កម្លាំងចម្រុះ កំពុងប្រតិបត្តិការរុករកប្រជាពលរដ្ឋខ្មែរចំនួន២នាក់ នៅស្រុកសំឡូត
18-September-2019 | ដោយ ពលមនសិការ
បាត់ដំបង៖ លោកឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ បានឲ្យដឹងតាមបណ្តាញទំនាក់ទំនងថា នៅព្រឹកថ្ងៃទី១៨ ខែកញ្ញា ឆ្នាំ២០១៩នេះ កម្លាំងចម្រុះ២៥នាក់ ដែលមានអាជ្ញាធរ កងកម្លាំងប្រដាប់អាវុធ និងប្រជាពលរដ្ឋ បានបន្តប្រតិបត្តិការរុករកប្រជាពលរដ្ឋខ្មែរចំនួន២នាក់ ដែលបានបាត់ខ្លួន នៅចំណុចព្រំដែនកម្ពុជា-ថៃ ច្រកពាមតា ឃុំតាតោក ស្រុកសំឡូត ខេត្តបាត់ដំបង កាលពីថ្ងៃទី១៦ ខែកញ្ញា ឆ្នាំ២០១៩។
នាយឧត្តមសេនីយ៍ បានឲ្យដឹងបន្តថាការបាត់ខ្លួនប្រជាពលរដ្ឋខ្មែរទាំង២រូបនោះ គឺបាត់ខ្លួននៅក្នុងទឹកដីថៃ ភាគីកម្ពុជាក៏បាន និងកំពុង សហការជាមួយភាគីថៃ ដើម្បីរុករកជនរងគ្រោះផងដែរ។
ប្រតិបត្តិការនេះ កំពុងទទួលបានការយកចិត្តទុកដាក់ និងបញ្ជារផ្ទាល់ពី ឯកឧត្តម គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ខណៈដែលក្រុមការងារ កំពុងតែមមាញឹកក្នុងប្រតិបត្តិការរុករក។
សូមបញ្ជាក់ថា កាលពីថ្ងៃចន្ទ មានពលរដ្ឋ៧នាក់ បានចូលទៅក្នុងព្រៃ នៅចំណុចព្រំដែនកម្ពុជា-ថៃ ច្រកពាមតា ឃុំតាតោក ហើយត្រូវបានជំនន់ទឹកភ្លៀងវាយប្រហារបណ្តាលឱ្យដីភ្នំបាក់សង្កត់ ក្នុងនោះមានពលរដ្ឋ៤នាក់ បានរត់រួចខ្លួន ម្នាក់រងរបួសធ្ងន់ និង២នាក់បាត់ខ្លួន ៕
ចំនួនអ្នកទស្សនា
- ថ្ងៃនេះ13131
- ម្សិលមិញ20231
- សប្តាហ៍នេះ92211
- ខែនេះ114091
- ឆ្នាំនេះ114091
- សរុប20556547