អ្នកនាំពាក្យព្រឹទ្ធសភា សម្តែងសេចក្តីសោកស្តាយយ៉ាងខ្លាំង ចំពោះនេះ សភាតំណាងរាស្ត្រសហរដ្ឋអាមេរិក បានអនុម័តសេចក្តីស្នើច្បាប់ស្តីពី ប្រជាធិបតេយ្យនៅកម្ពុជាឆ្នាំ២០១៩
18-July-2019 | ដោយ ពលមនសិការ
ភ្នំពេញ៖ នៅថ្ងៃទី១៨ ខែកក្កដា ឆ្នាំ២០១៩ អ្នកនាំពាក្យព្រឹទ្ធសភានៃព្រះរាជាណាចក្រកម្ពុជា សូមសម្តែងសេចក្តីសោកស្តាយយ៉ាងខ្លាំង ដោយនាពេលថ្មីៗនេះ សភាតំណាងរាស្ត្រសហរដ្ឋអាមេរិកទើបបានអនុម័តសេចក្តីស្នើច្បាប់ស្តីពី ប្រជាធិបតេយ្យនៅកម្ពុជាឆ្នាំ២០១៩ ដែលជាថ្មីម្តងទៀតបង្ហាញឱ្យឃើញជាក់ស្តែងនូវការជ្រៀតជ្រែកចូលកិច្ចការផ្ទៃក្នុងកម្ពុជា ជារដ្ឋឯករាជ្យ អធិបតេយ្យ សន្តិភាព អព្យាក្រឹត អចិន្ត្រៃយ៍ មិនចូលបក្សសម្ព័ន្ធ។
តាំងពីឆ្នាំ១៩៩៣មក ការបោះឆ្នោតទាំងឡាយនៅកម្ពុជា តែងប្រព្រឹត្តទៅដោយទៀងទាត់តាមពេលវេលាកំណត់ ដោយមានគណបក្សច្រើនចូលរួម ហើយស្ថិតក្រោមភ្នែករបស់អ្នកសង្កេតការណ៍ជាតិ និងអន្តរជាតិ។ ការបោះឆ្នោតទាំងនោះ សុទ្ធតែត្រូវបានទទួលស្គាល់ថា សេរី ត្រឹមត្រូវ យុត្តិធម៌ និងទទួលយកបានទាំងអស់គ្នា។
ព្រះរាជាណាចក្រកម្ពុជា អនុវត្តដោយខ្ជាប់ខ្ជួននូវលទ្ធិប្រជាធិបតេយ្យ សេរីពហុបក្ស និងនីតិរដ្ឋ។ ព្រះរាជាណាចក្រកម្ពុជា ទទួលស្គាល់ និងគោរពសិទ្ធិមនុស្ស ដូចចែងក្នុងធម្មនុញ្ញនៃអង្គការសហប្រជាជាតិ សេចក្តីប្រកាសជាសកលស្តីពីសិទ្ធិមនុស្ស និងកតិកាសញ្ញា ព្រមទាំងអនុសញ្ញាទាំងឡាយទាក់ទងទៅនឹងសិទ្ធិមនុស្ស សិទ្ធិនារី និងសិទ្ធិកុមារ។
ព្រះរាជាណាចក្រកម្ពុជា ត្រូវការពារនីត្យានុកូលភាព ធានាសណ្តាប់ធ្នាប់ និងសន្តិ-សុខសាធារណៈ ហើយប្រឆាំងដាច់ខាតការជ្រៀតជ្រែកពីបរទេស ចូលកិច្ចការផ្ទៃក្នុងរបស់ខ្លួន ទោះបីក្រោមរូបភាពណាក៏ដោយ។
ព្រឹទ្ធសភា សូមវាយតម្លៃខ្ពស់ និងគាំទ្រការខិតខំជាអតិបរមារបស់រាជរដ្ឋាភិបាលកម្ពុជា ដែលជានិច្ចកាលយកចិត្តទុកដាក់ជាអាទិភាព ចំពោះការអភិវឌ្ឍប្រទេសជាតិលើគ្រប់វិស័យឱ្យទទួលបានសមិទ្ធផលកាន់តែល្អប្រសើរថែមទៀត ដើម្បីលើកតម្កើងជីវភាពរស់នៅ និងសុខុមាលភាពរបស់ប្រជាពលរដ្ឋ ព្រមទាំងអនុវត្តគោលនយោបាយការបរទេសយ៉ាងឈ្លាសវៃ ដើម្បីរួមរស់ដោយសន្តិសហវិជ្ជមានជាមួយប្រទេសជិតខាង និងប្រទេសទាំងអស់នៅលើពិភពលោក។
ព្រឹទ្ធសភា សូមគាំទ្រការខិតខំរបស់ប្រជាជន និងប្រទេសទាំងពីរ កម្ពុជា-អាមេរិក ក្នុងការលើកកម្ពស់ទំនាក់ទំនង និងកិច្ចសហប្រតិបត្តិការលើគ្រប់វិស័យ ដោយផ្អែកលើផលប្រយោជន៍រួម និងការគោរពគ្នាទៅវិញទៅមក៕
.jpg)
ចំនួនអ្នកទស្សនា
- ថ្ងៃនេះ8371
- ម្សិលមិញ14181
- សប្តាហ៍នេះ8371
- ខែនេះ123521
- ឆ្នាំនេះ123521
- សរុប20565977