លោក ប្រាក់ សុខុន បានអនុញ្ញាតឲ្យឯកឧត្តម MIKAMI Masahiro ឯកអគ្គរាជទូតជប៉ុនថ្មីប្រចាំនៅព្រះរាជាណាចក្រកម្ពុជា ចូលជួបសម្តែងការគួរសម
24-September-2019 | ដោយ ពលមនសិការ
ភ្នំពេញ៖ កាលពីព្រឹកថ្ងៃទី២៣ ខែ កញ្ញា ឆ្នាំ២០១៩ ឯកឧត្តម ឧបនាយករដ្ឋមន្ត្រី ប្រាក់ សុខុន បានអនុញ្ញាតឲ្យឯកឧត្តម MIKAMI Masahiro ឯកអគ្គរាជទូតជប៉ុនថ្មីប្រចាំនៅព្រះរាជាណាចក្រកម្ពុជា ចូលជួបសម្តែងការគួរសម នៅទីស្តីការក្រសួង ។
ជាបឋម ឯកឧត្តម ឧបនាយករដ្ឋមន្ត្រី បានសម្តែងនូវការស្វាគមន៍ និងអបអរសាទរយ៉ាងកក់ក្តៅចំពោះឯកឧត្តមឯកអគ្គរាជទូតថ្មី ក្នុងការបំពេញបេសកកម្មការទូតនៅកម្ពុជា។ ឯកឧត្តម ឧបនាយករដ្ឋមន្ត្រី ក៏បានសម្តែងនូវកី្តសប្បាយរីករាយ ដោយកត់សម្គាល់ឃើញទំនាក់ទំនងនៃប្រទេសទាំងពីរបន្តរីកចម្រើនឥតឈប់ឈរ។
ឯកឧត្តម ឧបនាយករដ្ឋមន្ត្រី បានកត់សម្គាល់ថា កាលពីខែឧសភាកន្លងទៅ សម្តេចតេជោ
នាយករដ្ឋមន្ត្រី បានអញ្ជើញចូលរួមសន្និសីទអន្តរជាតិស្តីពីអនាគតអាស៊ី នៅទីក្រុងតូក្យូ និងបានរួមអាហារ
ថ្ងៃត្រង់ការងារជាមួយឯកឧត្តមនាយករដ្ឋមន្ត្រីជប៉ុន ABE Shinzo ដែលនៅពេលនោះ ឯកឧត្តមនាយករដ្ឋមន្ត្រី ជប៉ុន បានសម្តែងនូវការគាំទ្រដំណើរការអភិវឌ្ឍន៍នៅកម្ពុជា។ ទន្ទឹមនេះដែរ ឯកឧត្តម ឧបនាយករដ្ឋមន្ត្រី ក៏មានការជួបពិភាក្សាគ្នាយ៉ាងល្អ និងមានលក្ខណៈត្រង់ទៅត្រង់មកជាមួយអតីតរដ្ឋមន្ត្រីការបរទេសជប៉ុនឯកឧត្តម Taro Kono អំពីបញ្ហាទ្វេភាគី តំបន់ និងអន្តរជាតិផងដែរ។ នៅខែតុលាខាងមុខនេះ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី នឹងយាងចូលរួមពិធីឡើងគ្រងរាជ្យរបស់ព្រះចៅអធិរាជថ្មីជប៉ុន Naruhito ។
ឯកឧត្តម ឧបនាយករដ្ឋមន្ត្រី បានបញ្ជាក់ថា ក្រសួងការបរទេស នឹងផ្តល់កិច្ចសហប្រតិបត្តិការយ៉ាងពេញទំហឹង ជូនឯកឧត្តមឯកអគ្គរាជទូត ដើម្បីសម្រេចបេសកកម្មការទូតរបស់ឯកឧត្តមដោយជោគជ័យនៅកម្ពុជា។
ឯកឧត្តមឯកអគ្គរាជទូត ជម្រាបថា ឯកឧត្តមធ្លាប់អញ្ជើញមកកម្ពុជាម្តងកាលពី១៧ឆ្នាំមុន ក្នុងពេលដែលកម្ពុជាធ្វើជាម្ចាស់ផ្ទះនៃកិច្ចប្រជុំកំពូលអាស៊ាននៅឆ្នាំ២០០២។ ឯកឧត្តម សម្តែងនូវការកោតស្ញប់ស្ញែង និងអបអរសាទរដល់ប្រជាជន និងរាជរដ្ឋាភិបាលកម្ពុជា ដែលក្រោយពីបានហែលឆ្លងកាត់ទុក្ខលំបាកវេទនាជាច្រើន នៅក្នុងពេលអតីតកាល សម្រេចបាននូវការអភិវឌ្ឍសេដ្ឋកិច្ចជារួមដូចបច្ចុប្បន្ននេះ។
