សាបូ អូហ្សាណូ៖ ប្រាប់ឱ្យមន្ត្រីឧទ្យានុរក្សទាំងអស់ត្រូវតែចូលរួមសកម្មទប់ស្កាត់បទល្មើសគ្រឿងញៀនឆ្លងកាត់ព្រំដែន និងបង្ការខ្លួនពីមេរោគអេដស៍
24-July-2019 | ដោយ ពលមនសិការ
ស្ទឹងត្រែង៖ នៅថ្ងៃទី២៣ ខែកក្កដា ឆ្នាំ២០១៩ ក្រោមកិច្ចសហការរវាងក្រសួងបរិស្ថាន អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងអាជ្ញាធរជាតិប្រយុទ្ធនឹងជំងឺអេដស៍ បន្តរៀបចំសិក្ខាសាលាផ្សព្វផ្សាយស្ដីពីការលើកកម្ពស់ការយល់ដឹងអំពីជំងឺអេដស៍ មេរោគអេដស៍ និងឥទ្ធិពលគ្រឿងញៀន នៅមន្ទីរបរិស្ថានក្រោមអធិបតីភាពឯកឧត្តម សាបូ អូហ្សាណូ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តានីតិសម្បទា នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន ឯកឧត្តមវេជ្ជបណ្ឌិត ស៊ឹម គឹមសាន ទីប្រឹក្សាអាជ្ញាធរជាតិប្រយុទ្ធនិងជំងឺអេដស៍លោក យេន រុន អនុប្រធានមន្ទីរបរិស្ថានខេត្ត ព្រមទាំងមានការចូលរួមពីថ្នាក់ដឹកនាំ មន្ត្រីរាជការ តំណាងមកពីមន្ទីរបរិស្ថាន ឧទ្យានុរក្ស សរុបចំនួន៦៥នាក់។
ក្នុងឱកាសថ្លែងបើកពិធីផ្សព្វផ្សាយនាពេលនោះ ក្នុងនាម ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ឯកឧត្តម សាបូ អូហ្សាណូ រដ្ឋលេខាធិការ បានប្រាប់ឱ្យមន្ត្រីឧទ្យានុរក្សទាំងអស់ដែលជានគរបាលយុត្តិធម៌ជាមួយនឹងការថែទាំអភិរក្សធនធានធម្មជាតិត្រូវតែចូលរួមឲ្យបានកាន់តែសកម្មថែមទៀតទប់ស្កាត់បទល្មើសគ្រឿងញៀនឆ្លងកាត់ព្រំដែន និងបង្ការខ្លួនពីមេរោគអេដស៍ និងជំងឺអេដស៍។
ក្នុងឱកាសនោះដែរឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តានីតិសម្បទា បានមានប្រសាសន៍ដោយសារបញ្ហាគ្រឿងញៀននៅលើសកលលោកមិនមានសញ្ញាថមថយបានធ្វើឱ្យកម្ពុជានៅតែបន្តទទួលរងនូវផលប៉ះពាល់ពីការចរាចរឆ្លងកាត់គ្រឿងញៀនចេញពីបណ្តាប្រទេសជិតខាងដែលភាគច្រើនគឺចូលតាមច្រកផ្លូវគោកនៃបណ្តាខេត្តនៅភាគឦសានប្រទេស ហើយការចូលរួមរបស់ឧទ្យានុរក្សការពារបរិស្ថានលើសកម្មភាពប្រយុទ្ធប្រឆាំងគ្រឿងញៀនពិសេសជួយបង្ការទប់ស្កាត់បទល្មើសគ្រឿងញៀនឆ្លងកាត់ព្រំដែនគឺសំខាន់ចាំបាច់ណាស់ដើម្បីសុវត្ថិភាពសហគមន៍។
ជាមួយគ្នានោះឯកឧត្តម វេជ្ជបណ្ឌិត ស៊ឹម គឹមសាន តំណាងអាជ្ញាធរជាតិប្រយុទ្ធនឹងជំងឺអេដស៍បានមានប្រសាសន៍ថា ដោយសារប្រជាពលរដ្ឋនៅខេត្តស្ទឹងត្រែងមានការយល់ដឹង ចូលរួមបង្ការការពារបានធ្វើឱ្យការរីករាលដាលបញ្ហាមេរោគអេដស៍ និងជំងឺអេដស៍មានការថយចុះ ហើយនៅខេត្តស្ទឹងត្រែងនេះដែរបើតាមរបាយការណ៍អង្កេតឆ្នាំ២០១៨ មានអត្រាអ្នកផ្ទុកមេរោគអេដស៍បានទទួលសេវាព្យាបាលមានចំនួន៤០០នាក់ ៕
ចំនួនអ្នកទស្សនា
- ថ្ងៃនេះ8511
- ម្សិលមិញ14181
- សប្តាហ៍នេះ8511
- ខែនេះ123661
- ឆ្នាំនេះ123661
- សរុប20566117