ឧបនាយករដ្ឋមន្ត្រី ប្រាក់ សុខុន៖ ទំហំពាណិជ្ជកម្មប្រទេសកម្ពុជានិងសាធារណរដ្ឋប្រជាធិបតេយ្យទីម័រឡេស្តេ នៅមានកម្រិតតិចតួចនៅឡើយ និងបានស្នើជំរុញអនុវត្តនូវកិច្ចព្រមព្រៀងដែលបានចុះហត្ថលេខារួចហើយ
05-June-2019 | ដោយ ពលមនសិការ
ភ្នំពេញ៖ ឯកឧត្តម ឧបនាយករដ្ឋមន្ត្រី ប្រាក់ សុខុន បានលើកឡើងថា ទំហំពាណិជ្ជកម្មប្រទេសកម្ពុជានិងសាធារណរដ្ឋប្រជាធិបតេយ្យទីម័រឡេស្តេ នៅមានកម្រិតតិចតួចនៅឡើយ និងបានស្នើជំរុញអនុវត្តនូវកិច្ចព្រមព្រៀងដែលបានចុះហត្ថលេខារួចហើយ ដូចជាកិច្ចសហ-ប្រតិបត្តិការរវាងសភាពាណិជ្ជកម្មនៃប្រទេសទាំងពីរជាដើម។
ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការកម្ពុជាបានលើកឡើង កាលពីរសៀលថ្ងៃទី០៣ ខែមិថុនា ឆ្នាំ២០១៩ ក្នុងជួបពិភាក្សាទ្វេភាគីជាមួយ ឯកឧត្តម Dionisio da Costa Babo Soares រដ្ឋមន្ត្រីការបរទេសនិងសហប្រតិបត្តិការនៃសាធារណរដ្ឋប្រជាធិបតេយ្យទីម័រឡេស្តេ នៅទីស្តីការក្រសួង។
ឯកឧត្តម Dionisio da Costa Babo Soares បានថ្លែងអំណរគុណដល់ក្រសួងការបរទេស និងសហប្រតិបត្តិការអន្តរជាតិ ជាពិសេសឯកឧត្តម ឧបនាយករដ្ឋមន្ត្រីផ្ទាល់ ដែលបានរៀបចំដំណើរទស្សនកិច្ចផ្លូវការរបស់ឯកឧត្តមមកកម្ពុជា និងបានថ្លែងអំណរគុណផងដែរ ចំពោះដំណើរទស្សនកិច្ចផ្លូវការរបស់សម្តេចតេជោនាយករដ្ឋមន្ត្រី ទៅកាន់សាធារណរដ្ឋប្រជាធិបតេយ្យទីម័រឡេស្តេ កាលពីឆ្នាំ២០១៦ ដែលបានរួមចំណែកដល់ការពង្រឹងនូវទំនាក់ទំនងនៃប្រទេសទាំងពីរ។
ឯកឧត្តម Dionisio da Costa Babo Soares មានក្តីរំភើបយ៉ាងខ្លាំងក្រោយពីបានស្តាប់ប្រសាសន៍របស់សម្តេចតេជោនាយករដ្ឋមន្ត្រី ក្នុងឱកាសជំនួបសម្តែងការគួរសម កាលពីព្រឹកទី០៣ ខែមិថុនា ឆ្នាំ២០១៩ ដោយហេតុថាសម្តេចតេជោនាយករដ្ឋមន្ត្រី បានរំលឹកអំពីដំណើរការដាក់បេក្ខភាពរបស់កម្ពុជាជាសមាជិកអាស៊ាន នៅចំពេលដែលទីម័រឡេស្តេ បានដាក់ស្នើបេក្ខភាពរបស់ខ្លួនជាសមាជិកអាស៊ានដែរ។
នៅក្នុងជំនួបនេះផងដែរ ឯកឧត្តមរដ្ឋមន្ត្រីការបរទេសទាំងពីរ បានពិភាក្សាអំពីទំនាក់ទំនងទ្វេភាគី និងតំបន់ ដោយបានផ្តោតលើវិស័យមួយចំនួនដូចជា អប់រំ សេដ្ឋកិច្ច ទេសចរណ៍ និងបេក្ខភាពរបស់ទីម័រឡេស្តេ ជាសមាជិកអាស៊ាន ។
