រដ្ឋបាលខេត្តព្រះវិហារ បានរៀបចំពិធីអបអរសាទរ ទិវាអន្តរជាតិប្រយុទ្ធប្រឆាំងគ្រឿងញៀន២៦មិថុនា
15-July-2019 | ដោយ ពលមនសិការ
ព្រះវិហារ៖ នាព្រឹកថ្ងៃចន្ទ ១៤កើត ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៥ ខែកក្កដា ឆ្នាំ២០១៩ រដ្ឋបាលខេត្តព្រះវិហារ បានរៀបចំពិធីអបអរសាទរ ទិវាអន្តរជាតិប្រយុទ្ធប្រឆាំងគ្រឿងញៀន២៦មិថុនា ឆ្នាំ២០១៩ ក្រោមប្រធានបទ សុខភាព ដើម្បីយុត្តិធម៌ យុត្តិធម៌ ដើម្បីសុខភាព ដែលពិធីនេះស្ថិតក្រោមអធិបតីភាព ឯកឧត្តម ប្រាក់ សុវណ្ណ អភិបាល នៃអភិបាលខេត្ត និងឯកឧត្តម ឧត្តមសេនីយ៍ឯក ថោង សុគន្ធា អគ្គលេខាធិការរង នៃអគ្គលេខាធិការដ្ឋានអាជ្ញាធរជាតិ ប្រយុទ្ធប្រឆាំងគ្រឿងញៀន ព្រមទាំងមានការអញ្ជើញចូលរួម ពីសំណាក់ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត កងកម្លាំងប្រដាប់អាវុធទាំងបី និងលោក លោកស្រីថ្នាក់ដឹកនាំ មន្ទីរជំនាញស្ថាប័នពាក់ព័ន្ធជុំវិញខេត្ត អភិបាលក្រុង/ស្រុក មេឃុំ/ចៅសង្កាត់ លោកគ្រូ អ្នកគ្រូ សិស្សានុសិស្ស ប្រជាពលរដ្ឋ សរុបចំនួន ៣៦០នាក់។
ឯកឧត្តម ឧត្តមសេនីយ៍ឯក ថោង សុគន្ធា អគ្គលេខាធិការរង អគ្គលេខាធិការដ្ឋានអាជ្ញាធរជាតិ ប្រយុទ្ធប្រឆាំងគ្រឿងញៀន បានអានសារលិខិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានឆ្លុះបញ្ចាំង ចំពោះការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងគ្រឿងញៀន ដោយបានដាក់ចេញនូវវិធានការជាយុទ្ធសាស្ត្រសំខាន់ៗ ដូចជាការបង្ការទប់ស្កាត់បទល្មើសគ្រឿងញៀននៅតាមច្រករបៀងតាមព្រំដែនឲ្យបានដាច់ខាត ការពារជនរងគ្រោះដែលជាប់សារធាតុញៀន និងការពង្រឹងកិច្ចសហការក្នុងការជំរុញការអនុវត្តច្បាប់អំពីការពាក់ព័ន្ធនិងគ្រឿងញៀនជាដើម។
ជាចុងបញ្ចប់ ឯកឧត្តម ឧត្តមសេនីយ៍ ថោង សុគន្ធា អគ្គលេខាធិការរង នៃអគ្គលេខាធិការដ្ឋានអាជ្ញាធរជាតិ ប្រយុទ្ធប្រឆាំងគ្រឿងញៀន បានឧបត្ថម្ភថវិកាចំនួន ២,០០០,០០០ (ពីរលានរៀលគត់) ដល់អាជ្ញាធរប្រយុទ្ធប្រឆាំងគ្រឿងញៀនខេត្ត។