ឆ្លៀតឱកាសនេះ ឯកឧត្តម ឧបនាយករដ្ឋមន្ត្រី បានថ្លែងអំណរគុណដល់រដ្ឋាភិបាល និងប្រជាជន ជប៉ុនដែលតែងតែគាំទ្រកម្ពុជា ដោយចាប់ផ្តើមពីដំណើរការស្វែងរកសន្តិភាព រហូតដល់ដំណើរការអភិវឌ្ឍន៍សេដ្ឋកិច្ចនិងសង្គម។ ឯកឧត្តម ឧបនាយករដ្ឋមន្ត្រី បញ្ជាក់ថា មិត្តភក្តិជប៉ុន ដែលធ្លាប់ឆ្លងកាត់សង្គ្រាមដូចគ្នា គឺពិតជាបានយល់ច្បាស់ពីការលំបាករបស់កម្ពុជា។ បច្ចុប្បន្ន ប្រជាជនកម្ពុជាទាំងមូលកំពុងទទួលបានសន្តិភាពពេញលេញ និងស្ថិរភាពនយោបាយ ដែលទិដ្ឋភាពនេះត្រូវបានឆ្លុះបញ្ចាំងតាមរយៈការបោះឆ្នោតកាលពីឆ្នាំមុន ដោយមានប្រជាពលរដ្ឋ ៨៣,០២% ចេញទៅបោះឆ្នោត ហើយប្រជាពលរដ្ឋប្រមាណ៧៧% បានគាំទ្រដល់កម្មវិធីនយោបាយរបស់រាជរដ្ឋាភិបាល។
ទន្ទឹមនឹងនេះ ឯកឧត្តម ឧបនាយករដ្ឋមន្ត្រី បានកត់សម្គាល់ដោយពេញចិត្ត នូវកំណើនពាណិជ្ជកម្មរវាងប្រទេសទាំងពីរ ដែលក្នុងរយៈពេល៥ខែដើមឆ្នាំ២០១៩នេះ មានទំហំរហូតដល់ជាងពីរប៊ីលានដុល្លារអាមេរិក ជាពិសេស ក្រោយពីមានការតភ្ជាប់ជើងហោះហើរត្រង់ ដែលមិនត្រឹមតែបានជំរុញការផ្លាស់ប្តូរប្រជាជននឹងប្រជាជនប៉ុណ្ណាះទេ តែថែមទាំងរួមចំណែកដល់ការជំរុញពាណិជ្ជកម្ម និងវិនិយោគផងដែរ។
ឯកឧត្តមឯកអគ្គរាជទូត បានសម្តែងនូវការរីករាយ ដោយឃើញមានការវិវត្តក្នុងវិស័យជាច្រើននៃកិច្ចសហប្រតិបត្តិការ។ សម្តេចតេជោនាយករដ្ឋមន្ត្រី ក្នុងរយៈពេលបីឆ្នាំកន្លងមកនេះ បានអញ្ជើញទៅបំពេញទស្សនកិច្ចនៅជប៉ុន ហើយគ្រប់ពេលទាំងអស់ សម្តេចតែងមានប្រសាសន៍ពន្យល់ពីស្ថានភាព និងលក្ខខណ្ឌអនុគ្រោះក្នុងការវិនិយោគនៅកម្ពុជាដល់ធុរជនជប៉ុន។ ប្រសាសន៍របស់សម្តេចតេជោ បានជំរុញឱ្យក្រុមហ៊ុនជប៉ុនកាន់តែច្រើន ចង់មកវិនិយោគនៅកម្ពុជា។ ទន្ទឹមនេះ ជប៉ុនក៏អរគុណដល់រាជរដ្ឋាភិបាលកម្ពុជា ចំពោះការគាំទ្រគំនិតផ្តួចផ្តើម Free and Open Indo-pacific របស់ជប៉ុន និងការគាំទ្រនៅក្នុងវេទិកាអន្តរជាតិ ផ្សេងៗទៀតផងដែរ។ ក្រៅពីនេះ ឯកឧត្តមឯកអគ្គរាជទូត ក៏បានកត់សម្គាល់ឃើញពីកំណើនរបស់ប្រជាជនកម្ពុជា អញ្ជើញទៅប្រទេសជប៉ុន។
ជាការឆ្លើយតប ឯកឧត្តមឧបនាយករដ្ឋមន្ត្រី បានបញ្ជាក់ថា កម្ពុជាតែងរក្សាជំហរដោយសង្គតិភាពក្នុងការគាំទ្រជប៉ុន នៅក្នុងក្របខណ្ឌតំបន់ និងអន្តរជាតិនានា។ ឯកឧត្តមឧបនាយករដ្ឋមន្ត្រី ក៏បានជម្រាបជូនឯកឧត្តមឯកអគ្គរាជទូតថា អាស៊ានក៏មានចក្ខុវិស័យស្តីពី Indo-Pacific នេះផងដែរ ដែលទាំងកម្ពុជា និងអាស៊ាន ចង់ឃើញគំនិតផ្តួចផ្តើមទាំងនេះ បំពេញបន្ថែមឲ្យគ្នាទៅវិញទៅមក និងមិនប្រឆាំងគ្នា។
ឯកឧត្តម ឧបនាយករដ្ឋមន្ត្រី បានជម្រាបជូនបន្ថែមដល់ ឯកឧត្តមឯកអគ្គរាជទូត ថា រាជរដ្ឋាភិបាល កម្ពុជាបន្តកិច្ចសន្ទនាជាមួយសហភាពអឺរ៉ុប ពាក់ព័ន្ធនឹងករណី EBA។ ទន្ទឹមនឹងកម្ពុជាផ្តល់សារៈសំខាន់ដល់ភាពជាដៃគូជាមួយសហភាពអឺរ៉ុប កម្ពុជាក៏បានគូសបន្ទាត់ក្រហមដែលមិនអាចឆ្លងបាន ដែលនោះគឺដែនអធិបតេយ្យរបស់កម្ពុជា ៕
.jpg)
ចំនួនអ្នកទស្សនា
- ថ្ងៃនេះ11451
- ម្សិលមិញ20231
- សប្តាហ៍នេះ90531
- ខែនេះ112411
- ឆ្នាំនេះ112411
- សរុប20554867