ឈើប្រណិតជាង២៥០ម៉ែត្រ នៅសណ្ឋាគារ អង្គរអេរ៉ា ត្រូវបានរឹបអូសជាសម្បត្តិរដ្ន និងតម្រូវឲ្យម្ចាស់ឈើ បង់ពិន័យតាមច្បាប់ស្តីពីព្រៃឈើ
05-July-2019 | ដោយ ពលមនសិការ
សៀមរាប៖ ក្រោយកម្លាំងចំរុះឆែកឆេរឃ្លាំងស្តុបឈើប្រណិតនៅក្នុងសណ្ឋាគារ អង្គរអេរ៉ា រួចមក អាជ្ញាធរខេត្តសៀមរា បានសម្រេចរឹបអូសឈើប្រភេទលេខ១ ប្រមាណជាង២៥០ម៉ែត្រ ពីលោកស្រី គី ឈុនឡេង ម្ចាស់សណ្ឋាគារអង្គរ អេរ៉ា មករក្សាទុកជាសម្បត្តិរដ្ឋ និងតម្រូវឲ្យម្ចាស់ឈើនេះបង់ពិន័យតាមច្បាប់ស្តីពីព្រៃឈើ ដោយមិនមានការឃាត់ខ្លួននោះទេ ដែលមានទីតាំងស្តុកឈើមួយនេះ ស្ថិតនៅក្នុងក្នុងបរិវេណសណ្ឋាគារអង្គរអេរ៉ា ភូមិខ្នារ សង្កាត់ជ្រាវ ក្រុងសៀមរាប ស្របតាមបណ្តោយផ្លូវជាតិលេខ៦ ។
លោកទា គឹមសុទ្ធ ប្រធានមន្ទីរកសិកម្ម រុក្ខប្រមាញ់ និងនេសាទខេត្តសៀមរាប បានថ្លែងក្នុងសន្និសីទកាសែត កាលពីព្រលប់ថ្ងៃទី៤ ខែកក្កដា ឆ្នាំ២០១៩ម្សិលមិញថា បន្ទាប់ចាប់ផ្តើមបើកប្រតិបត្តិការរបស់ខ្លួន កាលល្ងាចថ្ងៃទី២ មកដល់ថ្ងៃទី៤ ខែកក្កដា ឆ្នាំ២០១៩ , កម្លាំងចម្រុះរបស់អាជ្ញាធរខេត្តសៀមរាប រួមមានរដ្ឋបាលព្រៃឈើ កម្លាំងនគរបាលប្រឆាំងបទល្មើសសេដ្ឋកិច្ចខេត្ត កងរាជអាវុធហត្ថ និងតំណាងស្ថាប័នអយ្យការ បានសម្រេចរឹបអូសឈើចំនួន២៥១ម៉ែត្រត្រីគុណ ក្នុងចំណោមឈើជាង៥០០ម៉ែត្រត្រីគុណមករក្សាទុកជាសម្បត្តិរដ្ឋ។
លោកបញ្ជាក់ថា ក្រៅពីរឹបអូសឈើ អាជ្ញាធរក៏បានតម្រូវឲ្យម្ចាស់ឈើបង់ពិន័យជាប្រាក់គុណនឹងបីនៃតម្លៃឈើដែលរឹបអូសនេះ។ ក្នុងករណីម្ចាស់ឈើមិនព្រមបង់ សមត្ថកិច្ចរដ្ឋបាលព្រៃឈើនឹងកសាងសំណុំរឿងបញ្ជូនទៅតុលាការ។
លោកទា គឹមសុទ្ធ ប្រធានមន្ទីរកសិកម្ម បានទម្លាយឲ្យដឹងថា ឃ្លាំងស្តុកឈើមួយកន្លែងនេះ បានដំណើរការអស់រយៈពេលជាយូរឆ្នាំមក ហើយកន្លងមកសមត្ថកិច្ចក៏ធ្លាប់ធ្វើការរឹបអូសឈើ និងពិន័យដូចគ្នាក្នុងករណីលើកនេះដែរ តែតាមការអង្កេតស្រាវជ្រាវកន្លងមក ទីតាំងស្តុកឈើនេះ គឺសម្រាប់ប្រើប្រាស់កសាងសណ្ឋាគារតែប៉ុណ្ណោះ ៕
ចំនួនអ្នកទស្សនា
- ថ្ងៃនេះ4871
- ម្សិលមិញ6021
- សប្តាហ៍នេះ37291
- ខែនេះ42131
- ឆ្នាំនេះ826761
- សរុប21269217