អភិបាលខេត្តរតនគិរី ជំរុញឲ្យមន្ត្រីការិយាល័យច្រកចេញចូលតែមួយ ត្រូវធ្វើយ៉ាងណាបង្កើនសមត្ថភាព
02-August-2019 | ដោយ ពលមនសិការ
រតនគិរី៖ អភិបាលខេត្តរតនគិរីជំរុញឲ្យមន្ត្រីការិយាល័យច្រកចេញចូលតែមួយត្រូវធ្វើយ៉ាងណាបង្កើនសមត្ថភាពក្នុងការផ្តល់សេវាសាធារណៈជូនពលរដ្ឋឱ្យមានប្រសិទ្ធភាព។
ការជំរុញបែបនេះ ឯកឧត្ដមបានលើកឡើងក្នុងឱកាស ដែលឯកឧត្ដម ចូលរួមជាអធិបតី ក្នុងពិធសម្ភោធ ដាក់ឲ្យប្រើប្រាស់ជាផ្លូវការ អគារការិយាល័យច្រកចេញចូលតែមួយ ដែលទើបសាងរួច កាលពីរសៀលថ្ងៃទី១ ខែសីហា ឆ្នាំ២០១៩ រដ្នបាលសាលាស្រុកបរកែវ បានរៀបចំពិធីសម្ពោធដាក់ឱ្យដំណើរការអគារការិយាល័យច្រកចេញចូលតែមួយ និងការិយាល័យប្រជាពលរដ្ឋ នៃរដ្ឋបាលស្រុកបរកែវ ខេត្តរតនគិរី។
ពិធីខាងនេះបានប្រព្រឹត្តទៅក្រោមអធិបតីភាព ឯកឧត្តម ណាប់ ប៊ុនហេង ប្រធានក្រុមប្រឹក្សាខេត្ត និងឯកឧត្តម ថង សាវុន អភិបាលខេត្តរតនគិរី ព្រមទាំងមានការអញ្ជើញចូលរួមពីមន្ត្រីរាជការថ្នាក់ខេត្ត ស្រុក និងប្រជាពលរដ្ឋជាច្រើនរយនាក់ផងដែរ។
លោក ហេង ប៊ុន្នី អភិបាលស្រុកបរកែវ បានឱ្យដឹងថា អគារការិយាល័យច្រកចេញចូលតែមួយរបស់រដ្ឋបាលស្រុកបរកែវ មានបណ្ដោយ២០ម៉ែត្រ ទទឹង១០ម៉ែត្រ ចំណាយថវិកាសាងសង់សរុបអស់៤រយ ១៥លាន ៦សែន ១ម៉ឺនរៀល ត្រូវបានចាប់ផ្តើមដំណើរការសាងសង់ ចាប់ពីថ្ងៃទី១៣ ខែកក្កដា ឆ្នាំ២០១៨ និងបានបញ្ចប់ការសាងសង់នាថ្ងៃទី១៩ ខែវិច្ឆិកា ឆ្នាំ២០១៨ បានបំពាក់សម្ភារៈការិយាល័យ និងដាក់ឱ្យដំណើរការនាឱកាសនេះ។
ឯកឧត្តម ថង សាវុន អភិបាលខេត្ត បានបញ្ជាក់ថា ការបង្កើតអគារការិយាល័យច្រកចេញចូលតែមួយស្រុកបរកែវ គឺជាយន្តការប្រមូលផ្តុំសេវាសាធារណៈ ដែលមានគុណភាពឆ្លើយតបទៅនឹងតម្រូវការរបស់ប្រជាពរដ្ឋ ដើម្បីធ្វើយ៉ាងណាឲ្យបានទាន់ពេលវេលា មានតម្លាភាព និងតាមនិតិវិធីសាមញ្ញ ជាពិសេស គឺជាកន្លែងប្រមូលផ្តុំសេវាកម្ម និងនីតិវិធីរដ្ឋបាលនៅកន្លែងតែមួយ។
ឯកឧត្តម បានលើកឡើងបន្ថែមថា កន្លងមក ប្រជាពលរដ្ឋស្នើសុំសេវាកម្មអ្វីមួយ ដែលមានការពាក់ព័ន្ធនិងសមត្ថកិច្ចច្រើន គឺពួកគាត់ត្រូវទៅទំនាក់ទំនងផ្ទាល់ជាមួយសមត្ថកិច្ចច្រើនកន្លែង ប៉ុន្តែពេលនេះពួកគាត់ គ្រាន់តែស្នើសុំសេវាកម្មទាំងនេះ នៅច្រកចេញចូលតែមួយជាការស្រេច។ ម្យ៉ាងទៀត ការបំពេញទម្រង់បែបបទ និងលិខិតផ្សេងៗសម្រាប់ជូនដល់ប្រជាពលរដ្ឋ ត្រូវរៀបចំឲ្យមានលក្ខណៈសាមញ្ញខ្លី ច្បាស់លាស់ ងាយយល់ ហើយមន្ត្រីផ្នែកជួរមុខនៃការិយាល័យច្រកចេញចូលតែមួយ ត្រូវជួយបំពេញបែបបទដល់ប្រជាពលរដ្ឋ ដែលមិនចេះអក្សរដោយសេចក្តីពេញចិត្ត។
ទន្ទឹមនឹងនោះដែរ អភិបាលខេត្ត បានណែនាំដល់មន្ទីរអង្គភាពទាំងអស់ ត្រូវបញ្ជូនមន្ត្រីរបស់ខ្លួនដែលមានជំនាញច្បាស់លាស់ ជាពិសេស ត្រូវបណ្តុះបណ្តាលដល់ពួកគាត់ឲ្យមានសមត្ថភាពគ្រប់គ្រាន់ ក្នុងការផ្តល់សេវាសាធារណៈជូនដល់ប្រជាពលរដ្ឋឲ្យមានប្រសិទ្ធភាព តម្លាភាព គណនេយ្យភាព ច្បាស់លាស់ និងអាចឲ្យប្រជាពលរដ្ឋជឿទុកចិត្តបាន៕
ចំនួនអ្នកទស្សនា
- ថ្ងៃនេះ8271
- ម្សិលមិញ14181
- សប្តាហ៍នេះ8271
- ខែនេះ123421
- ឆ្នាំនេះ123421
- សរុប20565877