ​ង​ ស្រុក​ព្រៃ​នប់​ ខេត្ត​ព្រះ​សីហ​នុ​ ៕


ចំនួនអ្នកទស្សនា

    19474477

  • ថ្ងៃនេះ31
  • ម្សិលមិញ2971
  • សប្តាហ៍នេះ11181
  • ខែនេះ69621
  • ឆ្នាំនេះ247031
  • សរុប19474477