សម្តេចអគ្គមហាពញាចក្រី ហេង សំរិន បានជម្រាប AIPA ពីសារៈសំខាន់វិស័យការទូតសភា ក្នុងការជំរុញការអភិវឌ្ឍសហគមន៍អាស៊ាន
26-August-2019 | ដោយ ពលមនសិការ
សម្តេចអគ្គមហាពញាចក្រី ហេង សំរិន ប្រធានរដ្ឋសភា បានជម្រាបមហាសន្និបាតអន្តរសភាអាស៊ាន ដែលហៅកាត់AIPA ថាការងារការទូតសភា និងភាពជាដៃគូ ជាកត្តា សំខាន់មួយក្នុងកាលៈទេសៈបច្ចុប្បន្ន ដើម្បីជំរុញការអភិវឌ្ឍក្នុងតំបន់និងពិភពលោកប្រកបដោយចីរភាព។ សម្តេចបានគូសបញ្ជាក់ថា គ្មានប្រទេសណាមួយស្ថិតនៅឯកោ ដោយគ្មានទំនាក់ទំនងជាមួយប្រទេសដទៃទៀតឡើយ។
ជាមួយគ្នានេះ សម្តេចប្រធានរដ្ឋសភា បានស្នើដល់AIPA ត្រូវមានគោលជំហររួមមួយ ដែលមានភាពបន្ស៊ីគ្នារវាងផលប្រយោជន៍ជាតិ និងផលប្រយោជន៍តំបន់។ លើកកម្ពស់ពាណិជ្ជកម្ម និងការវិនិយោគ ដែលជាកត្តាសំខាន់ចាំបាច់ ដែលAIPA គួរតែយកចិត្តទុកដាក់ តាមដាន និងរក្សាឱ្យបាននូវជំហររួមរបស់ខ្លួន គាំទ្រដល់ប្រព័ន្ធពហុភាគីនិយម ផ្អែកលើគោលការណ៍ច្បាប់ អន្តរជាតិ ការគោរព ការយោគយល់ និងការគិតគូផលប្រយោជន៍គ្នាទៅវិញទៅមក ដោយមិនមានការជ្រៀតជ្រែកកិច្ចការផ្ទៃក្នុង អធិបតេយ្យភាព និងបូរណភាពដែនដី គឺជាមូលដ្ឋានគ្រឹះនៃសន្តិភាពប្រកបដោយចីរភាព។
សម្តេចអគ្គមហាពញាចក្រី ហេង សំរិន ប្រធានរដ្ឋសភា បានថ្លែងបែបនេះនៅក្នុងកិច្ចប្រជុំពេញអង្គ របស់មហាសន្និបាតអន្តរសភាអាស៊ាន AIPA នៅព្រឹកថ្ងៃទី២៦ ខែសីហាឆ្នាំ២០១៩ នៅក្នុងប្រទេសថៃ។ សភាប្រទេសថៃធ្វើជាម្ចាស់ផ្ទះរៀបចំមហាសន្និបាត AIPA លើកទី៤០ ពីថ្ងៃទី២៥ ដល់ថ្ងៃទី៣០ ខែសីហា ឆ្នាំ២០១៩ ក្រោមមូលបទ«ការលើកកម្ពស់ភាពជាដៃគូសភា ដើម្បីសហគមន៍ប្រកបដោយចីរភាព» ។
អន្តរសភាអាស៊ានដែលហៅកាត់ថា(AIPA) ជាអង្គការអន្តរសភា ជាតំណាងស្ថាប័ននីតិប្បញ្ញត្តិនៃបណ្តាប្រទេសសមាជិកសមាគមប្រជាជាតិអាស៊ីអាគ្នេយ៍(ASEAN) ដែល មានសមាជិក១០ប្រទេស គឺ ប្រទេសប្រ៊ុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា សឹង្ហបុរី ថៃ វៀតណាម និងហ្វីលីពីន។ AIPA ជាការប្រមូលផ្តុំសំឡេងប្រជាពលរដ្ឋក្នុងសហគមន៍អាស៊ាន ដើម្បីធ្វើជាដៃគូអាស៊ាន ក្នុងការជំរុញឲ្យបានសម្រេចបាននូវគោលដៅសហគមន៍អាស៊ានតែមួយ។
