ប៉ៃលិន៖ កាលពីវេលាម៉ោង១៨និង៣០នាទីល្ងាច ថ្ងៃព្រហស្បតិ៍ ១៤កើត ខែភទ្របទ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១២ ខែកញ្ញា ឆ្នាំ២០១៩ លោកវរសេនីយ៍ទោ យ៉ែម សារិទ្ធ អធិការនគរបាលក្រុងប៉ៃលិន បានបញ្ជា ឲ្យកម្លាំងផ្នែកប្រឆាំងបទល្មើសគ្រឿងញៀន នៃអធិការដ្ឋាននគរបាលក្រុងប៉ៃលិន ល្បាតនៅចំណុចចខាងក្រោយកសិដ្ឋានចិញ្ចឹមជ្រូក ស្ថិតនៅភូមិពេជ្រគិរី សង្កាត់ប៉ៃលិន ក្រុងប៉ៃលិន ខេត្តប៉ៃលិន ប្រទះឃើញមុខសញ្ញាគួរអោយសង្ស័យម្នាក់ ពេលនោះកម្លាំងជំនាញក៏បានហៅអោយឈប់ដើម្បីសាកសួរ និងបានអោយជនសង្ស័យខាងលើលូកហោប៉ៅខោខ្លួនឯងចេញមកក្រៅ ក៏ឃើញមានម្សៅក្រាមពណ៌សថ្លា (សង្ស័យថាជាម៉ាទឹកកក) ចំនួន០១កញ្ចប់។

ជនសង្ស័យ មានឈ្មោះ ខាន់ វុទ្ធី ភេទប្រុស អាយុ២៧ឆ្នាំ សញ្ជាតិខ្មែរ មុខរបរកសិករ រស់នៅភូមិតាគ្រក់ ឃុំត្រែងស្រុករតនមណ្ឌល ខេត្តបាត់ដំបង។ បន្ទាប់ពីបានរកឃើញនូវវត្ថុតាងខាងលើកម្លាំងជំនាញក៏បាននាំខ្លួនជនសង្ស័យទៅកាន់អធិការដ្ឋាននគរបាលក្រុងប៉ៃលិន។ បច្ចុប្បន្នកម្លាំងជំនាញកំពុងសាកសួរ និងក៏សាងសំណុំរឿងតាមនីតិវិធីច្បាប់៕