ឯកឧត្តម ប្រាក់ សុវណ្ណ អភិបាល នៃគណៈអភិបាលខេត្តបានមានប្រសាសន៍លើកឡើងថា៖ ការប្រារព្ធទិវាប្រយុទ្ធប្រឆាំងគ្រឿងញៀននេះធ្វើឡើង គឺដើម្បីផ្សព្វផ្សាយអោយមានការយល់ដឹងទូលំទូលាយពីផលប៉ះពាល់នៃការគ្រោះថ្នាក់គ្រឿងញៀន និងបំផុសអោយមានការចូលរួមពីគ្រប់មជ្ឈដ្ឋានក្នុងការបង្ការ និងកាទប់ស្កាត់រាល់បញ្ហាដែលពាក់ព័ន្ធនិងគ្រឿងញៀន ព្រមទាំងចូលរួមចំណែកការអនុវត្តនយោបាយភូមិឃុំមានសុវត្តិភាពរបស់រាជរដ្ឋាភិបាលកម្ពុជា។
ឯកឧត្តមអភិបាលខេត្ត បានមានប្រសាសន៍បញ្ជាក់ថា៖ អ្នកប្រព្រឹត្ត និងប្រើប្រាស់គ្រឿងញៀន គឺបានធ្វើអោយប៉ះពាល់ អន្តរាយដល់សុខភាព ខូចខាតទ្រព្យសម្បត្តិ ងាយឆ្លងមេរោគអេដស៌ និងកើតមានអំពើហិង្សាផ្សេងៗ នៅក្នុងសង្គមគ្រួសារ ជាពិសេសគ្រួសារអ្នកប្រើប្រាស់គ្រឿងញៀនផ្ទាល់តែម្តង ហើយសកម្មភាពការចរាចរចែកចាយជួញដូរ និងប្រើប្រាស់គ្រឿងញៀននៅខេត្តព្រះវិហារ គឺនៅតែកើតមានឡើង មិនទាន់មានការថយចុះនៅឡើយ ជាពិសេសយុវវ័យ ដែលឈានទៅដល់ការបាត់បង់ធនធានមនុស្ស ប៉ះពាល់ ធ្ងន់ធ្ងរដល់ផ្នែកសេដ្ឋកិច្ច សង្គមកិច្ច រាំងស្ទះដល់ដំណើរការអភិវឌ្ឍប្រទេសជាតិ ដូច្នេះកាប្រើប្រាស់គ្រឿងញៀន បានបន្សល់ទុកនូវក្តីកង្វល់ ដល់សហគមន៍ គ្រួសារ អាណាព្យាបាល ដែលមានកូន ចៅរងគ្រោះដោយសារគ្រឿងញៀន ដែលទាមទាឱ្យមានចំណាត់ការយ៉ាងហ្មត់ចត់ សមស្រប និងច្បាស់លាស់ របស់ស្ថាប័នពាក់ព័ន្ធ និងសមត្ថកិច្ចជំនាញ។
នៅក្នុងឱកាសនោះផងដែរ ឯកឧត្តម ប្រាក់ សុវណ្ណ ក៏បានមានប្រសាសន៍អំពាវនាវដល់កងកម្លាំងប្រដាប់អាវុធគ្រប់ប្រភេទ អាជ្ញាធរដែនដីគ្រប់លំដាប់ថ្នាក់ លោកគ្រូ អ្នកគ្រូ ក្មួយៗសិស្សានុសិស្ស និងបងប្អូនប្រជាពលរដ្ឋទាំងអស់ ត្រូវចូលរួម ដើម្បីចាត់វិធានការទប់ស្កាត់ និងបញ្ចៀសគ្រឿងញៀនអោយផុតពីសហគមន៍យើង ដោយធ្វើការផ្សព្វផ្សាយឱ្យបានទូលំទូលាយ និងលើកកំពស់ការយល់ ដឹងជាសាធារណៈអំពីស្ថានភាពគ្រោះថ្នាក់នៃគ្រឿងញៀន។
ជាចុងបញ្ចប់គណៈអធិបតីទាំងអស់បានអញ្ជើញបង្ហោះប៉េងបោង ក្នុងពិធីប្រារព្ធទិវាអន្តរជាតិប្រយុទ្ធប្រឆាំងគ្រឿងញៀននោះផងដែរ ៕
ចំនួនអ្នកទស្សនា
- ថ្ងៃនេះ10521
- ម្សិលមិញ14181
- សប្តាហ៍នេះ10521
- ខែនេះ125671
- ឆ្នាំនេះ125671
- សរុប20568127