សម្តេចអគ្គមហាពញាចក្រី ហេង សំរិន បានមានប្រសាសន៍បន្តថា ការជំរុញការអភិវឌ្ឍប្រកបដោយចីរភាពជាគោលការណ៍គ្រឹះ របស់សហគមន៍អាស៊ាន និងជាចំណុចស្នូលដ៏សំខាន់របស់អាស៊ាន ដើម្បីសម្រេចបាននូវសហគមន៍មួយ ដែលមានសមាហរណកម្មជិតសិទ្ធនាពេលអនាគត ដោយផ្អែកលើគោលការណ៍ប្រកបដោយបរិយាប័ន្ន។
សម្តេចប្រធានរដ្ឋសភា ក៏បានស្នើដល់AIPA ឲ្យគិតគូនិងយកចិត្តទុកដាក់បញ្ហាការប្រើប្រាស់កម្លាំងពលកម្មប្រកបដោយប្រសិទ្ធភាពផងដែរ។
សម្តេចបានសង្កត់ធ្ងន់ថា ប្រទេសក្នុងតំបន់ទាំងអស់ត្រូវយកចិត្តទុកដាក់ ក្នុងការអនុវត្តប្រព័ន្ធគាំពារសង្គម ដើម្បីធានាថា ពលករចំណាកស្រុកទាំងអស់ រួមទាំងក្រុមគ្រួសារពួកគេ ត្រូវបានការពារដោយច្បាប់ និងទទួលបានសេវាសាធារណៈដោយមិនរើសអើង។
សូមជម្រាបថាបន្ទាប់ពីកិច្ចប្រជុំពេញអង្គទៅ មហាសន្និបាត AIPA នឹងបើកកិច្ចប្រជុំតាមគណៈកម្មាធិការរបស់ខ្លួនជាបន្តបន្ទាប់ ដែលមានដូចជា គណៈកម្មាធិការនយោបាយ នឹងជជែកពីបញ្ហាអំពើភេវរកម្ម ភាពជ្រុលនិយម ឧក្រិដ្ឋកម្មឆ្លងដែន ការប្រយុទ្ធប្រឆាំងអំពើពុករលួយ។ គណៈកម្មាធិការស្ត្រី នឹងជជែកពីបញ្ហាសមភាពយេនឌ័រ។ ចំណែកគណៈកម្មាធិការសេដ្ឋកិច្ច នឹងលើកឡើងប្រធានបទជាច្រើនមកជជែកគ្នា ដូចជា ការជំរុញការអភិវឌ្ឍសេដ្ឋកិច្ចរួមនៅអាស៊ាន។ ការធ្វើឲ្យប្រសើរឡើងលើសហប្រតិបត្តិការអាស៊ានដើម្បីត្រៀមខ្លួនសម្រាប់បដិវត្តឧស្សាហកម្មទី៤។
គណៈប្រតិភូសភានៃព្រះរាជាណាចក្រកម្ពុជា ដែលដឹកនាំដោយសម្តេចអគ្គមហាពញាចក្រី ហេង សំរិន នឹងចូលរួមតាមគណៈកម្មាធិការទាំងអស់នោះ។ វត្តមានរបស់គណៈប្រតិភូជាន់ខ្ពស់សភាកម្ពុជាលើឆាកអន្តរជាតិ គឺជាការបំពេញបេសកកម្មការទូតសភានៅក្នុងការចូលរួមកសាងសុខសន្តិភាព ស្ថិរភាពសង្គម និងការអភិវឌ្ឍដោយចីរភាពនៅក្នុងតំបន់និងពិភពលោក។ ហើយក៏ជាការកសាងកិត្យានុភាពដល់សភានិងប្រទេសជាតិយើងនៅលើឆាកអន្តរជាតិ ផងដែរ ៕
ចំនួនអ្នកទស្សនា
- ថ្ងៃនេះ2951
- ម្សិលមិញ14181
- សប្តាហ៍នេះ2951
- ខែនេះ118101
- ឆ្នាំនេះ118101
- សរុប20560557