អាវុធហត្ថរាជធានីភ្នំពេញ បញ្ជូនក្រុមចោរឆក់ ០៦នាក់ ទៅតុលាការ
12-September-2019 | ដោយ ពលមនសិការ
ភ្នំពេញ៖ នៅព្រឹកថ្ងៃទី១២ ខែកញ្ញា ឆ្នាំ២០១៩ សមត្ថកិច្ចជំនាញនៃការិយាល័យបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូនជនសង្ស័យ ជាក្រុមចោរឆក់ ០៦នាក់ ទៅតុលាការ ដើម្បីផ្តន្ទាទោសតាមច្បាប់។
មន្ត្រីកងរាជអាវុធហត្ថរាជធានីភ្នំពេញ បានឲ្យដឹងថាជនសង្ស័យទី១-ឈ្មោះ ជី លីហេង ហៅឆើត ភេទប្រុស អាយុ ១៧ឆ្នាំ, ទី២-ឈ្មោះ សន ពិសិទ្ធ ភេទប្រុស អាយុ១៦ឆ្នាំ, ទី៣-ឈ្មោះ សូ ណងបុត្រា ភេទប្រុស អាយុ១៤ឆ្នាំ, ទី៤- ឈ្មោះ គុជ ពីរតនា ភេទប្រុស អាយុ១៩ឆ្នាំ, ទី៥-ឈ្មោះឱម ជ័យរ័ត្ន ភេទប្រុស អាយុ២៨ឆ្នាំ ទាំង០៥នាក់នេះត្រូវបានកម្លាំងអាវុធហត្ថទួលគោកប្រដេញតាមរហូតដល់ភូមិសាស្ត្រខណ្ឌដង្កោ ហើយសហការជាមួយអាវុធហត្ថខណ្ឌដង្កោ និងសមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្ម អាវុធហត្ថរាជធានីភ្នំពេញ ឃាត់ខ្លួនបានកាលពីវេលាម៉ោង១៣៖០០នាទី នៅផ្ទះរបស់ពួកគេ ចំណុចបាគូ សង្កាត់ដង្កោ ខណ្ឌដង្កោ រាជធានីភ្នំពេញ។
រីឯម្នាក់ទៀត ឈ្មោះ ថន ចន្ធី ភេទប្រុស អាយុ១៩ឆ្នាំ ត្រូវបានកម្លាំងអាវុធហត្ថខណ្ឌទួលគោក បន្តសហការជាមួយសមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្ម អាវុធហត្ថរាជធានីភ្នំពេញ ឃាត់ខ្លួនកាលពីវេលាម៉ោង១៤៖០០នាទី នៅចំណុចស្តង់បុរីកីឡា សង្កាត់វាលវង់ ខណ្ឌ៧មករា រាជធានីភ្នំពេញ។
សរុបជនសង្ស័យទាំង០៦នាក់ ខាងលើ គឺជាបក្ខពួកក្រុមចោរឆក់ តែមួយ បានធ្វើសកម្មភាពឆក់ទូរស័ព្ទដៃ ពីស្ត្រីជនរងគ្រោះជាជនជាតិចិន បានសម្រេច នៅចំណុចផ្លូវ១២៨ កែងផ្លូវ២៤៥ សង្កាត់ទឹកល្អក់១ ខណ្ឌទួលគោក រាជធានីភ្នំពេញ កាលពីថ្ងៃទី០៦ ខែកញ្ញា ឆ្នាំ២០១៩ វេលាម៉ោង២០៖៣០នាទី និងត្រូវបានកម្លាំងអាវុធហត្ថ ស្រាវជ្រាវ ឃាត់ខ្លួនជាបន្តបន្ទាប់ នៅថ្ងៃទី០៧ ខែកញ្ញា ឆ្នាំ២០១៩ ៕
ចំនួនអ្នកទស្សនា
- ថ្ងៃនេះ13111
- ម្សិលមិញ20231
- សប្តាហ៍នេះ92191
- ខែនេះ114071
- ឆ្នាំនេះ114071
- សរុប20556527