ពិធីចុះហត្ថលេខា លើអនុស្សរណៈ នៃការយោគយល់គ្នារវាងគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក) និង សភាពាណិជ្ជកម្មអឺរ៉ុបនៅកម្ពុជា (EUROCHAM)
12-September-2019 | ដោយ ពលមនសិការ
ភ្នំពេញ៖ នៅថ្ងៃព្រហស្បតិ៍ ១៤កើត ខែភទ្របទ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១២ ខែកញ្ញា ឆ្នាំ២០១៩ មានពិធីចុះហត្ថលេខា លើអនុស្សរណៈ នៃការយោគយល់គ្នារវាងគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក.) និងសភាពាណិជ្ជកម្មអឺរ៉ុបនៅកម្ពុជា (EUROCHAM) ស្តីពី«កិច្ចសហប្រតិបត្តិការ ក្នុងការប្រយុទ្ធប្រឆាំងការនាំចូល ការផលិត និងការចែកចាយនូវផលិតផលក្លែងក្លាយ នៅក្នុងព្រះរាជាណាចក្រកម្ពុជា»នៅទីស្តីការក្រសួងមហាផ្ទៃ។
ពិធីនេះប្រព្រឹត្តទៅបានយោងតាមសិទ្ធិប្រទាន លេខ ៤៦ ស.ប្រ.ទ ចុះថ្ងៃទី២១ ខែមិថុនា ឆ្នាំ២០១៩ របស់រាជរដ្ឋាភិបាលកម្ពុជា ដែលបានប្រទានសិទ្ធិពេញសមត្ថភាពជូន នាយឧត្តមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក.) ដើម្បីចុះហត្ថលេខា លើអនុស្សរណៈ នៃការយោគយល់គ្នានេះ។
ក្នុងពិធីនាព្រឹកនេះក្រោមអធិបតីភាព ឯកឧត្តម ទ្បាំ ជា រដ្ឋលេខាធិការ ក្រសួងមហាផ្ទៃ ឯកឧត្តម នាយឧត្តមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ ជាប្រធាន គ.ប.ផ.ក. លោក ARNAUD Darc ប្រធានសភាពាណិជ្ជកម្មអឺរ៉ុបប្រចាំកម្ពុជា និងមានការអញ្ជើញចូលរួមពី ឯកឧត្តម អតីតឯកអគ្គរដ្ឋទូតជប៉ុន ប្រចាំនៅកម្ពុជា លោក Philippe Baudry ប្រធានបេសកកម្មពាណិជ្ចកម្ម នៃស្ថានទូតបារាំងប្រចាំនៅកម្ពុជា និងថ្នាក់ដឹកនាំក្រសួង ស្ថាប័នពាក់ព័ន្ធ ថ្នាក់ដឹកនាំ គ.ប.ផ.ក. អង្គទូតនានាប្រចាំនៅកម្ពុជា តំណាងអគ្គនាយកដ្ឋាននីមួយៗ ចំណុះក្រសួងមហាផ្ទៃ អង្គការនានា សមាជិក សមាជិកា នៃគ.ប.ផ.ក. និង EUROCHAM រួមទាំង ក្រុមហ៊ុនឯកជន សរុបជាង២០០រូប។
