នាយឧត្តមសេនីយ៍ សន្តិបណ្ឌិត នេត សាវឿន ផ្ញើសារថ្វាយព្រះពរព្រះករុណាព្រះបាទសម្តេចព្រះបរមនាថ នរោត្តម សីហមុនី
28-October-2019 | ដោយ ពលមនសិការ
ភ្នំពេញ៖ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ តាំងនាមនគរបាលជាតិទូទាំងប្រទេស និងក្នុងនាមទូលព្រះបង្គំផ្ទាល់សូមចូលរួមអបអរសាទរទិវាដ៏មហានក្ខត្តឫក្សរបស់ព្រះករុណាព្រះបាទសម្តេចព្រះបរមនាថ ជាទីគោរពសក្ការៈដ៏ខ្ពង់ខ្ពស់បំផុតក្នុងឱកាស ប្រារព្ធព្រះរាជពិធីគ្រងព្រះបរមរាជសម្បត្តិគម្រប់ខួប១៥ឆ្នាំ ដែលនឹងប្រព្រឹត្តទៅនាថ្ងៃអង្គារ ០២កើត ខែកត្តិក ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៩ ខែតុលា ឆ្នាំ២០១៩ខាងមុខនេះ។
អំឡុងពេល១៥ឆ្នាំ នៃការគ្រងព្រះបរមរាជសម្បត្តិ ព្រះករុណាជាអម្ចាស់ជីវិតលើត្បូង បានបំពេញព្រះរាជកិច្ចតាមព្រះរាជលំអាននៃព្រះរាជបូជនីយកិច្ចរបស់ ព្រះបរមរតនកោដ្ឋ ដោយព្រះអង្គបានបំពេញព្រះរាជតួនាទីប្រកបដោយបញ្ញាញាណ និងទសពិធរាជធម៌ លះបង់ព្រះកាយពល មិនគិតពីការលំបាកនឿយហត់ដើម្បីភាពថ្កុំថ្កើងរុងរឿងរបស់ប្រទេសជាតិ និងការលើកកម្ពស់កិត្យានុភាពជាតិ ឲ្យមានឈ្មោះល្បីរន្ទឺនៅលើឆាកអន្តរជាតិ។
ក្រោមម្លប់បារមីដ៏ត្រជាក់ត្រជុំនៃអង្គព្រះមហាក្សត្រ ប្រទេសជាតិមានសុខសន្តិភាព មានការអភិវឌ្ឍលើគ្រប់វិស័យ ប្រជារាស្ត្រខ្មែរមានភ័ព្វសំណាងរស់នៅប្រកបដោយមោទនភាព មានសិទ្ធិសេរីភាពពេញលេញ មានជីវភាពសម្បូរសប្បាយ។ ជាថ្មីម្តងទៀត ទូលព្រះបង្គំយើងខ្ញុំទាំងអស់គ្នាសូមសម្តែងនូវកតញ្ញូតាធម៌ថ្វាយព្រះករុណាជាអម្ចាស់ជីវិតលើត្បូង។
សូមព្រះអង្គទ្រង់មានព្រះកាយពលមាំមួន ព្រះរាជសុខភាពល្អបរិបូណ៍ព្រះជន្មាយុយឺនយូរជាងរយព្រះវស្សាដើម្បីគង់ប្រថាប់លើព្រះបរមរាជសម្បត្តិជាម្លប់ដ៏ត្រជាក់ត្រជុំសម្រាប់ប្រជារាស្ត្រខ្មែរគ្រប់រូបជាយូរអង្វែងតរៀងទៅ។ សូមព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់ព្រះមេត្តាប្រោសទទួលនូវការក្រាបបង្គំទូលថ្វាយដោយគារវភក្តីដ៏ខ្ពង់ខ្ពស់បំផុតអំពីទូលព្រះបង្គំយើងខ្ញុំ ៕
ចំនួនអ្នកទស្សនា
- ថ្ងៃនេះ7381
- ម្សិលមិញ20231
- សប្តាហ៍នេះ86461
- ខែនេះ108341
- ឆ្នាំនេះ108341
- សរុប20550797