ថ្នាំញៀនជិត១គីឡូក្រាម និងជនសង្ស័យ២នាក់ ត្រូវនគរបាលខេត្តស្ទឹងត្រែងបង្ក្រាប
03-May-2019 | ដោយ ពលមនសិការ
ស្ទឹងត្រែង៖ កម្លាំងនគរបាលប្រឆាំងបទល្មើសគ្រឿងញៀន របស់ស្នងការនគរបាលខេត្តស្ទឹងត្រែង បានបង្ក្រាបករណី ជួញដូរគ្រឿងញៀន ដោយបានឃាត់ខ្លួនជនសង្ស័យ២នាក់ និងដកហូតបានថ្នាំញៀនមួយកញ្ចប់ធំ។ ប្រតិបត្តិការខាងលើនេះបានធ្វើឡើងកាលពីថ្ងៃទី២ ខែឧសភា ឆ្នាំ២០១៩ នៅលើកំណាត់ផ្លូជាតិលេខ៩ ត្រង់ចំណុច ផ្លូវបំបែកចូល ទឹកធ្លាក់ជ្រោះសុភមិត្ត ទៅឃុំព្រះរំកិល ស្ថិតក្នុងភូមិសំអាង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង។
នៅព្រឹកថ្ងៃទី៣នេះ សមត្ថកិច្ចទើបបង្ហាញមុខជនសង្ស័យ និងហែកកញ្ចប់សំណាកថ្នាំញៀន រួចថ្លឹងនៅមុខជនសង្ស័យទាំង២នាក់ និងនៅចំពោះមុខ ព្រះរាជអាជ្ញារង នៃអយ្យការអមសាលាដំបូងខេត្តស្ទឹងត្រែង គឺលោក គឹម ហុងសាន ។
នគរបាលប្រឆាំងគ្រឿងញៀនបានបញ្ជាក់ថា ជនសង្ស័យទាំង២នាក់ ដែលឃាត់ខ្លួនបានរួមមាន៖
ទី១-ឈ្មោះ សុំ សាង ជនជាតិខ្មែរ ភេទប្រុស អាយុ៧០ឆ្នាំ រស់នៅឃុំព្រះរំកិល ស្រុកថាឡាបរិវ៉ាត់ ខេត្តស្ទឹងត្រែង
និងទី២-ឈ្មោះ មុត សៃ ភេទស្រី អាយុ៦០ឆ្នាំ ជនជាតិខែ្មរ រស់នៅឃុំព្រះរំកិល ស្រុកថាឡាបរិវ៉ាត់។
ចំណែកសារធាតុញៀនដែលរឹបអូសបាន មានទម្ងន់៩៩៤,៥ក្រាម ស្មើនិងជិតមួយគីឡូក្រាម ជាប្រភេទថ្នាំម៉េតំហ្វេតាមីនអាយ ឬ (ម៉ាទឹកកក)។
បច្ចុប្បន្ន ជនសង្ស័យទាំង២នាក់ កំពុងស្ថិតក្រោមការឃុំខ្លូននៅស្នងការដ្ឋាននគរបាលខេត្តស្ទឹងត្រែង ដើម្បីសាកសួរស្រាវជ្រាវរកអ្នកពាក់ព័ន្ធ និងកសាងសំណុំរឿងបញ្ជូនខ្លួនទៅកាន់តុលាការនៅព្រឹកថ្ងៃទី៤ ស្អែកនេះ ចាត់ការទៅតាមនីតិវិធី៕
ចំនួនអ្នកទស្សនា
- ថ្ងៃនេះ6911
- ម្សិលមិញ6261
- សប្តាហ៍នេះ25291
- ខែនេះ140441
- ឆ្នាំនេះ140441
- សរុប20582897