សម្តេចតេជោនាយករដ្ឋមន្ត្រី បានសម្រេចផ្តល់អាហារូបករណ៍១០កន្លែងជូននិស្សិតទីម័រឡេស្តេ ដើម្បីសិក្សានៅប្រទេសកម្ពុជា។ នៅពេលនេះសាកលវិទ្យាល័យកម្ពុជា បានត្រៀមរួចរាល់ដើម្បីទទួលនិស្សិត នៅ ខែតុលា ឆ្នាំនេះ។
ចំពោះវិស័យទេសចរណ៍វិញ ឯកឧត្តម ឧបនាយករដ្ឋមន្ត្រី បានសំដែងនូវក្តីរីករាយដែលក្រសួងទេសចរណ៍នៃប្រទេសទាំងពីរបានពិភាក្សាបញ្ចប់លើអនុស្សរណៈនៃការយោគយល់គ្នាស្តីពី កិច្ចសហការលើវិស័យ ទេសចរណ៍ និងសង្ឃឹមថាក្រសួងពាក់ព័ន្ធទាំងពីរ នឹងអាចកំណត់ពេលវេលាចុះហត្ថលេខាលើអនុស្សរណៈនេះ ក្នុងពេលឆាប់ៗខាងមុខ។
ទន្ទឹមនឹងនេះ ឯកឧត្តម ឧបនាយករដ្ឋមន្ត្រី ក៏បានស្នើពន្លឿនការពិភាក្សាលើអនុស្សរណៈនៃការយោគយល់គ្នាស្តីពីកិច្ចសហការលើវិស័យពាណិជ្ជកម្ម និងអនុស្សរណៈនៃការយោគយល់គ្នាស្តីពីកិច្ចសហការបច្ចេកទេសសម្រាប់មជ្ឈមណ្ឌលឡូជីស្ទិកជាតិ។
ចំពោះបេក្ខភាពរបស់ទីម័រឡេស្តេ ចូលជាសមាជិករបស់អាស៊ាន ឯកឧត្តម ឧបនាយករដ្ឋមន្ត្រី បានបញ្ជាក់ថា កម្ពុជាវាយតំលៃខ្ពស់និងគាំទ្របេក្ខភាពរបស់ទីម័រឡេស្តេក្លាយជាសមាជិកអាស៊ាន ដោយស្របទៅនឹងបំណងប្រាថ្នារបស់បិតាស្ថាបនិកអាស៊ាន ដែលចង់ឃើញប្រទេសនៅអាស៊ីអគ្នេយ៍ទាំងអស់ ស្ថិតនៅក្នុងសហគមន៍តែមួយ។ ទន្ទឹមនឹងនេះ ទីម័រឡេស្តេត្រូវស្វែងរកការគាំទ្រពីប្រទេសសមាជិកអាស៊ានដទៃទៀត ស្របតាមធម្មនុញអាស៊ានដែលបានកំណត់គោលការណ៍កុងសង់ស៊ុស។
ថ្នាក់ដឹកនាំអាស៊ានបានប្រគល់ភារកិច្ចជូនក្រុមប្រឹក្សាសម្របសម្រួលអាស៊ាន (ACC) រួមមានការបង្កើតក្រុមការងារនៃក្រុមប្រឹក្សាសម្របសម្រួលអាស៊ាន ដើម្បីពិភាក្សាចំពោះសំណើសុំរបស់ទីម័រឡេស្តេ។ អាស៊ាននឹងបញ្ជូនបេសកកម្មស្វែងរកការពិត របស់សហគមន៍ទាំងបីរបស់អាស៊ានរួមមាន៖សហគមន៍សន្តិសុខ-នយោបាយ សហគមន៍សេដ្ឋកិច្ច និងសហគមន៍សង្គម-វប្បធម៌ ដើម្បីចុះទៅពិនិត្យវាយតំលៃជាក់ស្តែងនៅប្រទេសទីម័រឡេស្តេ នៅពេលខាងមុខនេះ ៕
.jpg)
ចំនួនអ្នកទស្សនា
- ថ្ងៃនេះ3951
- ម្សិលមិញ12101
- សប្តាហ៍នេះ16061
- ខែនេះ131211
- ឆ្នាំនេះ131211
- សរុប20573667