ក្រសួងការពារជាតិប្រទេសកម្ពុជា-ចិន បានចុះកិច្ចព្រមព្រៀង ស្តីកិច្ចសហប្រតិបត្តិការវាងកងទ័ពកម្ពុជា-ចិន
22-October-2019 | ដោយ ពលមនសិការ
ភ្នំពេញ៖ ឯកឧត្តម នាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ បានឱ្យដឹងថានៅថ្ងៃទី២២ ខែតុលា ឆ្នាំ២០១៩នេះថា អំឡុងទស្សនកិច្ចរបស់ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៅកាន់សាធារណរដ្ឋប្រជាមានិតចិន កាលពីថ្ងៃទី២០ ខែតុលា ឆ្នាំ២០១៩ កន្លងទៅនេះ ក្រសួងការពារជាតិប្រទេសទាំងពីរកម្ពុជា-ចិន បានចុះកិច្ចព្រមព្រៀង ស្តីកិច្ចសហប្រតិបត្តិការវាងកងទ័ពកម្ពុជា-ចិន។
នាយឧត្តមសេនីយ៍ អ្នកនាំពាក្យក្រសួងការពារជាតិ បានបន្តថាមិត្តភាពរវាងប្រទេសទាំងពីរប្រៀបដូចដែកថែប ក្នុងដំណាក់កាលនៃការដឹកនាំរបស់របស់ ឯកឧត្តមប្រធានាធិបតី ស៊ី ជីនពីង និង សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលធ្វើឱ្យកិច្ចសហប្រតិបត្តិការរវាងប្រទេសទាំងពីរមានលក្ខណៈគ្រប់ជ្រុងជ្រោយ កាន់តែស៊ីជម្រៅ ហើយស្ថិតក្នុងកម្រិតខ្ពស់ជាងគេក្នុងប្រវត្តិសាស្ត្រ។ កិច្ចសហប្រតិបត្តិការរវាងកងទ័ពប្រទេសទាំងពីរ បានក្លាយទៅជាយន្តការមួយ ដែលបានជួយជំរុញដល់ការអភិវឌ្ឍទំនាក់ទំនងរវាងប្រទេសទាំងពីរកម្ពុជា និងចិន។
នៅក្នុងឱកាសជំនួបជាមួយ ឯកឧត្តម វ៉េ ហ្វ៊ុងហឺ រដ្ឋមន្ត្រីក្រសួងការពារជាតិ នៃសាធារណរដ្ឋប្រជាមានិតចិន, សម្តេចពិជ័យសេនាទៀ បាញ់ បានបង្ហាញថា ទំនាក់ទំនងមិត្តភាពរវាងប្រជាជន និង កងទ័ពប្រទេសទាំងពីរកម្ពុជា-ចិន ដែលបានចាប់ផ្តើមដោយថ្នាក់ដឹកនាំគ្រប់ជំនាន់ រហូតមកដល់បច្ចុប្បន្ននេះត្រូវបានពង្រឹង និងពង្រីកថែមទៀតយ៉ាងខ្លាំងក្លា ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន។
សម្តេចពិជ័យសេនាបានវាយតម្លៃខ្ពស់ និង មានជំនឿជឿជាក់ជាមួយតួនាទីដ៏សំខាន់មិនអាចខ្វះបានរបស់ប្រទេសចិន ជាពិសេសតួនាទីរបស់កងទ័ពរំដោះប្រជាជនចិន ដែលបានចូលរួមយ៉ាងស្វាហាប់ និង យ៉ាងមោះមុតក្នុងការកសាង និងអភិវឌ្ឍ ចំពោះសន្តិភាព និង ការអភិវឌ្ឍក្នុងតំបន់ ក៏ដូចជាក្នុងពិភពលោក។
សម្តេចពិជ័យសេនា បានថ្លែងអំណរគុណចំពោះការជួយជ្រោមជ្រែងផ្តល់ការជួយឧបត្ថម្ភក្នុងការអនុវត្តកិច្ចសហប្រតិបត្តិការទ្វេរភាគី រវាងកងទ័ពទាំងពីរកម្ពុជា-ចិន ដូចជាការផ្លាស់ប្តូរគណៈប្រតិភូ ការបង្កើនកម្រិតនៃការធ្វើលំហាត់ហ្វឹកហ្វឺន បង្កើនប្រសិទ្ធភាពនៃការបណ្តុះបណ្តាលធនធានមនុស្ស រួមទាំងកិច្ចសហប្រតិបត្តិការកម្រិតតំបន់ និង អន្តរជាតិផងដែរ ដែលបានធ្វើឱ្យទំនាក់ទំនងកងទ័ពទាំងពីរកាន់តែរឹងមាំ ៕
ចំនួនអ្នកទស្សនា
- ថ្ងៃនេះ9411
- ម្សិលមិញ20231
- សប្តាហ៍នេះ88491
- ខែនេះ110371
- ឆ្នាំនេះ110371
- សរុប20552827