ទាហានថៃ ប្រមាណ៣០នាក់ មានអាវុធ និងកំបិតវែង ចូលមកកាប់បំផ្លាញដំឡូងមី ប្រជាពលរដ្ឋ តាមបន្ទាត់ព្រំដែន
02-August-2019 | ដោយ ពលមនសិការ
បន្ទាយមានជ័យ៖ ក្នុងឆ្នាំ២០១៩នេះ ជាលើកទី២ ហើយដែលទាហានថៃ ចូលកាប់ដំឡូងមីប្រជាពលរដ្ឋកម្ពុជា តាមបន្ទាត់ព្រំដែនអស់ប្រមាណ៥ហិកតា ក្នុងភូមិសាស្ត្រ ខេត្តបន្ទាយមានជ័យ។
ព័ត៌មានទទួលបាននៅវេលាម៉ោង១១នឹង៣០នាទី ថ្ងៃទី០១ខែសីហា ឆ្នាំ២០១៩ មានទាហានថៃ ប្រមាណ៣០នាក់មានអាវុធ និងកំបិតវែង បានចូលមកកាប់បំផ្លាញដំឡូងមីប្រជាពលរដ្ឋតាមបន្ទាត់ព្រំដែន ប្រមាណជិត៣ហិកតា ដែលកាប់នៅចំណុចច្រករបៀងបឹងព្រីង ភូមិថ្នល់បំបែក ឃុំគោករមៀត ស្រុកថ្មពួក។
ប្រជាពលរដ្ឋបានបញ្ជាក់ថា៖នេះជាលើកទី២ ហើយក្នុងឆ្នាំ២០១៩នេះ ដែលទាហានថៃ ចូលកាប់បំផ្លាញដំឡូងមី ប្រជាកសិករខ្មែរ លើកទី១ កាប់បំផ្លាញដំឡូងមី ដែលកំពុងទទួលផលអស់២ហិកតា កាលពីដើមឆ្នាំ២០១៩ បានយកត្រាក់ទ័រឈូសបំផ្លាញ នៅចំណុចភូមិព្រៃចាន់ ឃុំអូរបីជាន់ស្រុកអូរជ្រៅ និងលើកទី២ កាប់បំផ្លាញដំឡូងមី អស់៣ហិកតា ស្ថិតភូមិថ្នល់បទ ឃុំគោករមៀត ស្រុកថ្មពួក។
លោកឧត្តមសេនីយ៍ត្រី ឃួន ជឿន មេបញ្ជាយោធាការពារព្រំដែនគោកលេខ៥០៣ បានប្រាប់ព្រឹកថ្ងៃទី០២ ខែសីហាឆ្នាំ២០១៩ថា ទាហានថៃពិតជាបានចូលមកកាប់បំផ្លាញដំឡូងមីប្រជាកសិករ តាមបន្ទាត់ព្រំដែនប្រមាណជិត១គីឡូម៉ែត្រ ដែលកាប់មានកន្លែងខ្លះកាប់ចូលប្រមាណ៥០ម៉ែត្រ និងខ្លះទៀត២០ទៅ១០ម៉ែត្រ ដែលចូលមកកាប់ឃើញមានតម្រួតយោធា ឬ(ត.ឆ.ដ) និងទាហានឈុតខ្មៅប្រមាណ៣០នាក់ មានអាវុធ និងកាំបិតវែងចូលមកកាប់បំផ្លាញ។
លោកបានបញ្ជាក់ថា ទាហានភាគីថៃ ដែលចូលមកកាប់បំផ្លាញដំឡូងមីប្រជាកសិករតាមបន្ទាត់ព្រំដែន ក្នុងឃុំគោករមៀត ស្រុកថ្មពួក គឺជាការរំលោភដែនដី និងបូរណភាពទឹកដី និងកិច្ចប្រជុំ គណៈកម្មការព្រំដែនកម្ពុជា-ថៃ កន្លងមករាល់ការងារព្រំដែនមុន កងកម្លាំងដែលឈរជើងតាមបន្ទាត់ព្រំដែនត្រូវពិភ្សាគ្នាជាមុន និងការកាប់បំផ្លាញដែលខុសរំលោភអធិប្បតេយ្យភាពកម្ពុជា។
លោកឧត្តមសេនីយ៍ទោ ឈុន ម៉ៅ មេបញ្ជាការរងយោធភូមិភាគទី៥ និងជាមេបញ្ជាការទិសទី១ ខេត្តបន្ទាយមានជ័យបានបញ្ជាក់ថា ក្រោយពេលដែលទទួលព័ត៌មានបានដឹងទាហានភាគីថៃ ប្រមាណ៣០នាក់ ចូលមកកាប់បំផ្លាញដំឡូងមី ប្រជាកសិករតាមបន្ទាត់ព្រំដែន ក្នុងភូមិថ្នល់បទ ឃុំគោករមៀត ស្រុកថ្មពួក កាលរសៀលថ្ងៃទី០១ ខែសីហា ឆ្នាំ២០១៩ ហើយកងកម្លាំងដែលឈរជើងតាមបន្ទាត់ព្រំដែនបានទៅហាមឃាត់អោយបញ្ឈប់សកម្មភាពដែលកាប់បំផ្លាញដំឡូងមីប្រមាណ៣ហិកតា ដែលជាតំបន់ព្រំដែនសក្នុងទឹកដីកម្ពុជា។
លោកបានបញ្ជាក់ថា៖នៅរសៀលថ្ងៃទី០២ ខែសីហា ឆ្នាំ២០១៩នេះ លោកនិងចុះទៅពិនិត្យមើលស្ថាននៅចំណុចដែលភាគីថៃចូលមកកាប់បំផ្លាញដំឡូងមីប្រជាកសិករក្នុង ឃុំគោករមៀត ស្រុកថ្មពួក ៕
ចំនួនអ្នកទស្សនា
- ថ្ងៃនេះ7781
- ម្សិលមិញ14181
- សប្តាហ៍នេះ7781
- ខែនេះ122931
- ឆ្នាំនេះ122931
- សរុប20565387