លោកស្នងការនគរបាលខេត្តកំពង់ធំ ដឹកនាំកងកម្លាំងនគរបាលចូលរួមដាំកូនឈើចំនួន១៥០ដើម
19-September-2019 | ដោយ ពលមនសិការ
កំពង់ធំ៖ ព្រឹកថ្ងៃព្រហស្បតិ៍ ០៦រោច ខែភទ្របទ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៩ ខែកញ្ញា ឆ្នាំ២០១៩ ឯកឧត្តម ឈុន ឈន់ ប្រធានក្រុមប្រឹក្សាខេត្តកំពង់ធំ និងឯកឧត្តម សុខ លូ អភិបាលខេត្តកំពង់ធំ បានអញ្ជើញជាអធិបតីភាព ក្នុងកម្មវិធីដាំកូនឈើ ស្ថិតនៅវិទ្យាល័យកំពង់ធំ ក្នុងសង្កាត់ អាចារ្យលាក់ ក្រុងស្ទឹងសែន ខេត្តកំពង់ធំ។
ដោយមានការអញ្ជើញចូលរួម អស់លោក លោកស្រី ប្រធានមន្ទីរអង្គភាពជុំវិញខេត្តកំពង់ធំ ប្រជាពលរដ្ឋ លោកគ្រូ អ្នកគ្រូ យុវជនកាយរិទ្ធកម្ពុជា សិស្សានុសិស្សចូលរួមយ៉ាងច្រើនកុះករ។
ឯកឧត្តម សុខ លូ អភិបាលខេត្តកំពង់ធំ មានប្រសាសន៍ សំណេះសំណាល លើកឡើងកូនឈើដែលយកមកដាំនាព្រឹកនាំនេះ គឺបានមកពីការឧបត្ថម្ភ របស់គំរោងមូលនិធិបន្ដបំរែបំរួលអាកាសធាតុ នៃក្រសួងបរិស្ថាន ដែលបានឧបត្ថម្ភកូនឈើចំនួន ២ម៉ឺន ដែលមានប្រភេទកូនឈើចំរុះដូចជា៖ក្រញូង ធ្នង់ បេង ឈើទាល ផ្ដេក ...។ល។
ជាក់ស្ដែងនាព្រឹកនេះ កូនឈើប្រភេទក្រញូងចំនួន៨០៥ ត្រូវបានបែងចែក ទៅតាមមន្ទីរអង្គភាព ដើម្បីដាក់ដាំបន្តគ្នាជាបន្ទាត់ទាំងសង់ខាងផ្លូវជាតិលេខ6A ដោយចាប់ផ្ដើមពីចំនុចរង្វង់មូល ពោធិ៍អង្ក្រង ដល់ចំនុច រូបសំណាកដាវដែកកំពង់ស្វាយ "ផ្លូវបំបែកខេត្តព្រះវិហារ" ក្នុងនោះអង្គភាព នៃស្នងការដ្ឋាននគរបាលខេត្តកំពង់ធំ ដឹកនាំដោយលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ បានដឹកនាំមន្ត្រីនគរបាលចូលរួមដាំកូនឈើចំនួន១៥០ ដើមផងដែរ។
ឯកឧត្ដម អភិបាលខេត្ត បានណែនាំ ដល់អស់លោកលោកស្រី បន្ទាប់ពីបានដាំកូនឈើ រួចមកត្រូវថែរក្សាដោយធ្វើរបងស៊ុហ៊ុព័ទ្ធជុំវិញកូនឈើ និងបន្តថែទាំស្រោចទឹកជាប្រចាំ ដើម្បីឲ្យកូនឈើមានកម្លាំងឆាប់មានការលូតលាស់បានល្អ ដែលផ្តល់អត្ថប្រយោជន៍សំខាន់បំផុតដល់មនុស្ស សត្វ តាមរយៈបរិស្ថាន។
ឯកឧត្តម អភិបាលខេត្ត បានបន្តមានប្រសាសន៍ ឯកឧត្តមមានគំរោងដាំដើមឈើប្រណីតនៅតាមបរិវេណសួនថ្មីដែលទើបស្ថាបនារួច តាមបណ្តោយដងស្ទឹងសែននាពេលខាងមុខនេះ។ ចំពោះកូនឈើដែលនៅសល ឯកឧត្តម អភិបាលខេត្ត បានបែងចែក ដល់ក្រុង-ស្រុកទាំង០៩ ដើម្បីយកទៅដាក់ដាំជាបន្តបន្ទាប់ដើម្បីចូលរួមលើកកម្ពស់សោភ័ណ្ឌភាព
និងបំផុសស្មារតីដល់ប្រជាពលរដ្ឋ ឲ្យចូលដាំដើមឈើ នៅតាមមូលដ្ឋានដែលខ្លួនរស់នៅ ៕
ចំនួនអ្នកទស្សនា
- ថ្ងៃនេះ13341
- ម្សិលមិញ20231
- សប្តាហ៍នេះ92421
- ខែនេះ114301
- ឆ្នាំនេះ114301
- សរុប20556757