ព្រឹទ្ធសភាបើកសម័យប្រជុំលើកទី៤ ព្រឹទ្ធសភា នីតិកាលទី៤ ស្តាប់របាយការណ៍ស្តីពី សកម្មភាពការងារ របស់ព្រឹទ្ធសភា
24-October-2019 | ដោយ ពលមនសិការ
ភ្នំពេញ៖ ព្រឹកថ្ងៃទី២៤ ខែតុលានេះព្រឹទ្ធសភាបានបើកសម័យប្រជុំលើកទី៤ ព្រឹទ្ធសភា នីតិកាលទី៤ ក្រោមអធិបតីភាពឯកឧត្តម ស៊ីម កា អនុប្រធានទី១ ព្រឹទ្ធសភានៃព្រះរាជាណាចក្រកម្ពុជា និងដោយមានវត្តមានចូលរួមពី សមាជិក សមាជិកា ព្រឹទ្ធសភាចំនួន ៥៨រូប។
យោងតាមសេចក្តីប្រកាសព័ត៌មានស្តីពី លទ្ធផលនៃការបើកសម័យប្រជុំលើកទី៤ ព្រឹទ្ធសភា នីតិកាលទី៤
របស់អគ្គលេខាធិការដ្ឋានព្រឹទ្ធសភាបានឱ្យដឹងថា សម័យប្រជុំលើកទី៤នេះ បានដំណើរការដោយមានរបៀបវារៈតែមួយគឺ ស្តាប់របាយការណ៍គណៈកម្មាធិការអចិន្ត្រៃយ៍ស្តីពី សកម្មភាពការងាររបស់ព្រឹទ្ធសភា នៅចន្លោះសម័យប្រជុំលើកទី៣ និងលើកទី៤ ព្រឹទ្ធសភា នីតិកាលទី៤ ដែល ក្នុងរយៈពេលបីខែនេះ ព្រឹទ្ធសភាបាន ប្រជុំគណៈកម្មាធិការអចិន្ត្រៃយ៍ចំនួន ០៤លើក និងប្រជុំវិសាមញ្ញចំនួន ០២លើក ដោយពិនិត្យ និងឱ្យយោបល់លើសេចក្តីព្រាងច្បាប់ចំនួន ០៥ច្បាប់។
ក្នុងនោះដែរព្រឹទ្ធសភាបានទទួលពាក្យ បណ្តឹងចំនួន១៦ករណី ប្រជុំផ្ទៃក្នុងគណៈកម្មការចំនួន១០លើក ចុះបេសកកម្មក្នុងប្រទេសចំនួន ១០លើក បំពេញបេសកកម្មក្រៅប្រទេសចំនួន ០៦លើក ចូលរួមសិក្ខាសាលា វេទិកា និងកិច្ចប្រជុំនានាចំនួន ១៧៦លើក និងចូលរួមពិធីផ្លូវការផ្សេងៗចំនួន ៣៥០លើក ព្រមទាំងចុះមូលដ្ឋានដោយឡែករៀងៗខ្លួនចំនួន១៩១លើក។
ក្រុមសមាជិកព្រឹទ្ធសភាប្រចាំភូមិភាគ និងក្រុមសមាជិកាព្រឹទ្ធសភា បានរៀបចំវេទិកា សាធារណៈចំនួន ៣លើក នៅខេត្តពោធិ៍សាត់ ខេត្តត្បូងឃ្មុំ និងរាជធានីភ្នំពេញ ដើម្បីដោះ-ស្រាយបញ្ហាប្រឈម និងសំណូមពររបស់ក្រុមប្រឹក្សាឃុំ សង្កាត់ និងជីអណ្តូងទឹកស្អាត ជីកស្រះទឹក ដឹកនាំក្រុមគ្រូពេទ្យស្ម័គ្រចិត្តចុះពិនិត្យ និងព្យាបាលជំងឺជូនប្រជាពលរដ្ឋ នៅរាជធានីភ្នំពេញ ខេត្តកណ្តាល តាកែវ កំពត កែប ឧត្តរមានជ័យ ព្រះវិហារ កំពង់ធំ ប៉ៃលិន បាត់ដំបង និងខេត្តបន្ទាយមានជ័យ ព្រមទាំងចូលរួមក្នុងពិធីផ្សេងៗ។
ក្នុងអំឡុងពេលចន្លោះសម័យប្រជុំលើកទី៣ និងលើកទី៤នេះដែរ ថ្នាក់ដឹកនាំ គណៈកម្មាធិការអចិន្ត្រៃយ៍ គណៈកម្មការ ក្រុមភូមិភាគនានា សមាជិក សមាជិកាព្រឹទ្ធសភានីតិកាលទី៤ បានរួមគ្នាខិតខំបំពេញភារកិច្ចរៀងៗខ្លួន ទាំងក្នុងប្រទេស និងក្រៅប្រទេស ប្រកបដោយស្មារតីទទួលខុសត្រូវខ្ពស់ ហើយ សម្រេចបានលទ្ធផលផ្លែផ្កា ជាគុណ ប្រយោជន៍ដល់ជាតិ និងប្រជាពលរដ្ឋ។
ព្រឹទ្ធសភា សូមសម្តែងនូវការដឹងគុណយ៉ាងជ្រាលជ្រៅចំពោះការគាំទ្រដ៏ថ្លៃថ្លាពីគ្រប់មជ្ឈដ្ឋាន និងគ្រប់ស្ថាប័ន ដែលញុំាងឱ្យព្រឹទ្ធសភាដំណើរការទៅមុខដោយរលូន និងល្អប្រពៃផងដែរ ៕
ចំនួនអ្នកទស្សនា
- ថ្ងៃនេះ8191
- ម្សិលមិញ20231
- សប្តាហ៍នេះ87271
- ខែនេះ109151
- ឆ្នាំនេះ109151
- សរុប20551607