លោក សុខ លូ ដឹកនាំកិច្ច ប្រជុំប្រចាំខែ កម្មវិធីជំរុញផលិតកម្មស្រូវ និងការនាំអង្ករ (Rice-SDP) ខេត្តកំពង់ធំ
03-September-2019 | ដោយ ពលមនសិការ
កំពង់ធំ៖ នៅព្រឹកថ្ងៃទី៣ ខែកញ្ញា ឆ្នាំ២០១៩នេះ នៅសាលប្រជុំសាលាខេត្តកំពង់ធំ លោក សុខ លូ អភិបាលខេត្ត និងជានាយកកម្មវិធីថ្នាក់ខេត្ត Rice-SDP បានអញ្ជើញដឹកនាំសម្របសម្រួលកិច្ច ប្រជុំប្រចាំខែរបស់អង្គភាពអនុវត្តកម្មវិធីថ្នាក់ខេត្ត (PIO-KPT) ដោយមានការចូលរួមពីមន្ត្រីបង្គោលមន្ទីរ ជំនាញ អ្នកគ្រប់គ្រងកម្មវិធីក្រុង ស្រុក និងក្រុមការងារ SBK។
អ្នកគ្រប់គ្រងកម្មវិធីថ្នាក់ខេត្ត លោក យ៉ូវ សេងគុណ បានរាយការណ៍ពីវឌ្ឍនភាពនៃអង្គភាពអនុវត្តកម្មវិធី ខេត្តកំពង់ធំ ស្ដីពីការអនុវត្តសកម្មភាពផ្នែកកសិកម្ម, ការកៀរពង្រាបដីដោយប្រព័ន្ធឡាស៊ែ, ការអនុវត្ត សកម្មភាពផ្នែកធនធានទឹក និងការអនុវត្តសកម្មភាពផ្នែកផែនការប្រើប្រាស់ដីឃុំសង្កាត់។
លោក យ៉ូវ សេងគុណ ក៏បានលើកឡើងពីផែនការសកម្មភាពដែលត្រូវអនុវត្តបន្តផងដែរ រួមមាន៖ បណ្ដុះបណ្ដាលនិងពង្រឹងសមត្ថភាពដល់មន្ត្រី, បន្តសកម្មភាពគាំទ្រនិងពង្រឹងសមត្ថភាពសហគមន៍កសិកម្ម, បន្តអនុវត្តកម្មវិធីផ្សព្វផ្សាយកសិកម្ម, សម្របសម្រួលសកម្មភាពនានាដែលអនុវត្តនៅក្នុងខេត្ត, និងបន្តតាមដាននិងជួយគាំទ្រសកម្មភាពនានានៅមូលដ្ឋាន។
នៅក្នុងកិច្ចប្រជុំនេះដែរលោក សុខ លូ បានសំណូមពរដល់មន្ត្រីពាក់ព័ន្ធទាំងអស់ ត្រូវខិតខំស្វែងយល់ ពីកម្មវិធីជំរុញផលិតកម្មស្រូវ និងការនាំអង្ករ (Rice-SDP) នេះ ឱ្យបានទូលំទូលាយបន្ថែមទៀត។ ប្រសិនមានបញ្ហាអ្វីមួយដែលមិនទាន់ច្បាស់លាស់ ឬរាំងស្ទះ ត្រូវរាយការណ៍ ឬទំនាក់ទំនងផ្ដល់ព័ត៌មាន មកអ្នក គ្រប់គ្រងកម្មវិធីថ្នាក់ ខេត្ត ដើម្បីជួយសម្របសម្រួលការងារទាំងនោះ ពោលគឺមិនត្រូវទុកបញ្ហាទាំងនោះ ចោល ធ្វើឱ្យរាំងស្ទះ ដោយមិនរាយការណ៍នោះទេ។ ជាងនេះទៀត ស្នើលោកលោកស្រីទាំងអស់ ចូលរួមសហការណ៍ ធ្វើទាំងអស់គ្នា និងចូលរួមដោះស្រាយបញ្ហាទាំងអស់គ្នា ដើម្បីឱ្យកម្មវិធីជំរុញផលិតកម្មស្រូវ និងការនាំអង្ករ (Rice-SDP) នៃអង្គភាពអនុវត្តកម្មវិធីថ្នាក់ខេត្តកំពង់ធំ (PIO-KPT) មានដំណើរការ ដោយរលូន និងទទួលបានជោគជ័យ។
សូមបញ្ជាក់ថា កម្មវិធីជំរុញផលិតកម្មស្រូវ និងការនាំអង្ករ (Rice-SDP) នេះ កំពុងអនុវត្តនៅខេត្តគោលដៅចំនួន៣គឺ ខេត្តកំពង់ធំ ខេត្តបាត់ដំបង និងខេត្តព្រៃវែង។ ដោយឡែកខេត្តកំពង់ធំ កំពុងអនុវត្តក្នុង៣០ឃុំ/សង្កាត់គោលដៅ ដែលមានក្រុងស្ទឹងសែន ស្រុកស្ទោង ស្រុកកំពង់ស្វាយ ស្រុកសន្ទុក និងស្រុកបារាយណ៍ ៕
.jpg)
ចំនួនអ្នកទស្សនា
- ថ្ងៃនេះ811
- ម្សិលមិញ14181
- សប្តាហ៍នេះ811
- ខែនេះ115961
- ឆ្នាំនេះ115961
- សរុប20558417