សមត្ថកិច្ចខេត្តសៀមរាប ឃាត់ខ្លួនជនសង្ស័យ៥នាក់ ពាក់ព័ន្ធករណីលួចសម្ភារៈភ្ញៀវនៅព្រលាយន្តហោះសៀមរាប
29-August-2019 | ដោយ ពលមនសិការ
សៀមរាប៖ ថ្ងៃទី២៧ ខែសីហា ឆ្នាំ២០១៩ កម្លាំងការិយាល័យនគរបាលព្រហ្មទណ្ឌកម្រិតស្រាល ខេត្តសៀមរាប បានឃាត់ខ្លួនជនសង្ស័យចំនួន០៥នាក់ ពាក់ព័ន្ធ ករណីអំពើលួចមានស្ថានទម្ងន់ទោស(លួចរ៉ូតឬឆ្កឹះសោរវ៉ាលីរបស់ប្រជាពលរដ្ឋនិងភ្ញៀវទេសចរ) កាលពីថ្ងៃទី២៥ និងទី ២៦ ខែសីហា ឆ្នាំ២០១៩ វេលាម៉ោង១៥នឹង២០នាទី នៅចំណុចក្នុងប្រអប់យន្តហោះកន្លែងដាក់សំភារៈព្រលានយន្តហោះសៀមរាប ភូមិគោកដូង សង្កាត់ទឹកវិល ក្រុង/ខេត្តសៀមរាប។
មន្ត្រីនគរបាលខេត្តសៀមរាប បានឱ្យដឹងថាជនសង្ស័យទាំង៥នាក់នោះរួមមានៈទី១.ឈ្មោះ សុខ សុខន ភេទប្រុស អាយុ៤០ឆ្នាំ មុខរបរបុគ្គលិកក្រុមហ៊ុនខេមបូឌាអ៊ែរផត ទីលំនៅភូមិថ្នល់ សង្កាត់ស្រង៉ែ ក្រុង/ខេត្តសៀមរាប, ទី២-ឈ្មោះ សុវណ្ណ វីរៈ ភេទប្រុស អាយុ៣២ឆ្នាំ មុខរបរបុគ្គលិកក្រុមហ៊ុនខេមបូឌាអ៊ែរផត ទីលំនៅ ភូមិរកា សង្កាត់ក្របីរៀល ក្រុង/ខេត្តសៀមរាប, ទី៣-ឈ្មោះ រុណ រ៉ា ភេទប្រុស អាយុ៣៧ឆ្នាំ ទីលំនៅភូមិគោកត្នោត ឃុំគោកចក ក្រុង/ខេត្តសៀមរាប, ទី៤-ឈ្មោះ ឌុល សុវណ្ណ ភេទប្រុស អាយុ៣១ឆ្នាំ មុខរបរបុគ្គលិកក្រុមហ៊ុនខេមបូឌាអ៊ែរផតទីលំនៅ ភូមិបន្ទាយចាស់ សង្កាត់គោកចក ក្រុង/ខេត្តសៀមរាប និងទី៥-ឈ្មោះ រិទ្ធ សារៃ ភេទប្រុស អាយុ២៩ឆ្នាំ មុខរបរបុគ្គលិកក្រុមហ៊ុនខេមបូឌាអ៊ែរផត ទីលំនៅភូមិគោកដូង សង្កាត់ទឹកវិល ក្រុង/ខេត្តសៀមរាប។
មន្ត្រីនគរបាលដដែលបន្តថា ការឃាត់ខ្លួនក្រុមជនសង្ស័យខាងលើ សមត្ថកិច្ចបានស្រាវជ្រាវលើកាមេរ៉ាសុវត្ថិភាព របស់ព្រលានយន្តហោះខេត្តសៀមរាប បានរកឃើញនិងថតយកបាននូវសកម្មភាពកាលពីថ្ងៃទី២៥ ខែសីហា ឆ្នាំ២០១៩ វេលាម៉ោង១៥នឹង១០នាទី មានឈ្មោះសុខ សាខន ឈ្មោះរិទ្ធ សារៃ ឈ្មោះឌុល សុវណ្ណ ធ្វើសកម្មភាពលួចរ៉ូតកាបូបវ៉ាលីយកទ្រព្យសម្បត្តិរបស់ភ្ញៀវ និងនៅថ្ងៃទី២៦ ខែសីហា ឆ្នាំ២០១៩ វេលាម៉ោង០៣នឹង២០នាទី ឃើញ ឈ្មោះ រុណ រ៉ា ឈ្មោះ សុវណ្ណ វីរៈ និងបក្ខពួកម្នាក់ទៀតពុំស្គាល់ឈ្មោះកំពុងធ្វើសកម្មភាពដូចគ្នា។ ទើបនៅថ្ងៃទី២៧ ខែសីហា ឆ្នាំ២០១៩ វេលាម៉ោង១៣នឹង៣០នាទី ខាងក្រុមហ៊ុនខេមបូឌាអ៊ែរផត បាននាំខ្លួនអ្នកទាំងប្រាំខាងលើយកមកប្រគល់អោយសមត្ថកិច្ចសួរនាំ។
តាមចម្លើយសារភាពរបស់អ្នកទាំង៥បានសារភាពថាពិតជាបានធ្វើសកម្មភាពពិតមែន ហើយឈ្មោះសុវណ្ណ វីរៈ ធ្វើសកម្មភាពបានចំនួន១០០លើក, ឈ្មោះ រុណ រ៉ា ធ្វើសកម្មភាពចំនួន៤០លើក, ឈ្មោះ រិទ្ធ សារៃ ធ្វើសកម្មភាពបានចំនួន១០០លើក, ឈ្មោះ សុខ សុខន ចូលរួមធ្វើសកម្មភាព បានចំណែក និងឈ្មោះឌុល សុវណ្ណ ចូលរួមធ្វើសកម្មភាពបានចំណែក។
ជនសង្ស័យទាំង៥នាក់ខាងលើបានសារភាពបញ្ជាក់បន្ថែមថា នៅសល់បក្ខពួកចំនួន០៤នាក់៖១.ឈ្មោះជឹម ភក្តី ភេទប្រុស,២.ឈ្មោះអេង ផៃ ភេទប្រុស,៣.ឈ្មោះហ៊ន ហត្ថា ភេទប្រុស និង៤.ពុំស្គាល់ឈ្មោះ។
សមត្ថកិច្ចដកហូតវត្ថុតាងសំខាន់ក្នុងការធ្វើសកម្មភាពមាន ប៊ិចមានចុងស្រួចរឹងសំរាប់ប្រើប្រាស់ចាក់ឆ្កឹះកូនសោរឬ រ៉ូតកាបូបវ៉ាលីយកលុយនិងទ្រព្យសម្បត្តិ ចំនួន០៤ដង។ កម្លាំងសមត្ថកិច្ច បានកសាងសំណុំរឿងបញ្ជូនទៅសាលាដំបូងខេត្ត និងកំពុងបន្តស្រាវជ្រាវរកមុខសញ្ញាដែលនៅសល់៕
ចំនួនអ្នកទស្សនា
- ថ្ងៃនេះ1051
- ម្សិលមិញ14181
- សប្តាហ៍នេះ1051
- ខែនេះ116201
- ឆ្នាំនេះ116201
- សរុប20558657