លោកឧត្តមសេនីយ៍ឯក ឆាយ គឹមខឿន អញ្ជើញបិទវគ្គបំប៉នជំនាញការពារគោលដៅ
24-October-2019 | ដោយ ពលមនសិការ
កំពង់ស្ពឺ៖ នាព្រឹកថ្ងៃទី២៤ ខែតុលា ឆ្នាំ២០១៩នេះ ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានអញ្ជើញជាអធិបតី ក្នុងពិធីបិទវគ្គបំប៉នជំនាញការពារគោលដៅ នៅសាលានគរបាលជាតិមិត្ត ភាពកម្ពុជា-វៀតណាម ស្ថិតនៅស្រុកភ្នំស្រួច ខេត្តកំពង់ស្ពឺ។
ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បានវាយតម្លៃខ្ពស់ចំពោះកិច្ចខិតខំរបស់គណៈគ្រប់គ្រងសាលាគ្រប់ជាន់ថ្នាក់ ភាគីវៀតណាមដែលបានរៀបចំអោយមានវគ្គបណ្តុះបណ្តាល ក៏ដូចជាវគ្គបំប៉នជំនាញ ជាបន្តបន្ទាប់។
ឯកឧត្តម បន្តថា ក្នុងនាមជាកងកម្លាំងនគរបាលមានភារកិច្ចក្នុងការថែរក្សានូវសុខសន្តិភាព សុវត្ថិភាព និងសណ្តាប់ធ្នាប់ជូនប្រជាពលរដ្ឋ និងប្រទេសជាតិ។ ជាពិសេស ការពារជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់ ដែលកើតចេញពីការបោះឆ្នោត ហើយត្រូវកំចាត់ចោលភ្លាមចំពោះបុគ្គលណាឬក្រុមណាដែលមានចេតនាបំផ្លិតបំផ្លាញសុវត្ថិភាព និងសន្តិសុខជាតិ។
ឯកឧត្តម ឧត្តមសេនីយ៍ឯក ឆាយ គឹមខឿន បានបញ្ជាក់ថា ក្នុងនាមកងកម្លាំងត្រូវតែសិលធម៌ និងគោរពវិន័យ បទបញ្ជារបស់ថ្នាក់ដឹកនាំ និងរាជរដ្ឋាភិបាលដែលបានប្រគល់ជូន ជាពិសេសបន្តរួមសហការជាមួយអាជ្ញាធរមានសមត្ថកិច្ច អនុវត្តនូវគោលនយោបាយភូមិឃុំ មានសុវត្ថិភាព អោយបានល្អប្រសើរថែមទៀត។
ឯកឧត្តម ឧត្តមសេនីយ៍ឯក ឆាយ គឹមខឿន បញ្ជាក់ថា ជំនាញការពារគោលដៅមានភារកិច្ចសារៈសំខាន់ណាស់ គឺការពារគោលដៅនយោបាយ ស្ថានទូត និវេសនដ្ឋាន សេដ្ឋកិច្ច វប្បធម៌ វិនិយោគ និងឥស្សរជនជាតិ អន្តរជាតិ។
ជាមួយគ្នានោះដែរ ឯកឧត្តម ឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បាននាំនូវថវិកាចំនួន ៥លានរៀល របស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ជូនសាលានគរបាលជាតិមិត្ត ភាពកម្ពុជា-វៀតណាម និងបានផ្តាំផ្ញើសាកសួរសុខទុក្ខដល់សិក្ខាកាមដែលជាកងកម្លាំងនគរបាលទាំងអស់ ហើយបានណែនាំអោយខិតខំហ្វឹកហាត់នូវជំនាញវិជ្ជាជីវៈរបស់ខ្លួនបន្ថែមទៀត និងមិនត្រូវធ្វើអ្វីអោយខុសពីក្រមសីលធម៌វិជ្ជាជីវៈជានគរបាលនោះទេ។
ថ្លែងនៅក្នុងកម្មវិធីបិទនោះដែរ ឯកឧត្តមឧត្តមសេនីយ៍ឯក អ៊ុ អុន អនុប្រធានសេនាធិការ និងជានាយកសាលានគរបាលមិត្តភាពកម្ពុជា-វៀតណាម បានឲ្យដឹងថា សាលានគរបាលមិត្តភាពកម្ពុជា-វៀតណាម មានតួនាទីយ៉ាងសំខាន់ធ្វើជាសេនាធិការជូនអគ្គស្នងការដ្ឋាននគរបាលជាតិ ហើយរហូតមកដល់ពេលនេះ សាលាបានបើកវគ្គបំប៉នជំនាញជូនដល់កងកម្លាំងទូទាំងប្រទេសបានចំនួនជាង២៣០០នាក់ហើយ ក្នុងនោះនារីជាងមួយរយនាក់ ដោយជំនាញផ្សេងៗគ្នា ក្នុងនោះមានជំនាញការពារថ្នាក់ដឹកនាំ វគ្គបំប៉នជំនាញការពារនិងទប់ទល់បាតុកម្ម ជំនាញគ្រូបង្គោលពន្លត់អគ្គិភ័យ និងជួយសង្គ្រោះ ជំនាញការពារគោលដៅ និងជំនាញអន្តរាគមន៍ ជាដើម ៕
ចំនួនអ្នកទស្សនា
- ថ្ងៃនេះ8091
- ម្សិលមិញ20231
- សប្តាហ៍នេះ87171
- ខែនេះ109051
- ឆ្នាំនេះ109051
- សរុប20551507