នាឱកាសនោះ នាយឧត្តមសេនីយ៍ មៀច សុផាន់ណា មានប្រសាន៍ថា បញ្ហាឱសថក្លែងក្លាយ ឱសថអន់គុណភាពការរក្សាទុក និងបាត់បង់ប្រសិទ្ធភាពឱសថ បញ្ហាចំណីអាហារខូចគុណភាព ដែលមានផ្ទុកសារធាតុគីមីពុល ការលួចចំលងផលិតផល ការរំលោភកម្មសិទ្ធិបញ្ញាក៏ដូចជាគ្រឿងឧបភោគបរិភោគ និងសម្ភារៈប្រើប្រាស់ក្លែងក្លាយ គឺសុទ្ធសឹងជាបញ្ហា ដែលកំពុងកើតមាន និងបានញាំញី គំរាមកំហែងដល់សុខភាព អាយុជីវិតប្រជាជនក្នុងសង្គមកម្ពុជា នាពេលបច្ចុប្បន្ន ដែលតម្រូវឲ្យមានការចាត់វិធានការបង្កើតយន្តការចម្រុះ និងធ្វើកិច្ចសហការប្រតិបត្តិការទាំងថ្នាក់តំបន់ និងសកលលោក និងអនុវត្តឲ្យមានប្រសិទ្ធភាព នៃច្បាប់ជាតិ និងសន្ធិសញ្ញាអន្តរជាតិ មានការចូលរួមពីគ្រប់ភាគីពាក់ព័ន្ធ ដើម្បីប្រយុទ្ធប្រឆាំង និងសកម្មភាពល្មើសច្បាប់ទាំងនេះឲ្យមានប្រសិទ្ធភាព ដាក់ទោសទណ្ឌដល់ឧក្រិដ្ឋជនឲ្យបានធ្ងន់ធ្ងរតាមស្ថានទំងន់ទោស ដែលមានចែងក្នុងច្បាប់។
ឯកនាយឧត្តមសេនីយ៍ បានបន្តថា ការចុះអនុស្សរណៈយោគយល់គ្នានេះ គឺជាយន្តការ និងពង្រឹងការទទួលខុសត្រូវមួយបន្ថែមទៀត ក្នុងកិច្ចការពារជាដៃគូរក្នុងវិស័យធុរកិច្ចពាណិជ្ចកម្មសម្រាប់ទំនុកចិត្ត និងលំហូរ អ្នកវិនិយោគបរទេស មកកាន់កម្ពុជាពីបណ្តាប្រទេសនៅអឺរ៉ុប និងបណ្តាប្រទេសនានាលើពីភពលោក។ កន្លងមក គ.ប.ផ.ក បានបង្ក្រាបបំផ្លាញចោលនូវផលិតផលក្លែងក្លាយខុសច្បាប់រាប់រយតោន និងបានចាប់ជនល្មើសមកផ្តន្ទាទោស ទៅតាមច្បាប់រាប់សិបករណី។
នាយឧត្តមសេនីយ៍ ក៏បានលើកទ្បើងអំពី EBA (Everything But Arms) ដោយថ្មីៗនេះទោះជាសហគមន៍អឺរ៉ុប បានចាប់ផ្តើមនៅក្នុងខែកុម្ភៈនូវដំណើរការរយៈពេល ១៨ខែ ដែលអាចនាំឲ្យមានការផ្អាកជាបណ្តោះអាសន្ន នៃការធ្វើពាណិជ្ជកម្ម ដោយអនុគ្រោះពន្ធ របស់ប្រទេសកម្ពុជាទៅកាន់ទីផ្សារសហគមន៍អឺរ៉ុបក្រោមគម្រោង EBA យើងខ្ញុំសង្ឃឹមថាកិច្ចព្រមព្រៀង ដែលបានចុះហត្ថលេខានាថ្ងៃនេះ នឹងជាកម្លាំងចលករ និងហេតុផលសំខាន់មួយបន្ថែមទៀត ក្នុងការជម្រុញធ្វើឲ្យសហគមន៍អឺរ៉ុបពិចារណាទ្បើងវិញលើចេតនា និងឆន្ទៈកម្ពុជា ក្នុងកិច្ចប្រឹងប្រែងសហការជាមួយសហគមន៍អឺរ៉ុបនិងពិភពលោកទាំងមូល ដើម្បីការពារផលប្រយោជន៍អ្នកវិនិយោគទុនទាំងក្នុងប្រទេស-ក្រៅប្រទេស និងភាពរីកចម្រើនខាងសេដ្ឋកិច្ច សុខសន្តិភាព វិបុលភាព ការគោរពផលប្រយោជន៍គ្នាទៅវិញទៅមក និងមិនជ្រាតជ្រែកចូលអធិបតេយ្យភាព របស់ប្រទេសរៀងៗខ្លួន។
