កម្លាំងនគរបាលខេត្តសៀមរាប បញ្ជូនជនសង្ស័យម្នាក់ទៅតុលាការ ករណីយកដំបងវាយក្មួយស្រីបណ្តាលឲ្យស្លាប់
09-September-2019 | ដោយ ពលមនសិការ
សៀមរាប៖ កម្លាំងជំនាញផ្នែកព្រហ្មទណ្ឌ និងកម្លាំងប៉ុស្ដិ៍ដំដែក បានឃាត់ខ្លួនជនសង្ស័យម្នាក់ ពាក់ព័ន្ធករណីយកដំបងវាយក្មួយស្រីបណ្តាលឱ្យស្លាប់ពេលបញ្ជូនទៅដល់មន្ទីរពេទ្យ។ ហេតុការណ៍ខាងលើបានកើតឡើងកាលពីថ្ងៃទី០៨ ខែកញ្ញា ឆ្នាំ២០១៩ វេលាម៉ោង០៩នឹង៣០នាទីព្រឹក នៅចំណុចផ្ទះរបស់ជនរងគ្រោះ ស្ថិតក្នុងភូមិដំដែកលើ ឃុំដំដែក ស្រុកសូទ្រនិគម ខេត្តសៀមរាប។
សមត្ថកិច្ចបានឲ្យដឹងថាជនរងគ្រោះឈ្មោះ លឹម រានី ភេទស្រី អាយុ៣៣ឆ្នាំ មុខរបរជាគ្រូបង្រៀន មានទីលំនៅបច្ចុប្បន្ន ភូមិ-ឃុំកើតហេតុខាងលើ ត្រូវជាក្មួយបង្កើត របស់ជនសង្ស័យ។ ចំណែកជនសង្ស័យឈ្មោះ រុន រ៉ូន ភេទប្រុស អាយុ៥១ឆ្នាំ មានទីលំនៅជាមួយជនរងគ្រោះ ជាមនុស្សមានសតិមិនប្រក្រតី។
តាមការបញ្ជាក់របស់សមត្ថកិច្ចជនសង្ស័យ មានសតិមិនប្រក្រតី បានគិតថាជនរងគ្រោះ ដែលត្រូវជាក្មួយបង្កើត ជេរប្រមាថខ្លួន ក៏ទាញដំបងឈើជ្រុង វាយទៅលើជនរងគ្រោះ ចំក្បាល បណ្ដាលឱ្យជនរងគ្រោះ ស្លាប់ពេលបញ្ជូនដល់មន្ទីរពេទ្យ បង្អែកខេត្តសៀមរាប។
ក្រោយកើតហេតុ កម្លាំងជំនាញផ្នែកព្រហ្មទណ្ឌ និងកម្លាំងប៉ុស្ដិ៍ដំដែក បានទៅដល់កន្លែងកើតហេតុ ឃាត់ខ្លួនជនសង្ស័យ និងកសាងសំណុំរឿង បញ្ជូនទៅសាលាដំបូង ៕
ចំនួនអ្នកទស្សនា
- ថ្ងៃនេះ701
- ម្សិលមិញ14181
- សប្តាហ៍នេះ701
- ខែនេះ115851
- ឆ្នាំនេះ115851
- សរុប20558307