ក្នុងសេចក្តីថ្លែង របស់លោក ARNAUD Darc ប្រធានសភាពាណិជ្ជកម្មអឺរ៉ុបប្រចាំកម្ពុជា (EUROCHAM) បានថ្លែងថា ជាការពិតនៅពេលក្រុមហ៊ុនឯកជនព្យាយាមនាំចូល និងចែកចាយឱសថដែលមានគុណភាពនៅក្នុងប្រទេសកម្ពុជា បញ្ហាប្រឈមធំបំផុតមួយ គឺវត្តមានឱសថក្លែងក្លាយ ដែលកំពុងគំរាមកំហែងដល់អាយុជីវិត របស់អ្នកជំងឺរាប់ពាន់នាក់។ ដូច្នេះ អស់រយៈពេល២ឆ្នាំហើយ យើងបានសហការជាមួយគណៈកម្មាធិការ គ.ប.ផ.ក ក្រសួងសុខាភិបាល និងជាមួយស្ថាប័នដទៃទៀត ដើម្បីជួយគាំទ្រដល់ការប្រយុទ្ធប្រឆាំងនឹងឱសថក្លែងក្លាយ។
លោក ARNAUD Darc បានបន្តថានាខែកុម្ភៈ ឆ្នាំ២០១៨ EUROCHAM បានរៀបចំកម្មវិធីវេទិកាស្តីពី កម្មសិទ្ធិបញ្ញា ក្រោមអធិបតីភាព នាយឧត្តមសេនីយ៍ មៀច សុផាន់ណា ដោយមានការចូលរួមពីភាគីពាក់ព័ន្ធជាច្រើនមកពីរាជរដ្ឋាភិបាល និងវិស័យឯកជន ចំនួន១៥០រូប និងនាខែវិច្ឆិកា ឆ្នាំ ២០១៨ សមាជិករបស់ EUROCHAM មកពីឧស្សាហកម្មឱសថក៏បានចូលរួមធ្វើបទបង្ហាញក្នុងសន្និសីទថ្នាក់តំបន់ស្តីពី«ការប្រយុទ្ធប្រឆាំងឱសថក្លែងក្លាយ និងអន់គុណភាព» ក្រោមអធិបតីភាព សម្តេចអគ្គមហាសេនាបតីតេជោ នាយករដ្ឋមន្ត្រីនៃកម្ពុជា។ យើងរួមគ្នាធ្វើការដោយមិនចេះនឿយហត់ ដើម្បីជូនដំណឹងដល់ប្រជាពលរដ្ឋ មន្ត្រីរាជការ និងក្រុមហ៊ុនឯកជន អំពីភាពចាំបាច់ ដើម្បីប្រយុទ្ធប្រឆាំងនឹងផលិតកម្ម ការចែកចាយ និងការប្រើប្រាស់ផលិតផលក្លែងក្លាយ។
តាមរយៈការចុះហត្ថលេខាលើអនុស្សរណៈយោគយល់ ដែលបានទន្ទឹងរងចាំជាយូរមកហើយ យើងសង្ឃឹមថាមិនត្រឹមតែសមាជិក របស់យើងប៉ុណ្ណោះទេ ប៉ុន្តែទាំងផ្នែកឯកជនទាំងមូលនឹងឃើញពាក្យបណ្តឹងរបស់ពួកគេប្រឆាំងនឹងការក្លែងបន្លំ ត្រូវបានដោះស្រាយប្រកបដោយប្រសិទ្ធភាព។
ឆ្លៀតក្នុងឱកាសនោះ លោក ARNAUD Darc ក៏សូមអំពាវនាវឱ្យមានការសហការជិតស្និទ្ធ និងប្រកបដោយប្រសិទ្ធភាព រវាងអាជ្ញាធរពាក់ព័ន្ធទាំងអស់ដូចជា៖ ក្រសួងមហាផ្ទៃ អគ្គនាយកដ្ឋានគយ និងរដ្ឋាករ ក្រសួងយុត្តិធម៌ និងក្រសួងសុខាភិបាល នៅពេលមានករណី ឱសថ និងគ្រឿងសំអាងក្លែងក្លាយ។
សូមរំលឹកផងដែរ សភាពាណិជ្ជកម្មអឺរ៉ុបនៅកម្ពុជា (EUROCHAM) ត្រូវបានសម្ពោធ និងបង្កើតទ្បើងកាលពីថ្ងៃទី១៩ ខែឧសភា ឆ្នាំ២០១១ នៅកម្ពុជា ក្នុងគោលបំណងលើកកម្ពស់ផលប្រយោជន៍ធុរកិច្ចអឺរ៉ុប ដែលកំពុងប្រតិបត្តិការ នៅក្នុងព្រះរាជាណាចក្រកម្ពុជា ដើម្បីសម្រួលដល់ក្រុមហ៊ុនអឺរ៉ុបមកទីផ្សារកម្ពុជា និងបង្កើតបណ្តាញគាំទ្រឲ្យបានទូលំទូលាយ ក្នុងចំណោមសមាជិកក្រុមហ៊ុនរបស់ខ្លួន។ បច្ចុប្បន្ន EUROCHAM នៅកម្ពុជាមានក្រុមហ៊ុនជាង៣៤០ ជាសមាជិក។
គូសបញ្ជាក់ផងដែរ ការចុះអនុស្សរណៈ នៃការយោគយល់គ្នារវាង គ.ប.ផ.ក និង EUROCHAM នៅកម្ពុជា គឺក្នុងគោលបំណងធ្វើកិច្ចសហប្រតិបត្តិការ ដើម្បីទប់ស្កាត់ និងប្រយុទ្ធប្រឆាំងការនាំចូល ការផលិត និងការចែកចាយនូវផលិតផលខូចគុណភាព ផលិតផលហួសកាលបរិច្ឆេទ និងផលិតផលបំពានច្បាប់ដ៏ទៃទៀតនៅព្រះរាជាណាចក្រកម្ពុជា។ ក្នុងកិច្ចសហប្រតិបត្តិការនេះមិនត្រឹមតែផ្តល់អត្ថប្រយោជ៍ដល់អ្នកប្រើប្រាស់ប៉ុណ្ណោះទេ គឺថែមទាំងការពារសុខុមាលភាពប្រជាពលរដ្ឋ និងដើម្បីការពារអ្នកវិនិយោគសុច្ចរិត និងសហគ្រាសទាំងទ្បាយ ដែលប្រកបមុខរបរ ស្របច្បាប់ លើកទឹកចិត្ត ការប្រកួតប្រជែងដោយភាពត្រឹមត្រូវ ដើម្បីរួមចំណែកក្នុងការអភិវឌ្ឈសេដ្ឋកិច្ច និងសង្គមកម្ពុជា ។
ជាទីបញ្ចប់ នាយឧត្តមសេនីយ៍ មៀច សុផាន់ណា បានថ្លែងអំណរគុណចំពោះ រាជរដ្ឋាភិបាលកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី និងក៏បានថ្លែងអំណរគុណចំពោះ សម្តេចក្រទ្បាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលផ្តល់ការដឹកនាំ និងអនុញ្ញាតឲ្យមាន អនុស្សរណៈនេះ រួមចំណែក ផ្តល់ផ្លែផ្កាដល់សេដ្ឋកិច្ចកម្ពុជា ដូចការរំពឹងទុកក្នុងខ្លឹមសារ នៃឯកសារនេះ ៕
ចំនួនអ្នកទស្សនា
- ថ្ងៃនេះ12711
- ម្សិលមិញ20231
- សប្តាហ៍នេះ91791
- ខែនេះ113671
- ឆ្នាំនេះ113671
- សរុប20556127